ଡିଜେଲ୍-ପେଟ୍ରୋଲ୍ ସଙ୍କଟ : ହଇରାଣ ଟ୍ରକ ଚାଳକ ଓ ସାଧାରଣ ଲୋକ
କୋଇଡା, : ସମଗ୍ର ଭାରତବର୍ଷରେ ଡିଜେଲ୍ ଓ ପେଟ୍ରୋଲ୍ ଯୋଗାଣରେ ଦେଖାଦେଇଥିବା ସଙ୍କଟର ପ୍ରଭାବ ଏବେ ଖଣି ଅଞ୍ଚଳ କୋଇଡାରେ ଗୁରୁତର ଭାବେ ପଡ଼ିଛି । କୋଇଡା ଅଞ୍ଚଳ ଖଣି ଓ ଶିଳ୍ପ କାର୍ଯ୍ୟକଳାପ ପାଇଁ ପରିଚିତ ହୋଇଥିବାରୁ ପ୍ରତିଦିନ ହଜାର ହଜାର ଟ୍ରକ ଏହି ରାସ୍ତା ଦେଇ ଯାତାୟାତ କରୁଛି । କିନ୍ତୁ ଅଞ୍ଚଳର ବିଭିନ୍ନ ପେଟ୍ରୋଲ୍ ପମ୍ପରେ ଡିଜେଲ୍ ଓ ପେଟ୍ରୋଲ୍ ଅଭାବ ଦେଖାଦେବାରୁ ଟ୍ରକ ଚାଳକ, ଗାଡ଼ି ମାଲିକ ଓ ସାଧାରଣ ଲୋକ ଭାରି ହଇରାଣ ହେଉଛନ୍ତି ।
ସକାଳୁ ସକାଳୁ ବିଭିନ୍ନ ପେଟ୍ରୋଲ୍ ପମ୍ପ ସମ୍ମୁଖରେ ଲମ୍ବା ଲାଇନ୍ ଦେଖିବାକୁ ମିଳୁଛି । ଅନେକ ଟ୍ରକ ଘଣ୍ଟା ଘଣ୍ଟା ଧରି ଡିଜେଲ୍ ପାଇଁ ଅପେକ୍ଷା କରୁଥିବାବେଳେ କେତେକ ପମ୍ପରେ “ନୋ ଷ୍ଟକ୍” ବୋର୍ଡ ଲାଗିଥିବା ଦେଖାଯାଇଛି । ଡିଜେଲ୍ ନମିଳିବାରୁ ଖଣିରୁ ମାଲ ପରିବହନ କାମ ମଧ୍ୟ ପ୍ରଭାବିତ ହେଉଥିବା ସୂଚନା ମିଳିଛି
ଟ୍ରକ ଚାଳକମାନଙ୍କ କହିବା ଅନୁସାରେ, ଦୀର୍ଘ ସମୟ ଧରି ପମ୍ପରେ ଅପେକ୍ଷା କରିବାରୁ ସମୟ ଓ ଅର୍ଥ ଉଭୟର କ୍ଷତି ହେଉଛି । ଅନେକ ଗାଡ଼ି ରାସ୍ତାରେ ଅଟକି ରହୁଥିବାରୁ ଯାତାୟାତ ବ୍ୟବସ୍ଥା ମଧ୍ୟ ବିପର୍ଯ୍ୟସ୍ତ ହୋଇପଡ଼ିଛି । ସାଧାରଣ ଲୋକମାନେ ମଧ୍ୟ ନିଜ ଦୈନନ୍ଦିନ କାମ ପାଇଁ ପେଟ୍ରୋଲ୍ ନମିଳିବାରୁ ଅସୁବିଧାରେ ପଡ଼ୁଛନ୍ତି । ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ, ଖଣି ଅଞ୍ଚଳ ହୋଇଥିବା ସତ୍ତ୍ୱେ ଏଠାରେ ଇନ୍ଧନର ସଠିକ୍ ଯୋଗାଣ ବ୍ୟବସ୍ଥା ନଥିବା ଦୁଃଖଦ ଘଟଣା । ଶୀଘ୍ର ସମସ୍ୟାର ସମାଧାନ ନହେଲେ ଆଗାମୀ ଦିନରେ ପରିବହନ ବ୍ୟବସ୍ଥା ଓ ଶିଳ୍ପ କାର୍ଯ୍ୟକଳାପ ଗୁରୁତର ଭାବେ ପ୍ରଭାବିତ ହେବ ବୋଲି ସେମାନେ ଆଶଙ୍କା ପ୍ରକାଶ କରିଛନ୍ତି ।
ଏହି ପରିସ୍ଥିତିକୁ ଦୃଷ୍ଟିରେ ରଖି ତୁରନ୍ତ ପଦକ୍ଷେପ ନେଇ କୋଇଡା ଅଞ୍ଚଳର ସମସ୍ତ ପେଟ୍ରୋଲ୍ ପମ୍ପକୁ ପର୍ଯ୍ୟାପ୍ତ ପରିମାଣର ଡିଜେଲ୍ ଓ ପେଟ୍ରୋଲ୍ ଯୋଗାଣ କରିବାକୁ ସ୍ଥାନୀୟ ଲୋକ ଓ ଟ୍ରକ ମାଲିକ ସଂଘ ପକ୍ଷରୁ ଦାବି କରାଯାଇଛି ।
କୋଇଡାରୁ ଅକ୍ଷୟ ବିଶ୍ବାଳ
