କଳାକାର ମାନଙ୍କୁ ଦାଦନ ମୁକ୍ତ କରିବା ସରକାରଙ୍କ ପ୍ରାଥମିକ କର୍ତ୍ତବ୍ୟ : ମହାସଂଘ
ବ୍ରହ୍ମପୁର,୧୮/୮/୨୫ : ଉତ୍କୃଷ୍ଟ କଳାର ପ୍ରଦେଶ ଉତ୍କଳ ବା ଓଡ଼ିଶା ପ୍ରଦେଶରେ ଆଜି କଳାକାର ସମାଜ ଘୋର ଆର୍ଥିକ ସଙ୍କଟ ଦେଇ ଜୀବିକା ନିର୍ବାହ କରୁଛନ୍ତି । ଏହି ହେତୁ ବହୁ କଳାକାର ଦାଦନ ଶ୍ରମିକ ଭାବେ ବାହାର ରାଜ୍ୟକୁ ଯିବା ପାଇଁ ବାଧ୍ୟ ହେଉଛନ୍ତି । ବିଶେଷତଃ ଗ୍ରାମାଞ୍ଚଳରେ ବହୁଳ । ଫଳରେ ଗ୍ରାମୀଣ ନାଟ୍ୟ ସଂସ୍ଥା ନିଷ୍କ୍ରିୟ ହୋଇଯାଉଛି । କଳାକାର ଅଭାବ ଘେନି ବହୁ ଲୋକ କଳା ଓ ଲୋକ ନାଟକ ଲୁପ୍ତ ପ୍ରାୟ । ସରକାର ଏ କ୍ଷେତ୍ରରେ ଯଥାର୍ଥ ପଦକ୍ଷେପ ନେବା ସହିତ କଳାକାରଙ୍କ ଆର୍ଥିକ ମାନଦଣ୍ଡର ଅଭିବୃଦ୍ଧି ଘେନି ଯତ୍ନଶୀଳ ହେବା ଉଚିତ ବୋଲି କଳା ଓ କଳାକାର ହିତୈଷୀ ମହାମଞ୍ଚ ” ନିଖିଳ ଓଡ଼ିଶା ବରିଷ୍ଠ କଳାକାର ମହାସଂଘ ” ମହାସଚିବ ସୁବାସ ଚନ୍ଦ୍ର ସାହୁ ସରକାରଙ୍କ ନିକଟରେ ନିବେଦନ କରିଛନ୍ତି ।
ଦୁଇ ଦିନ ତଳେ ଆସିକା ସନ୍ନିକଟ ଜୟପୁର ଗ୍ରାମସ୍ଥ ଶ୍ରୀଶ୍ରୀ ଲକ୍ଷ୍ମୀ ନୃସିଂହ ଯୁବ ନାଟ୍ୟ ସଂଘର ଜନୈକ ବରିଷ୍ଠ କଳାକାର ଲିଙ୍ଗରାଜ ସ୍ୱାଇଁ ଦାଦନ ଖଟିବା ପାଇଁ ସୁଦୂର ଚେନାଇ ଯାଉଥିବା ବେଳେ ଆନ୍ଧ୍ର ପ୍ରଦେଶର ସୀମାଞ୍ଚଳ ଷ୍ଟେସନ ଓ ବିଶାଖାପାଟଣା ଷ୍ଟେସନ ମଧ୍ୟରେ ଚଳନ୍ତା ଟ୍ରେନରୁ ଖସିପଡି ମୃତ୍ୟୁ ବରଣ କରିଛନ୍ତି । ସେ ଜଣେ ପ୍ରତିବାଦୀପ୍ତ କଳାକାର ଥିଲେ । ଗ୍ରାମୀଣ ନାଟକ ବୀର ଶିଶୁ ଅଭିମନ୍ୟୁ ନାଟକରେ ଦୁଃଶାସନ ଭୂମିକାରେ ଅତି ସୁନ୍ଦର ଅଭିନୟ କରୁଥିଲେ । ତାଙ୍କରି ରୋଜଗାରରେ ତାଙ୍କ ପରିବାର ଚଳୁଥିଲା । ତାଙ୍କରି ଅକାଳ ମୃତ୍ୟୁରେ ବୃଦ୍ଧ ପିତା-ମାତା, ପତ୍ନୀ ଓ ଦୁଇ ତିନି ବର୍ଷର କନ୍ୟା ସନ୍ତାନ ସମ୍ପୂର୍ଣ ବେସାହାରା ହୋଇ ପଡିଛନ୍ତି । ତାଙ୍କର କେବଳ ପୈତୃକ ଘର ଖଣ୍ଡିକ ବାଦ ଆଉ କିଛି ନାହିଁ । ସେମାନଙ୍କ ବଂଚିବା ରାହା କିଛି ନାହିଁ କହିଲେ ଚଳେ । ଖବର ପାଇ ପିତା ଭୋବନି ସ୍ୱାଇଁ ମୁଣ୍ଡରେ ହାତଦେଇ କିଂକର୍ତ୍ତବ୍ୟ ବିମୂଢ଼ ଅବସ୍ଥାରେ ।
ଦିବଂଗତ ଲିଙ୍ଗରାଜଙ୍କ ବିୟୋଗରେ ଆସିକା ଅଞ୍ଚଳରେ ଶୋକର ଛାୟା ଖେଳି ଯାଇଛି । ତାଙ୍କ ଅମର ଆତ୍ମାର ସଦ୍ଗତି କାମନା ସହ ତାଙ୍କ ଶୋକ ସନ୍ତପ୍ତ ପରିବାର ବର୍ଗଙ୍କୁ ଈଶ୍ବର ସହାୟ ନିମନ୍ତେ ମହାସଂଘ ପକ୍ଷରୁ ପ୍ରାର୍ଥନା କରାଯାଇଛି । ଏହି ଦୁର୍ବଳ ମୁହୂର୍ତ୍ତରେ ଦିବଂଗତ ଲିଙ୍ଗରାଜ ବାବୁଙ୍କ ଶୋକସନ୍ତପ୍ତ ପରିବାରକୁ ଜିଲ୍ଲା ପ୍ରସାଶନ ଓ ରାଜ୍ୟ ସରକାର ଯଥାର୍ଥ ସହାୟତା ଯୋଗାଇ ଦେବା ନିମନ୍ତେ ମହାସଂଘ ତରଫରୁ ନିବେଦନ କରାଯାଇଛି ।।
ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
