ବିପିୟୁଟି ବହୁ ଆନ୍ତର୍ଜାତୀୟ ସମ୍ମିଳନୀ ଉଦଘାଟିତ
ରାଉରକେଲା : ଓଡ଼ିଶାର ବିଜୁ ପଟ୍ଟନାୟକ ବୈଷୟିକ ବିଶ୍ୱବିଦ୍ୟାଳୟ (ବିପିୟୁଟି) ଆନ୍ତର୍ଜାତୀୟ ପକ୍ଷରୁ ନିଜସ୍ଵ କ୍ୟାମ୍ପସରେ ‘ବିକାଶଶୀଳ ପ୍ରଯୁକ୍ତିବିଦ୍ୟାର ଉଦୀୟମାନ ଧାରା’ ଉପରେ ତିନି ଦିନିଆ ‘ବିପିୟୁଟି ବହୁ-ଆନ୍ତର୍ଜାତୀୟ ସମ୍ମିଳନୀ (BMIC-ETET 2025) ଉଦ୍ଘାଟିତ ହୋଇଯାଇଛି। ଏହି ସମ୍ମିଳନୀ ପାଇଁ ୩୦୦ରୁ ଅଧିକ ଗବେଷଣା ପ୍ରବନ୍ଧ ପ୍ରାପ୍ତ ହୋଇଥିବା ବେଳେ ସେଥିମଧ୍ୟରୁ ୮୬ଟି ଉଚ୍ଚକୋଟୀର ପ୍ରବନ୍ଧକୁ ଚୟନ କରାଯାଇଛି। ଏହି ପ୍ରବନ୍ଧଗୁଡ଼ିକ ବିଭିନ୍ନ ଗୁରୁତ୍ୱପୂର୍ଣ୍ଣ କ୍ଷେତ୍ର ଯଥା: ବୁଦ୍ଧିମାନ ସୂଚନା ଏବଂ କମ୍ପ୍ୟୁଟିଂ ସିଷ୍ଟମ, ବୁଦ୍ଧିମାନ ସାମଗ୍ରୀ, ସମିଶ୍ରଣ ଏବଂ ସଂରଚନା, ସମାଜ ସୂଚନା ବିଜ୍ଞାନ ଏବଂ ନିରନ୍ତରତା ଏବଂ ଭୌତିକ, ପରିବେଶଗତ ଏବଂ କମ୍ପୁଟର ବିଜ୍ଞାନ ଆଦି ବିଷୟ ଉପରେ ଆଧାରିତ। ଏହି ସମ୍ମିଳନୀରେ ୧୪ଟି ଦେଶର ଗବେଷକ ଓ ବିଦ୍ୱାନମାନେ ଅଂଶଗ୍ରହଣ କରି ନିଜର ପ୍ରବନ୍ଧ ଉପସ୍ଥାପନ କରୁଛନ୍ତି।
ଏହି ସମ୍ମିଳନୀର ଉଦ୍ଘାଟନୀ ସମାରୋହ ୧୯ ଡିସେମ୍ବର ୨୦୨୫ ପୂର୍ବାହ୍ନ ୧୧:୩୦ ସମୟରେ ଛେଣ୍ଡ କ୍ୟାମ୍ପସ ସ୍ଥିତ ନେତାଜୀ ସୁଭାଷ ପ୍ରେକ୍ଷାଳୟରେ ଅନୁଷ୍ଠିତ ହୋଇଯାଇଛି । ଏହି ଅବସରରେ ପ୍ରୋଗ୍ରାମ ଚେୟାର ପ୍ରଫେସର ଶ୍ରୀନିବାସ ସେଠୀ, ଜେନେରାଲ ଚେୟାର ପ୍ରଫେସର ବିଭୁଦତ୍ତ ସାହୁ, ମୁଖ୍ୟ ଅତିଥି ଭାବେ ଆଇଆଇଏସଟି, ବେଙ୍ଗାଲୁରୁର ପୂର୍ବତନ ପ୍ରଫେସର ଏଲ.ଏମ. ପଟ୍ଟନାୟକ, କୁଳପତି ତଥା ମୁଖ୍ୟ ପୃଷ୍ଠପୋଷକ ପ୍ରଫେସର ଅମିୟ କୁମାର ରଥ ଏବଂ ବିପିୟୁଟି କୁଳସଚିବ ନିଶି ପୁନମ ମିଞ୍ଜ ପ୍ରମୁଖ ମଞ୍ଚାସୀନ ଥିଲେ।
ପ୍ରଫେସର ସେଠୀ ସ୍ୱାଗତ ଭାଷଣ ପ୍ରଦାନ କରିଥିବା ବେଳେ ପ୍ରଫେସର ସାହୁ ଗବେଷକମାନେ ସମ୍ମୁଖୀନ ହେଉଥିବା ଆହ୍ୱାନ ଏବଂ ଏହି ସମ୍ମିଳନୀ କିଭଳି ସେଗୁଡ଼ିକର ସମାଧାନ ଦିଗରେ କାର୍ଯ୍ୟ କରିବ, ସେ ବିଷୟରେ ଆଲୋଚନା କରିଥିଲେ। କୁଳପତି ପ୍ରଫେସର ରଥ ବାସ୍ତବ ଜୀବନର ସମସ୍ୟା ସମାଧାନ ପାଇଁ ବହୁମୁଖୀ ଗବେଷଣାର ଗୁରୁତ୍ୱ ଉପରେ ଆଲୋକପାତ କରିଥିଲେ ଏବଂ ବିଶ୍ୱବିଦ୍ୟାଳୟର ‘ବିପିୟୁଟି ହ୍ୟାକାଥନ’ ଓ ‘ସ୍ମାର୍ଟ ଇଣ୍ଡିଆ ହ୍ୟାକାଥନ’ ଭଳି ନିଆରା ପଦକ୍ଷେପ ବିଷୟରେ ସୂଚନା ଦେଇଥିଲେ। ମୁଖ୍ୟ ଅତିଥି ପ୍ରଫେସର ପଟ୍ଟନାୟକ ଇଣ୍ଟରଡିସିପ୍ଲିନାରୀ ଗବେଷଣା, ସ୍ଥାୟିତ୍ୱ ଏବଂ ସ୍ୱଦେଶୀ ଜ୍ଞାନକୌଶଳର ବିକାଶ ଉପରେ ଗୁରୁତ୍ୱାରୋପ କରିଥିଲେ। ସେ ମାନବ ଜୀବନରେ ପ୍ରଯୁକ୍ତିବିଦ୍ୟାର ପ୍ରଭାବ ଏବଂ କୃଷି କ୍ଷେତ୍ରରେ କୃତ୍ରିମ ବୁଦ୍ଧିମତାର ଭୂମିକା ସମ୍ପର୍କରେ ମଧ୍ୟ ବକ୍ତବ୍ୟ ରଖିଥିଲେ।
ଏହି ଅବସରରେ ଗୃହୀତ ହୋଇଥିବା ସମସ୍ତ ଗବେଷଣା ପ୍ରବନ୍ଧର ସଂକ୍ଷିପ୍ତ ସାରାଂଶକୁ ନେଇ ଏକ ପୁସ୍ତକ ଉନ୍ମୋଚିତ ହୋଇଥିଲା। ଶେଷରେ କୁଳସଚିବ ଶ୍ରୀମତୀ ମିଞ୍ଜ ଧନ୍ୟବାଦ ଅର୍ପଣ କରିଥିଲେ। ଏହି କାର୍ଯ୍ୟକ୍ରମରେ ପ୍ରଫେସର ଶିବକୁମାର ମିଶ୍ର, ଡକ୍ଟର ବିକ୍ରମାଦିତ୍ୟ ଦାଶ, ଡକ୍ଟର ଡି. ଚନ୍ଦ୍ରଶେଖର ରାଓ, ଡକ୍ଟର ଶୁଭେନ୍ଦୁ ରଥଙ୍କ ସମେତ ବିଶ୍ୱବିଦ୍ୟାଳୟର ଅନ୍ୟାନ୍ୟ ଅଧିକାରୀ, ଅଧ୍ୟାପକ ଓ କର୍ମଚାରୀମାନେ ଉପସ୍ଥିତ ଥିଲେ।
ଏହି ତିନି ଦିନିଆ ସମ୍ମିଳନୀରେ ପ୍ରଫେସର ଏଲ.ଏମ. ପଟ୍ଟନାୟକ, ପ୍ରଫେସର ଅଗସ୍ସା ସମିତୋ(ମ୍ୟାକଗିଲ୍ ବିଶ୍ୱବିଦ୍ୟାଳୟ, କାନାଡା), ପ୍ରଫେସର ଜି. ଏ. ରବି କିରଣ (ଏନୱାଇୟୁଏସଟି, ତାଇୱାନ), ପ୍ରଫେସର ମୁଫ୍ତିମହମୁଦ (କିଙ୍ଗ ଫୟାଦ ବିଶ୍ୱବିଦ୍ୟାଳୟ, ସାଉଦିଆରବିଆ), ଡଃ ଶ୍ରୀଧର ନାୟକ (ମୁଖ୍ୟ ବୈଜ୍ଞାନିକ, ଜାପାନ ପାଣିପାଗ ନିଗମ), ପ୍ରଫେସର ଶିବ କୁମାର ଉଦ୍ଗାତା (ହାଇଦ୍ରାବାଦ ବିଶ୍ୱବିଦ୍ୟାଳୟ); ଏବଂ ଡଃ ଅମିତ କୁମାର ମିଶ୍ର (ଆରସି ଫୋରନାକ୍ସ ୟୁକେ, ଭିଜିଟିଂ ପ୍ରଫେସର, ୟୁନିଭରସିଟି ୱେଷ୍ଟ, ସ୍ୱୀଡେନ) ଅନ୍ତର୍ଭୁକ୍ତଙ୍କ ଭଳି ବିଶିଷ୍ଟ ବୈଜ୍ଞାନିକମାନେ ନିଜର ଅଭିଭାଷଣ ରଖିବେ।
ଏହି ସମ୍ମିଳନୀ ଇଣ୍ଟରଡିସିପ୍ଲିନାରୀ ସହଯୋଗକୁ ବୃଦ୍ଧି କରିବା ସହ ଆନ୍ତର୍ଜାତୀୟ ଗବେଷଣା ସହଭାଗିତାକୁ ମଜବୁତ କରିବ ବୋଲି ଆଶା କରାଯାଉଛି। ଏହା ବିପିୟୁଟିକୁ ଏକ ବିଶ୍ୱସ୍ତରୀୟ ଗବେଷଣା କେନ୍ଦ୍ର ଭାବେ ଗଢ଼ିତୋଳିବା ସହ ଏକାଡେମିକ୍ ଏବଂ ଶିଳ୍ପ କ୍ଷେତ୍ରରେ ଉଲ୍ଲେଖନୀୟ ଅବଦାନ ରଖିବାରେ ସହାୟକ ହେବ।
ରାଉରକେଲା ରୁ କୁଞ୍ଜ ବିହାରି ରାଉତ ଙ୍କ ରିପୋର୍ଟ୍
