ଆଜିର ଦିବସର ଅନୁଚିନ୍ତା : ଜୁଲାଇ ୨୯ ତାରିଖ : (ନାସା ପ୍ରତିଷ୍ଠା ପାଇଁ ଆମେରିକା ସଂସଦରେ ବିଲ୍ ପାସ୍ ,ଚାର୍ଲସ ଏବଂ ଡାଏନାଙ୍କର ବିଶ୍ଵ ପ୍ରସିଦ୍ଧ ବିବାହ,ସମାଜ ସଂସ୍କାରକ ତଥା ମହାନ ଶିକ୍ଷାବିତ୍ ଈଶ୍ଵର ଚନ୍ଦ୍ର ବିଦ୍ୟାସାଗରଙ୍କ ଶ୍ରାଦ୍ଧ ଦିବସ,
ଜେ.ଆର.ଡି. ଟାଟାଙ୍କ ଜନ୍ମ ଜୟନ୍ତୀ,ହାସ୍ୟ ଅଭିନେତା ଜନି ୱାକର୍ଙ୍କ ପରଲୋକ,ଆନ୍ତର୍ଜାତୀୟ ବ୍ୟାଘ୍ର ଦିବସ )
ଡା.ଦେବୀ ପ୍ରସାଦ ମିଶ୍ର,
କାଳର ଅନନ୍ତ ପ୍ରବାହରେ ପ୍ରତିଟି ଦିନ ଇତିହାସର ଗୋଟିଏ ଗୋଟିଏ ସ୍ଵର୍ଣ୍ଣିମ ପୃଷ୍ଠା।ଜୁଲାଇ ୨୯ ତାରିଖ କେବଳ ଏକ ସାଧାରଣ ଦିନ ନୁହେଁ,ବରଂ ବିଶ୍ଵ, ଭାରତ ଏବଂ ଓଡ଼ିଶାର ସାଂସ୍କୃତିକ,ବୈଜ୍ଞାନିକ ଓ ପ୍ରାକୃତିକ ଚେତନାର ଏକ ଅପୂର୍ବ ସମନ୍ଵୟ।
ବିଶ୍ବ କ୍ଷେତ୍ରରେ ଆଜି ସମଗ୍ର ବିଶ୍ଵରେ ଆନ୍ତର୍ଜାତୀୟ ବ୍ୟାଘ୍ର ଦିବସ ପାଳିତ ହେଉଛି।ପ୍ରକୃତିର ସନ୍ତୁଳନ ରକ୍ଷା କରିବାରେ ବାଘମାନଙ୍କର ଗୁରୁତ୍ଵପୂର୍ଣ୍ଣ ଭୂମିକା ରହିଛି।ଆମ ଓଡ଼ିଶାର ଶିମିଳିପାଳ ଓ ସାତକୋଶିଆ ଅଭୟାରଣ୍ୟର ସୁରକ୍ଷା ପାଇଁ ଏହି ଦିବସ ଆମକୁ ସଂକଳ୍ପବଦ୍ଧ ହେବାକୁ ପ୍ରେରଣା ଦିଏ।ବିଜ୍ଞାନ ଓ ଇତିହାସର ପଦଚିହ୍ନ କ୍ଷେତ୍ରରେ ୧୯୫୮ ମସିହା ଆଜିର ଦିନରେ ନାସା ପ୍ରତିଷ୍ଠା ପାଇଁ ଆମେରିକା ସଂସଦରେ ବିଲ୍ ପାସ୍ ହୋଇଥିଲା,ଯାହା ମହାକାଶ ବିଜ୍ଞାନକୁ ଏକ ନୂତନ ଦିଗ ଦେଇଥିଲା।ସେହିପରି ଐତିହାସିକ ଦୃଷ୍ଟିକୋଣରୁ ୧୯୮୧ ମସିହା ଜୁଲାଇ ୨୯ରେ ବ୍ରିଟେନର ରାଜକୁମାର ଚାର୍ଲସ ଏବଂ ଡାଏନାଙ୍କର ବିଶ୍ଵ ପ୍ରସିଦ୍ଧ ବିବାହ ଅନୁଷ୍ଠିତ ହୋଇଥିଲା।
ଭାରତ କ୍ଷେତ୍ରରେ ଭାରତୀୟ ଶିଳ୍ପର ପ୍ରବାହ ସମ୍ପର୍କରେ ଅନୁଶୀଳନ କଲେ ଜଣାପଡ଼େ ଆଜି ହେଉଛି ଭାରତୀୟ ଶିଳ୍ପ ଜଗତର ମୁକୁଟ ବିହୀନ ସମ୍ରାଟ ୧୯୦୪ ମସିହାରେ ଜନ୍ମିତ ଜେ.ଆର.ଡି. ଟାଟାଙ୍କ ଜନ୍ମ ଜୟନ୍ତୀ।ସେ କେବଳ ଆଧୁନିକ ଭାରତର ଅର୍ଥନୀତିକୁ ସୁଦୃଢ଼ କରିନଥିଲେ,ବରଂ ଭାରତୀୟ ବିମାନ ସେବାର ପ୍ରତିଷ୍ଠା କରି ଦେଶକୁ ଏକ ନୂଆ ଉଡ଼ାଣ ଦେଇଥିଲେ।ଶିକ୍ଷା ଓ ସଂସ୍କାରର ମହାନ୍ ନାୟକ ଈଶ୍ୱର ଚନ୍ଦ୍ର ବିଦ୍ୟାସାଗର ୧୮୯୧ ମସିହା ଜୁଲାଇ ୨୯ରେ ଇହଲୀଳା ସମ୍ବରଣ କରିଥିଲେ।ସେଥିପାଇଁ ଆଜି ଭାରତୀୟ ସମାଜ ସଂସ୍କାରକ ତଥା ମହାନ ଶିକ୍ଷାବିତ୍ ଈଶ୍ଵର ଚନ୍ଦ୍ର ବିଦ୍ୟାସାଗରଙ୍କ ଶ୍ରାଦ୍ଧ ଦିବସ ପାଳନ କରାଯାଏ।ନାରୀ ଶିକ୍ଷା ଓ ବିଧବା ବିବାହ ପ୍ରଚଳନ କରି ସେ ସମାଜରୁ କୁସଂସ୍କାର ଦୂର କରିଥିଲେ।ତାଙ୍କର ଶିକ୍ଷା ଦର୍ଶନ ଆଜି ବି ଆମ ଜ୍ଞାନର ଶାଖାକୁ ଆଲୋକିତ କରୁଛି।ଚଳଚ୍ଚିତ୍ର କ୍ଷେତ୍ରରେ ଭାରତୀୟ ସିନେମା ଜଗତର ବିଶିଷ୍ଟ ହାସ୍ୟ ଅଭିନେତା ଜନି ୱାକର୍ଙ୍କ ପରଲୋକ ୨୦୦୩ ମସିହା ଆଜିର ଦିନରେ ହୋଇଥିଲା।ତାଙ୍କର ଅଭିନୟ ଶୈଳୀ ଦର୍ଶକଙ୍କ ମନରେ ଚିରକାଳ ପାଇଁ ହାସ୍ୟର ଲହରୀ ସୃଷ୍ଟି କରିଥାଏ।
ପରିଶେଷରେ ଏତିକି କୁହାଯାଇପାରେ ଯେ ଇତିହାସର ଏହିସବୁ ଘଟଣାବଳୀ ଆମକୁ ମନେ ପକାଇଦିଏ ଯେ,କର୍ମ ହିଁ ଜୀବନର ଶ୍ରେଷ୍ଠ ପରିଚୟ। ତେବେ ଆସନ୍ତୁ,ଆମେ ସମସ୍ତେ ଆଜିର ଦିବସରେ ଜ୍ଞାନ,ପ୍ରକୃତି ସୁରକ୍ଷା ଓ ମାନବିକତାର ସେବାରେ ନିଜକୁ ନିୟୋଜିତ କରି ଶାନ୍ତିପୂର୍ଣ୍ଣ ସହାବସ୍ଥାନର ବିଶ୍ୱ ସମାଜ ଗଠନ କରିବା।
ଡା.ଦେବୀ ପ୍ରସାଦ ମିଶ୍ର,
