ରେତ ଡାହାଣ କେନାଲ ସମ୍ପ୍ରସାରଣ ଦାବି। ବିକଶିତ କଳାହାଣ୍ଡି ନୂଆପଡ଼ା ପକ୍ଷରୁ ମୁଖ୍ୟମନ୍ତ୍ରୀଙ୍କୁ ଦାବିପତ୍ର.
କଳାହାଣ୍ଡି ଜିଲ୍ଲାର ଚିର ମରୁଡ଼ି ପ୍ରପୀଡ଼ିତ ଲାଞ୍ଜିଗଡ଼ ଓ ନର୍ଲା ବ୍ଲକର ଚାଷଜମିକୁ ଜଳସେଚନର ସୁବିଧା ପାଇଁ ସ୍ଥାପିତ ହୋଇଛି ରେତ ମଧ୍ୟମ ଜଳସେଚନ ପ୍ରକଳ୍ପ। ନର୍ଲା ଓ ଲାଞ୍ଜିଗଡ଼ ତଥା କେସିଙ୍ଗା ବ୍ଲକର ୮୫୦୦ ହେକ୍ଟର ଜମିକୁ ପାଣି ଯୋଗାଇ ଦେବାକୁ ଆରମ୍ଭ ହୋଇଥିବା ଏହି ପ୍ରକଳ୍ପ କିନ୍ତୁ ଶେଷ ପର୍ଯ୍ୟାୟରେ ପହଞ୍ଚିଥିଲେ ହେଁ ନର୍ଲା ଓ ଲାଞ୍ଜିଗଡ଼ ବ୍ଲକର ସର୍ବାଧିକ ବୃଷ୍ଟିବାଧିତ ଅଞ୍ଚଳରେ ଏହା ପାଣି ଯୋଗାଇବାରେ ବିଫଳ ହୋଇଛି। ଏହାକୁ ନେଇ ଦୀର୍ଘ ଦିନ ହେଲା ଜନଅସନ୍ତୋଷ ବଢିଚାଲିଥିବା ବେଳେ ଉତ୍ୟକ୍ତ ଲୋକେ ଥରେ ରାସ୍ତାରୋକ ମଧ୍ୟ କରିଥିଲେ। ଏହାପରେ ବି ଶାସନ, ପ୍ରଶାସନ କିମ୍ବା ସରକାର ଲୋକଙ୍କ ଦାବିକୁ କର୍ଣ୍ଣପାତ କଲେ ନାହିଁ। ବାରମ୍ବାର ଦାବି, ଅଭିଯୋଗ ପରେ କେବଳ ମିଳୁଛି ପ୍ରତିଶ୍ରୁତି ଓ ପ୍ରତିଶ୍ରୁତି। ଏଥିଯୋଗୁଁ ଜନ ଅସନ୍ତୋଷର ନିଆଁ ପୁଣି କୁହୁଳୁଥିବାବେଳେ ଯେ କୌଣସି ମୁହୂର୍ତ୍ତରେ ବିରାଟ ଆନ୍ଦୋଳନର ରୂପ ନେଇପାରେ ଏହି ଆଶଙ୍କା ପ୍ରକାଶ ପାଇଛି। ଏହି ପରିପ୍ରେକ୍ଷୀରେ ଲୋକଙ୍କ ଦାବି ଓ ଆବଶ୍ୟକତାକୁ ଆଖି ଆଗରେ ରଖି ଅଗ୍ରଣୀ ନାଗରିକ ସଂଗଠନ ବିକଶିତ କଳାହାଣ୍ଡି ନୂଆପଡା ପକ୍ଷରୁ ରେତ ଡାହାଣ କେନାଲର ସମ୍ପ୍ରସାରଣ ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନିକଟରେ ଦାବି କରାଯାଇଛି। ସଂଗଠନର ଅଧ୍ୟକ୍ଷ ଡ. ଭବାନୀଶଙ୍କର ନିଆଲଙ୍କ ନେତୃତ୍ୱରେ ସଂଗଠନର ସାଧାରଣ ସଂପାଦକ ସୁଶୀଲ କୁମାର ବାଗ ଏବଂ ଅନ୍ୟ କର୍ମକର୍ତ୍ତା କଳାହାଣ୍ଡି ଜିଲ୍ଲାପାଳଙ୍କ ଜରିଆରେ ମୁଖ୍ୟମନ୍ତ୍ରୀ ଶ୍ରୀ ମାଝୀଙ୍କ ସମେତ ଜଳ ସମ୍ପଦ ବିଭାଗର ପ୍ରମୁଖ ଶାସନ ସଚିବ, ଅଧିକ୍ଷଣ ଯନ୍ତ୍ରୀଙ୍କୁ ଚିଠି ଲେଖି ଦାବି କରିଛନ୍ତି। ଦାବି ଅନୁସାରେ, ନର୍ଲା ବ୍ଲକର ଟିକିରାପଡା ଡାହାଣ ମୁଖ୍ୟ କେନାଲରୁ ଧୃକୁଟି, କୁଚେଇଯୋର, ଡେଙ୍ଗେନ ସମେତ କେଶପଲା, ବୁରାଟ, ଇନ୍ଦ୍ରମାଲ ସହିତ ଲାଞ୍ଜିଗଡ଼ ବ୍ଲକର ଗୋପାଳପୁର, ଭାଲୁଚଞ୍ଚରା, ପାଟଭାଲେର, ମଧୁପୁର, ରାମଚନ୍ଦ୍ରପୁର ଦେଇ କେନାଲ ସଂଯୋଗ କରାଗଲେ ସେଇସବୁ ଗାଁର ୧୫୦୦ ହେକ୍ଟରରୁ ଉର୍ଦ୍ଧ୍ଵ ଜମିରେ ଜଳସେଚନ ବ୍ୟବସ୍ଥା ହୋଇପାରିବ ବୋଲି ଦାବି କରାଯାଇଛି। ତେବେ ପୂର୍ବରୁ ରେତ କେନାଲର ତ୍ରୁଟିପୂର୍ଣ୍ଣ ସର୍ଭେ ଯୋଗୁଁ ଅଞ୍ଚଳର ଚାଷୀମାନେ କେନାଲ ପାଣି ପାଇବାରୁ ବଂଚିତ ହୋଇଆସୁଛନ୍ତି। ଏଣୁ ଉପଯୁକ୍ତ ସର୍ଭେ ଓ କେନାଲ ନିର୍ମାଣ କରାଗଲେ ଚାଷୀମାନେ ଜଳସେଚନର ସୁବିଧା ପାଇବା ସହିତ ଚାଷୀଙ୍କ ଉତ୍ପାଦନ ଓ ସରକାରଙ୍କ ରାଜସ୍ୱ ମଧ୍ୟ ବୃଦ୍ଧି ପାଇବ ବୋଲି ମତ ପ୍ରକାଶ ପାଇଛି।
ବିଦ୍ୟାଧର ସାହୁଙ୍କ ରିପୋର୍ଟ…..
