ଢେଙ୍କାନାଳ ଜିଲ୍ଲା ପରଜଙ୍ଗ ବ୍ଲକ ବ୍ରାହ୍ମଣୀ ନଦୀ କୂଳରେ ଅବସ୍ଥିତ ପ୍ରଭୁ ଅନନ୍ତଶୟନ ପୀଠରେ ବାଲିଯାତ୍ରା ଅନୁଷ୍ଠିତ
କାମାକ୍ଷାନଗର (ମନିସ)6/11/25 — ଜିଲ୍ଲାର ବିଭିନ୍ନ ସ୍ଥାନରେ ଥିବା ପର୍ଯ୍ୟଟନ ସ୍ଥଳୀ ମଧ୍ୟରୁ ଢେ଼ଙ୍କାନାଳ ଜିଲ୍ଲା ପରଜଙ୍ଗ ବ୍ଳକ ସରାଙ୍ଗ ଗ୍ରାମ ସ୍ଥିତ ଅନନ୍ତଶୟନ ଅନ୍ୟତମ । ଏହି ପର୍ଯ୍ୟଟନସ୍ଥଳୀରେ ବହୁ ପ୍ରାଚୀନ କଳାକୃତି ରହିଛି,ଯାହାକୁ ନେଇ ପରଜଙ୍ଗ ଅଞ୍ଚଳବାସୀ ଗର୍ବିତ । ସରାଙ୍ଗ ପଞ୍ଚାୟତ ଦେଇ ପ୍ରବାହିତ ବ୍ରାହ୍ମଣୀ ନଦୀ କୂଳରେ ଶୋଭା ପାଉଛି ଏହି ପ୍ରମୁଖ ପର୍ଯ୍ୟଟନ ସ୍ଥଳୀ । ୫୫ ଫୁଟ୍ରୁ ଅଧିକ ଲମ୍ବର ପ୍ରଭୁ ବିଷ୍ଣୁଙ୍କ ଅନନ୍ତଶୟନ ପ୍ରାଚୀନ ପଥର ମୂର୍ତ୍ତି ଏଠାରେ ରହିଛି । ଯେଉଁଠି ଅନନ୍ତଶୟନ ମୂର୍ତ୍ତି ନାଭିରୁ ସୃଷ୍ଟି କର୍ତା ବ୍ରହ୍ମା ବାହାରି ଥିବାବେଳେ ପାଦତଳେ ରହିଛନ୍ତି ଲକ୍ଷ୍ମୀ,ବକ୍ଷ ସ୍ଥଳରେ ଶ୍ରୀବତ୍ସ ବ୍ରାହ୍ମଣଙ୍କ କଠଉ ଚିହ୍ନ ରହିଥିବା ବେଳେ ମସ୍ତକରେ ଅନନ୍ତ ଶେଷନାଗ,ହାତରେ ଶଙ୍ଖ,ଚକ୍ର,ଗଦା ଓ ପଦ୍ମ ସଜ୍ଜିତ ହୋଇଛି । ବ୍ରାହ୍ମଣୀ ନଦୀର ଗୋଟିଏ ପାର୍ଶ୍ଵରେ ଏହି ସ୍ଥାନ ରହିଥିବା ବେଳେ ଅପର ପାର୍ଶ୍ଵରେ ରହିଛି ତାଳଚେରର ପ୍ରସିଦ୍ଧ ପଶ୍ଚିମେଶ୍ବର ମନ୍ଦିର ସହ ରାଜବାଟୀ । ଅନନ୍ତ ଶୟନଙ୍କ ନିକଟରେ ଐଶାନେଶ୍ବର ପୂଜା ପାଉଛନ୍ତି । ଗ୍ରାମ ଦେବୀ ମା’ ଅନ୍ଧାରୀବାଉତିଙ୍କ ପୀଠ ମଧ୍ୟ କିଛି ଦୂରରେ ରହିଛି । ଅଞ୍ଚଳରେ ଥିବା ବହୁ ପୁରାତନ କାଳର କୁଆଳୁସ୍ଥିତ ଅଷ୍ଟଶମ୍ଭୁ ମନ୍ଦିର ପର୍ଯ୍ୟଟକ ଦେଖି ପାରିବେ ।
ପ୍ରତିବର୍ଷ କାର୍ତ୍ତିକ ପୂର୍ଣ୍ଣିମୀରେ ଏଠାରେ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜନ କରାଯାଇଥାଏ । ସାଧବ ପୁଅଙ୍କୁ ବିଦେଶ ଯାତ୍ରା ପାଇଁ ଶୁଭ ମନାସି ସାଧବ ବୋହୂମାନେ ଏହିଠାରୁ ବିଦାୟ ଦେଇଥାନ୍ତି ।
ଏହି ପ୍ରତିମୂର୍ତ୍ତିଟି ଓଡ଼ିଶାର ଢେଙ୍କାନାଳ ଜିଲ୍ଲାର ସରାଙ୍ଗ ଗାଁରେ ଅବସ୍ଥିତ । ଏହା ବ୍ରାହ୍ମଣୀ ନଦୀର ବାମ ପାର୍ଶ୍ୱରେ ଥିବା ଏକ ବିଶାଳ ଖୋଲା ପଥର ଉପରେ ଅନନ୍ତଶୟନ ବିଷ୍ଣୁ ( ଅନନ୍ତଶାୟୀ ବିଷ୍ଣୁ) ରୂପରେ ଖୋଦିତ । ପ୍ରତିମୂର୍ତ୍ତିଟି ନବମ ଶତାବ୍ଦୀର ଆରମ୍ଭରେ ନିର୍ମିତ ହୋଇଥିଲା ନେଇ ଐତିହାସିକ ତଥ୍ୟ ରେ ଉଲ୍ଲେଖ ରହିଛି । ଭଗବାନ ବିଷ୍ଣୁଙ୍କ ଏକ ବିଶାଳ ପ୍ରତିମା,ଯେଉଁଥିରେ ସେ ଶେଷ ନାଗ ଉପରେ ଶୟନ କରିଥିବା ମୁଦ୍ରାରେ ରହିଛନ୍ତି । ଆସିଲେ ପ୍ରାଚୀନ କଳାକୃତି ସହ ପ୍ରକୃତିକୁ ପ୍ରଚୁର ଉପଭୋଗ କରିପାରିବେ । ପିକ୍ନିକ୍ ପାଇଁ ମଧ୍ୟ ଏହା ଏକ ପ୍ରକୃଷ୍ଟ ସ୍ଥାନ ।
ପ୍ରହ୍ଲାଦ ମୁଦୁଲିଙ୍କ ରିପୋର୍ଟ
