ମହଙ୍ଗା ପଡ଼ିଲା ସରପଞ୍ଚଙ୍କ ମିଥ୍ୟା ସତ୍ୟପାଠ , ପଦ ହରାଇଲେ ସରପଞ୍ଚ ଅନୂସୟା
ଢେଙ୍କାନାଳ (ମନିସ)22/5/25 — କଙ୍କଡ଼ାହାଡ଼ -ଯେପରି କଥାରେ ଅଛି ସତ କେବେ ଲୁଚି ରହେନା ଠିକ୍ ଏପରି ଏକ ଘଟଣା ଘଟିଛି ଢେ଼ଙ୍କାନାଳ ଜିଲ୍ଲା କଙ୍କଡ଼ାହାଡ଼ ବ୍ଲକରେ । ୨୧ ଗୋଟି ପଞ୍ଚାୟତକୁ ନେଇ କଙ୍କଡ଼ାହାଡ଼ ବ୍ଲକ ରହିଥିବା ବେଳେ ଏଥି ମଧ୍ୟରେ ରହିଛି କଙ୍କଡ଼ାହାଡ଼ ଗ୍ରାମ ପଞ୍ଚାୟତ । ଗତ ୨୦୨୨ ମସିହାରେ ହୋଇଯାଇଥିବା ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ କଙ୍କଡ଼ାହାଡ଼ ପଞ୍ଚାୟତ ସରପଞ୍ଚ ପଦବୀ ପାଇଁ ୫ ଜଣ ନାମାଙ୍କନ ପତ୍ର ଦାଖଲ କରି ମୈଦାନରେ ପ୍ରତିଦ୍ବନ୍ଦିତା କରିଥିଲେ । ଏହି ୫ ଜଣଙ୍କ ମଧ୍ୟରେ ହୋଇଥିବା ପ୍ରତିଦ୍ବନ୍ଦୀଙ୍କ ମଧ୍ୟରେ ବର୍ତ୍ତମାନର ସରପଞ୍ଚ ଅନୁସୟା ସାହୁ ତାଙ୍କର ନିକଟତମ ପ୍ରତିଦ୍ବନ୍ଦୀ ଅଳକା ପଣ୍ଡାଙ୍କୁ ମାତ୍ର ୮୭ ଖଣ୍ଡ ଭୋଟ ବ୍ୟବଧାନରେ ପରାଜିତ କରିଥିଲେ । ନିର୍ବାଚିତ ସରପଞ୍ଚ ଶ୍ରୀମତୀ ସାହୁ ଗତ ନିର୍ବାଚନ ସମୟରେ ମିଥ୍ୟା ସତ୍ୟପାଠ ଦାଖଲ କରି ପଦଵୀ ଅକ୍ତିଆର କରିଥିବା ସନ୍ଦେହ ଘେରକୁ ଆସିଥିଲା ।ଯାହାକୁ ନେଇ ତନାଘନା ଆରମ୍ଭ ହୋଇଯାଇଥିଲା । ସୂଚନାରୁ ଜଣାଯାଏ ସରପଞ୍ଚ ଶ୍ରୀମତୀ ସାହୁ କାମାକ୍ଷାନଗର ବ୍ୟାଙ୍କ ଅଫ୍ ଇଣ୍ଡିଆ ଶାଖାରୁ ଓ ତାଙ୍କ ସ୍ଵାମୀ ବିମଳ ଚନ୍ଦ୍ର ସାହୁ ଅନୁଗୋଳ ସେବା ସମବାୟ ସମିତି ଲିଃ ଋଣ ନେଇଥିବା ବେଳେ ନିର୍ବାଚନ ବେଳେ ଦାଖଲ କରିଥିବା ନାମାଙ୍କନ ପତ୍ରରେ ଋଣ ନେଇନଥିବା ଉଲ୍ଲେଖ କରିଥିଲେ । ଯାହାକୁ ନେଇ ସରପଞ୍ଚ ପଦବୀ ଅସିଦ୍ଧ ଘୋଷଣା କରିବା ପାଇଁ ସିଭିଲ ଜଜ୍ ଜୁନିଅର ଡିଭିଜନ କାମାକ୍ଷାନଗରଙ୍କ ଅଦାଲତରେ ନିକଟତମ ପ୍ରତିଦ୍ବନ୍ଦୀ ଅଳକା ପଣ୍ଡା ନିର୍ବାଚନ ମିସ୍ କେସ ନମ୍ବର ୭/୨୨ ରେ ମୋକଦ୍ଦମା ଦାୟର କରିଥିଲେ ଏହାକୁ ନେଇ ଅଦାଲତ ଅନୁସୟାଙ୍କ ସରପଞ୍ଚ ପଦବୀ ରଦ୍ଦ କରିଥିଲେ ।
ପ୍ରହ୍ଲାଦ ମୁଦୁଲିଙ୍କ ରିପୋର୍ଟ
