ଆଜିର ଦିବସର ଅନୁଚିନ୍ତା : ମେ ୧୮ ତାରିଖ ଶିକ୍ଷା,ଅଧିକାର, ଜ୍ଞାନ,ବିଜ୍ଞାନ,ଐତିହ୍ୟ,ସଭ୍ୟତା ଓ ସଂସ୍କୃତିର ସଂଗ୍ରହାଳୟ
ଡ଼ା.ଦେବୀ ପ୍ରସାଦ ମିଶ୍ର,
ମେ ୧୮ ତାରିଖ କେବଳ କାଳଖଣ୍ଡର ଏକ ସାଧାରଣ ପୃଷ୍ଠା ନୁହେଁ,ବରଂ ଏହା ମାନବ ସଭ୍ୟତାର ଗର୍ବ, ବିଜ୍ଞାନର ଶକ୍ତି ଏବଂ ସାଂସ୍କୃତିକ ଚେତନାର ଏକ ଅପୂର୍ବ ସମନ୍ୱୟ।କାଳ ଓ ସମୟର ଅବିରତ ସ୍ରୋତରେ ପ୍ରତିଟି ଦିନ ଇତିହାସର ଗୋଟିଏ ଗୋଟିଏ ନୂତନ ମାଇଲଖୁଣ୍ଟ ସ୍ଥାପନ କରିଥାଏ,ଇତିହାସର ଏକ ନୂତନ ଅଧ୍ୟାୟ ରଚନା କରେ;ଯାହା ଆମକୁ ଅତୀତକୁ ଚିହ୍ନିବା ସହ ଭବିଷ୍ୟତ ଗଢ଼ିବାର ପ୍ରେରଣା ଯୋଗାଏ।ମେ ୧୮ ତାରିଖ ସେହିପରି ଏକ ସ୍ମରଣୀୟ ଦିବସ,ଯେଉଁଥିରେ ସଂସ୍କୃତି,ବିଜ୍ଞାନ ଓ ମାନବ ସଭ୍ୟତାର ଗରିମା ଏକାତ୍ମ ହୋଇ ଉଭା ହୋଇଥାଏ।
ବିଶ୍ୱ ଇତିହାସରେ ଆଜିର ଦିନଟି ‘ଆନ୍ତର୍ଜାତୀୟ ସଂଗ୍ରହାଳୟ ଦିବସ’ ଭାବେ ପାଳିତ ହେଉଛି।ସଂଗ୍ରହାଳୟ ହେଉଛି ଆମର ଅତୀତ,କଳା ଏବଂ ସଂସ୍କୃତିର ମୂକ ସାକ୍ଷୀ।ଏହା ଆମ ପୂର୍ବପୁରୁଷଙ୍କ ଜ୍ଞାନ ଓ ସାଧନାକୁ ସାଇତି ରଖିଥାଏ।ଏହା ସହିତ ସ୍ୱାସ୍ଥ୍ୟ ବିଜ୍ଞାନ କ୍ଷେତ୍ରରେ ସଚେତନତା ସୃଷ୍ଟି କରିବା ପାଇଁ ଆଜି ‘ବିଶ୍ୱ ଏଡସ୍ ଟିକା ସଚେତନତା ଦିବସ’ ମଧ୍ୟ ପାଳନ କରାଯାଉଛି।ଶିକ୍ଷା ଓ ଅଧିକାର କ୍ଷେତ୍ରରେ ମଧ୍ୟ ଆଜିର ଦିନ ଉଲ୍ଲେଖନୀୟ,କାରଣ ୧୮୫୨ ମସିହା ଆଜିର ଦିନରେ ଆମେରିକାର ମାସାଚୁସେଟ୍ସରେ ସମସ୍ତ ଶିଶୁଙ୍କ ପାଇଁ ଶିକ୍ଷା ବାଧ୍ୟତାମୂଳକ କରାଯାଇଥିଲା।
ଭାରତ କ୍ଷେତ୍ରରେ ଆଜି ହେଉଛି ଭାରତର ପୂର୍ବତନ ଷଷ୍ଠ ରାଷ୍ଟ୍ରପତି ୧୯୧୩ ମସିହାରେ ଜନ୍ମଗ୍ରହଣ କରିଥିବା ନୀଲମ ସଞ୍ଜୀବ ରେଡ୍ଡୀଙ୍କ ଜନ୍ମଜୟନ୍ତୀ।ତାଙ୍କର ସରଳତା,ସ୍ପଷ୍ଟବାଦିତା,ଗଣତାନ୍ତ୍ରିକ ଆଦର୍ଶ ଓ ନେତୃତ୍ୱ ଆଜି ମଧ୍ୟ ପ୍ରେରଣାଦାୟକ ଆଦର୍ଶ ଗଣତନ୍ତ୍ରର ଏକ ଅନନ୍ୟ ପ୍ରତୀକ।ଏହି ଦିନ ବିଜ୍ଞାନ ଓ ଜାତୀୟ ସ୍ୱାଭିମାନର ମଧ୍ୟ ଏକ ସ୍ୱର୍ଣ୍ଣିମ ସ୍ମୃତି ବହନ କରେ।୧୯୭୪ ମସିହାରେ ପୋଖରାନରେ ଭାରତର ପ୍ରଥମ ପରମାଣୁ ପରୀକ୍ଷଣ ‘ସ୍ମାଇଲିଙ୍ଗ ବୁଦ୍ଧ’ ଆମ ବୈଜ୍ଞାନିକ ସାମର୍ଥ୍ୟକୁ ବିଶ୍ୱ ମଞ୍ଚରେ ସ୍ଥାପିତ କରିଥିଲା।ଏହି ଐତିହାସିକ ଘଟଣା ଭାରତକୁ ବିଶ୍ୱର ଷଷ୍ଠ ପରମାଣୁ ଶକ୍ତି ସମ୍ପନ୍ନ ଦେଶ ଭାବେ ଗୌରବାନ୍ୱିତ କରିଥିଲା ଏବଂ ଆମର ବୈଜ୍ଞାନିକ ସାମର୍ଥ୍ୟକୁ ପ୍ରତିପାଦିତ କରିଥିଲା।
ଓଡ଼ିଶା କ୍ଷେତ୍ରରେ ଏହାର ସମୃଦ୍ଧ ଐତିହ୍ୟ,କଳାକୃତି ଓ ଜନଜାତି ସଂସ୍କୃତିର ସଂରକ୍ଷଣ ପାଇଁ ଆଜିର ଦିନରେ ସଂଗ୍ରହାଳୟଗୁଡ଼ିକର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
ରାଷ୍ଟ୍ର ଗଠନ ଏବଂ ବିଜ୍ଞାନର ପ୍ରଗତିରେ ନିଜକୁ ସମର୍ପିତ କରିଥିବା ଏହି ମହାନ ବ୍ୟକ୍ତିତ୍ୱ ଓ ଐତିହାସିକ ଘଟଣାଗୁଡ଼ିକୁ ସ୍ମରଣ କରିବା ହିଁ ଆଜିର ଦିବସର ପ୍ରକୃତ ଅନୁଚିନ୍ତା।ଏହା ଆମକୁ ସ୍ମରଣ କରାଏ ଯେ ଜ୍ଞାନ,ସଚେତନତା ଓ ସଂରକ୍ଷଣ ହିଁ ଏକ ସୁସଂସ୍କୃତ ସମାଜର ଭିତ୍ତି।ତେବେ ଆସନ୍ତୁ,ଆମେ ସମସ୍ତେ ଆମର ଇତିହାସର ଏହି ଅମର ସ୍ୱାକ୍ଷରଗୁଡ଼ିକୁ ସ୍ମରଣ କରି,ଗୌରବମୟ ଇତିହାସକୁ ସମ୍ମାନ ଜଣାଇବା ସହ ସଂସ୍କୃତି,ଜ୍ଞାନ ଓ ମାନବିକତାର ସୁରକ୍ଷା ଓ ସଂରକ୍ଷଣର ପାଇଁ ନୂତନ ସଙ୍କଳ୍ପ ନେବା।
ଡ଼ା.ଦେବୀ ପ୍ରସାଦ ମିଶ୍ର,
✉️ debisirscience@gmail.com
/ debiprasadmishra085@gmail.com
