କାହ୍ନୁ ଚରଣ ସାହୁ ପାଇଲେ “ତାରିଣୀ ଶବ୍ଦ ଭାରତୀ ସମ୍ମାନ”
କର୍ଲାମୁଣ୍ଡା (ସୁଶାନ୍ତ ରଣା): କଳାହାଣ୍ଡି ଜିଲ୍ଲା ମ.ରାମପୁର ବ୍ଲକ ସ୍ଥିତ ପଣ୍ଡକାମାଳ ଗ୍ରାମର ଯୁବକବି କାହ୍ନୁ ଚରଣ ସାହୁ “ତାରିଣୀ ଶବ୍ଦ ଭାରତୀ ସମ୍ମାନ-୨୦୨୫” ସମ୍ମାନରେ ସମ୍ମାନିତ ହୋଇଛନ୍ତି l ଏହା ସହ ଜଗନ୍ନାଥ ସାହିତ୍ୟ ସଂସଦର କର୍ମକର୍ତ୍ତା ଶ୍ରୀ ସାହୁଙ୍କୁ ଶୁଭେଚ୍ଛା ପୂର୍ବକ “ଜଗନ୍ନାଥ ସ୍ମୃତି କୈବଲ୍ୟ” ପତ୍ର ପ୍ରଦାନ କରିଛନ୍ତି l କେଉଁଝର ଜିଲ୍ଲାର ଗଦାଧରପୁରସ୍ଥ ମା ତାରିଣୀ ସାହିତ୍ୟ ସଂସଦ ଓ ଯାଜପୁର 
ଜିଲ୍ଲା ନଗୁଆଁର ଜଗନ୍ନାଥ ସାହିତ୍ୟ ସଂସଦର ମିଳିତ ସହଯୋଗରେ ସ୍ଥାନୀୟ ଜଗତଜନନୀ ମାଆ ତାରିଣୀ ପୀଠ, ଘଟଗାଁ ମନ୍ଦିର ପରିସରରେ ଥିବା କଲ୍ୟାଣ ମଣ୍ଡପ ଠାରେ ଚତୁର୍ଥ ବାର୍ଷିକ ମହୋତ୍ସବ ୨୦୨୪-୨୫ ମହାସମାରୋହରେ ପାଳିତ ହୋଇଥିଲା l ଉକ୍ତ ମହୋତ୍ସବରେ କଳାହାଣ୍ଡି ଜିଲ୍ଲା ମ.ରାମପୁର ବ୍ଲକ ସ୍ଥିତ ପଣ୍ଡକାମାଳ ଗ୍ରାମର ପିତା ସଂକୀର୍ତ୍ତନ ସାହୁ ଓ ମାତା ଶାନ୍ତି ସାହୁଙ୍କ ପୁଅ କାହ୍ନୁ ଚରଣ ସାହୁଙ୍କୁ ମା’ ତାରିଣୀ ସାହିତ୍ୟ ସଂସଦ ତରଫରୁ ଏହି ସମ୍ମାନ ପ୍ରଦାନ କରାଯାଇଛି l ଶ୍ରୀସାହୁ ପିଲାଟି ଦିନରୁ ସାହିତ୍ୟ ପ୍ରତି ବେଶ୍ ରୁଚି ରଖିଛନ୍ତି l ସ୍କୁଲ ସମୟରୁ ଲେଖାଲେଖି କରିବା ସହ କଲେଜ ସମୟରେ ଅନେକ ସାହିତ୍ୟ ପ୍ରେମୀଙ୍କ ସଂସ୍ପର୍ଶରେ ଆସି ସାହିତ୍ୟକୁ ନେଇ ସୃଷ୍ଟି କରି ପାରିଛନ୍ତି ନିଜର ସ୍ୱତନ୍ତ୍ର ପରିଚୟ l ତାଙ୍କ ଦ୍ୱାରା ରଚିତ ବହୁ କବିତା ଓ ଗଳ୍ପ ଓଡ଼ିଶା ସମେତ ଓଡିଶା ବାହାରର ବିଭିନ୍ନ ପତ୍ର ପତ୍ରିକାରେ ପ୍ରକାଶିତ ହେବା ସହ ଅନେକ ପାଠକ ପାଠିକାଙ୍କୁ ଲେଖା ପ୍ରତି କରି ପାରିଛି ଆକର୍ଷିତ l ସେ ଓଡ଼ିଆ ସହ କୋଶଲି ଓ ହିନ୍ଦୀ ଭାଷାରେ ମଧ୍ୟ ଲେଖାଲେଖି କରି ଆସୁଛନ୍ତି l
କର୍ଲାମୁଣ୍ଡାରୁ ସୁଶାନ୍ତ ରଣାଙ୍କ ରିପୋର୍ଟ, ମସୀହା
