ବାଟରେ ବସୁଛି ନର୍ଲା ହାଟ, ଉତ୍କଟ ହେଉଛି ଟ୍ରାଫିକ ସମସ୍ୟା
ନର୍ଲା,୧୬|୬ : ଜାତୀୟ ରାଜପଥ ଉପରେ ନର୍ଲା ସାପ୍ତାହିକ ହାଟ ବସୁଥିବାରୁ ଟ୍ରାଫିକ ସମସ୍ୟା ଦେଖାଦେଉଛି । ସପ୍ତାହର ରବିବାର ଓ ଗୁରୁବାର ଦୁଇ ଦିନ ହାଟ ବସିଥାଏ । ଫଳରେ ବଜାର ଭିଡ ସାଙ୍ଗକୁ ଭାରିଯାନ ଯିବା ଆସିବା ଯୋଗୁଁ ନାହିଁ ନଥିବା ଟ୍ରାଫିକ ସମସ୍ୟା ସୃଷ୍ଟି ହୋଇଥାଏ । ୫୦ ବର୍ଷରୁ ଉର୍ଦ୍ଧ୍ବ ସମୟ ଧରି ସାପ୍ତାହିକ ହାଟ ରବିବାର ଦିନ ନର୍ଲା ମୁଖ୍ୟ ରାଜରାସ୍ତା କଡରେ ଚାଲି ଆସୁଛି । ଗତ ୨୦୦୭ ମସିହାରେ ତତ୍କାଳୀନ ନର୍ଲା ବିଡିଓ ନିହାର ରଞ୍ଜନ ଦାସ ଟ୍ରାଫିକ ସମସ୍ୟାକୁ ଦେଖି ଏହି ହାଟକୁ ନର୍ଲା ହାଇସ୍କୁଲ ପଡିଆ ଓ କଲେଜ ରାସ୍ତାକୁ ଘୁଞ୍ଚାଇଥିଲେ । ହେଲେ ମାସଟେ ଏଭଳି ହାଇସ୍କୁଲ ପଡିଆରେ ଚାଲିବା ପରେ ଓ ଉକ୍ତ ବିଡିଓଙ୍କ ବଦଳୀ ପରେ ପୁଣି ନର୍ଲାର ସାପ୍ତାହିକ ରବିବାର ହାଟ ନର୍ଲା ମୁଖ୍ୟ ରାସ୍ତା କଡକୁ ଚାଲି ଆସିଥିଲା । ଏହି ରବିବାର ସାପ୍ତାହିକ ହାଟଟି ନର୍ଲା ପୋଲିସ ଷ୍ଟେସନ ସମ୍ମୁଖସ୍ଥ ରାଜ ରାସ୍ତା କଡରେ ବସି ଆସୁଥିଲେ ମଧ୍ୟ ପୋଲିସ୍ ଏଥିପାଇଁ କୌଣସୀ କାର୍ଯ୍ୟାନୁଷ୍ଠାନ ଗ୍ରହଣ କରୁ ନଥିବାରୁ ସାଧାରଣାରେ କ୍ଷୋଭ ପ୍ରକାଶ ପାଇଛି । ଗତକାଲି ରବିବାର ସାପ୍ତାହିକ ହାଟରେ ପ୍ରବଳ ଜନସମାଗମ ରହିଥିବା ବେଳେ ମୁଖ୍ୟ ରାସ୍ତା ଦେଇ ହାଇୱା ଭଳି ଅନେକ ଭାରିଯାନ ଚଳ ପ୍ରଚଳ ଓ ବ୍ୟକ୍ତିଗତ ଚାରିଚକିଆ ଲଘୁ୍ ଯାନ ଗୁଡିକର ଗମନା ଗମନ ଯୋଗୁଁ ପ୍ରବଳ ଟ୍ରାଫିକ ସମସ୍ୟା ଦେଖା ଦେଇଥିଲା । ନର୍ଲାରେ ଗୁରୁବାର ସାପ୍ତାହିକ ହାଟ ଛୋଟ ହାଟ ହୋଇଥିବା ବେଳେ ରବିବାର ହାଟରେ କିନ୍ତୁ ପ୍ରବଳ ଜନ ଗହଳି ହୋଇଥାଏ । ଏଣୁ ହାଟ ଦିନ ସକାଳ ୬ ରୁ ୧୨ ଟା ଯାଏଁ ଯେଉଁ ଭଳି ଭାବରେ ଭାରିଯାନ ଗମନା ଗମନ ଯୋଗୁଁ ଟ୍ରାଫିକ ସମସ୍ୟା ସୃଷ୍ଟି ହେଉଛି । କେତେବେଳେ ଯେ ଅଘଟଣ ଘଟିବ ତାହା କହି ହେବନାହିଁ । ଏଣୁ ଏଥିପ୍ରତି ପୋଲିସ ପ୍ରଶାସନ ଗୁରୁତ୍ୱ ଦେଇ ଏହାର ସମାଧାନ କରିବା ପାଇଁ ସାଧାରଣରେ ଦାବୀ ହେଉଛି ।
ଦୀପକ ଠାକୁର ଙ୍କ ରିପୋର୍ଟ୍
