ସମ୍ଧି ସମ୍ଧେନ୍ ହୋ
ସମ୍ଧି ହୋ ମନ୍ ଦେଇ ପଢ଼୍ବ ଏକ୍ଲା
ଲେଖୁଛେଁ ଗୁପତ୍ କଥା
ସମ୍ଧେନ୍ ଅନ୍ଲାଇନ୍ କିଲାସ୍ ବଂଦ୍ କଲେଁ
ବହ ନାଇଁହେତା ବିତ୍ବିତା। ୧
ତୁମର୍ ଟିପି ନାକେଁ ଯେନ୍ତା ରଶି ଭିଡ଼ି
ଘିଚୁଥିସନ୍ ସମ୍ଧେନ୍
ବହ ଭି ନାକ୍ ରଶି ଲଗାଲା’ନ ବାବୁକେ
କହେମି ତାହାକୁଁ ଧଏନ୍। ୨
ତୁମର୍ ପୁଓ ବହ ମାନ୍ସନ୍ ତୁମ୍କୁ ବନ୍ଏ
ମୁଇଁ ହେନ୍ତା ପାଉଛେଁ ପୂଜା
ଦୁଇଦିନିଆଁ ସୁଖ୍ କାଏଲ୍ ଯିବେ ପୁଓ ବହ
ସମ୍ଧେନ୍ ଦେବା ଫେର୍ ସଜା। ୩
ମାହାଁ ହୋ ସମ୍ଧି ଭାଏଗ୍ ତୁମର୍ ବନ୍ଏ
ସମ୍ଧେନ୍ ଏଭେଁ ଭି ଧାଂଗ୍ରି
କିଏ କହେବା ତାହାକୁଁ ଝି ବଟାଲେ’ନ
ପାଇଥିଲ ତପସ୍ୟା କରି। ୪
ତୁମେ ସିନା ସମ୍ଧି ତାକଁର୍ ପୁଷା ଜଁତୁ
ହେଲେଁ ମୁଇଁ ବଡ଼୍ କୁନୁଆଁ
ହର୍ମିଶା ମୋର୍ ବନ୍ଏ ଅସାର୍ ପଚାରି
ଦେଖୁଥିସନ୍ ଲୁକ୍ନିଆଁ। ୫
ମତେ ନାଇଁସହେ ତୁମର୍ ସମ୍ଧେନ୍ ସିନା
କରିଛେ ତମ୍କୁ ଜପାମାଲି
ତୁମର୍ ଦେଲା କପ୍ଟା ଫି ଦିନେ ଘାଏ ପିଂଧି
ମତେ ପଏର୍ଛା ଯାଉଛେ ଭୁଲି। ୬
ଆସ ହୋ ମହାରାଜ୍ ସଭେ ମିଶିକରି
ବୁଲିଯିମା ନର୍ସିଂହ୍ନାଥ୍
ଚାଲ୍ଧାରେଁ ଗାଧି ଦେଖ୍ମା ମାହାପୁରୁକେ
ଖାଏମା ହରିହର୍ ପଂଗତ୍ ଭାତ୍। ୭