ଜୁନାଗଡ଼ରେ ଫୁଟବଲ୍ ମହାସମର : ୮ଟି ଦଳକୁ ନେଇ ଆରମ୍ଭ ହେଲା ରୋମାଞ୍ଚକର ଟୁର୍ଣ୍ଣାମେଣ୍ଟ, ମାଁ ଲଙ୍କେଶ୍ବରୀ କପ୍
ଜୁନାଗଡ଼ : ୨୯/୯ (ମନୀସ) ଜୁନାଗଡ଼ ଫୁଟବଲ୍ କ୍ଲବ୍ ପକ୍ଷରୁ ଏକ ରୋମାଞ୍ଚକର ଫୁଟବଲ୍ ଟୁର୍ଣ୍ଣାମେଣ୍ଟର ଆୟୋଜନ କରାଯାଇଛି। ୮ଟି ଦଳକୁ ନେଇ ଆୟୋଜିତ ଏହି ପ୍ରତିଯୋଗିତା ଆଜି ଉତ୍ସାହ ଓ ଉଦ୍ଦୀପନାର ସହିତ ଆରମ୍ଭ ହୋଇଛି। ଉଦ୍ଘାଟନୀ କାର୍ଯ୍ୟକ୍ରମରେ ଜୁନାଗଡ଼ ଏନଏସି ଅଧ୍ୟକ୍ଷ ହିମାଦ୍ରୀ ନାୟକ ମୁଖ୍ୟ ଅତିଥି ଭାବେ ଯୋଗଦେଇ ଟୁର୍ଣ୍ଣାମେଣ୍ଟର ଶୁଭାରମ୍ଭ କରିଥିଲେ।
ଉଦ୍ଘାଟନୀ ମ୍ୟାଚ୍ରେ ଜୁନାଗଡ଼ ଫୁଟବଲ୍ କ୍ଲବ୍ ଓ ଭବାନୀପାଟଣା ରିଜର୍ଭ ପୋଲିସ୍ ମଧ୍ୟରେ ରୋମାଞ୍ଚକର ମୁକାବିଲା ହୋଇଥିଲା। ମ୍ୟାଚ୍ରେ ଜୁନାଗଡ଼ ଫୁଟବଲ୍ କ୍ଲବ୍ ଦମଦାର ପ୍ରଦର୍ଶନ କରି ୧–୦ ଗୋଲ୍ରେ ବିଜୟୀ ହୋଇ ଟୁର୍ଣ୍ଣାମେଣ୍ଟରେ ବିଜୟର ସହିତ ନିଜ ଅଭିଯାନ ଆରମ୍ଭ କରିଛି।ଏହି ପ୍ରତିଯୋଗିତାରେ ମୋଟ ୮ଟି ଦଳ ଅଂଶଗ୍ରହଣ କରୁଥିବାବେଳେ ଆସନ୍ତା ଅକ୍ଟୋବର ୨ ତାରିଖ ପର୍ଯ୍ୟନ୍ତ ବିଭିନ୍ନ ପର୍ଯ୍ୟାୟର ମ୍ୟାଚ୍ ଅନୁଷ୍ଠିତ ହେବ। ମ୍ୟାଚ୍ଗୁଡ଼ିକରେ ଖେଳାଳିମାନେ ନିଜ ଦକ୍ଷତା ପ୍ରଦର୍ଶନ କରିବା ସହ ଦର୍ଶକମାନଙ୍କୁ ଉତ୍କଣ୍ଠାପୂର୍ଣ୍ଣ ଫୁଟବଲ୍ର ଅନୁଭୂତି ଦେବେ।
ସମସ୍ତ ପର୍ଯ୍ୟାୟର ମୁକାବିଲା ପରେ ଅକ୍ଟୋବର ୩ ତାରିଖ, ଖଣ୍ଡବାସା ଦିନ ଟୁର୍ଣ୍ଣାମେଣ୍ଟର ଗ୍ରାଣ୍ଡ ଫାଇନାଲ୍ ଅନୁଷ୍ଠିତ ହେବ। ଫାଇନାଲ୍ରେ କେଉଁ ଦୁଇ ଦଳ ପରସ୍ପରକୁ ଭେଟିବେ, ତାହାକୁ ନେଇ ଏବେଠାରୁ ଫୁଟବଲ୍ ପ୍ରେମୀଙ୍କ ମଧ୍ୟରେ ଉତ୍ସୁକତା ବଢ଼ିଛି।ଏହି ଟୁର୍ଣ୍ଣାମେଣ୍ଟ ଆୟୋଜନରେ ଜୁନାଗଡ଼ ଫୁଟବଲ୍ କ୍ଲବ୍ର ସଭାପତି କାଳିଆ କନ୍ଦପାନ, ଉପସଭାପତି ସନ୍ତୋଷ ପଟ୍ଟନାୟକ, , ସତୀଶ ପ୍ରଧାନ, ରତନ ଧ. ମାଝୀ ଓ ପଞ୍ଚାନନ ଧ. ମାଝୀଙ୍କ ଲୋକନାଥ ଧ, ମାଝୀ, ବୁଲୁ ଲହଜଳ , ଭଗବାନ ଦଳପତି, ସଂଯୋଗ କୁଣ୍ଡୁ ସମେତ କ୍ଲବ୍ର ସଦସ୍ୟ ଓ ଆୟୋଜକମାନଙ୍କ ସକ୍ରିୟ ସହଯୋଗ ରହିଛି।
ଜୁନାଗଡ଼ ଫୁଟବଲ୍ କ୍ଲବ୍ର ଏହି ଆୟୋଜନ ଜୁନାଗଡ଼ ଅଞ୍ଚଳରେ କ୍ରୀଡ଼ା ପ୍ରତି ଯୁବପିଢ଼ିଙ୍କ ଆଗ୍ରହ ବଢ଼ାଇବା ସହ ସ୍ଥାନୀୟ ଫୁଟବଲ୍ ପ୍ରତିଭାଙ୍କୁ ନିଜ ଦକ୍ଷତା ପ୍ରଦର୍ଶନ ପାଇଁ ଏକ ମଞ୍ଚ ଯୋଗାଇବ ବୋଲି ଆଶା କରାଯାଉଛି। ଟୁର୍ଣ୍ଣାମେଣ୍ଟର ଆଗାମୀ ମ୍ୟାଚ୍ଗୁଡ଼ିକୁ ନେଇ ଅଞ୍ଚଳରେ ଫୁଟବଲ୍ ପ୍ରେମୀଙ୍କ ମଧ୍ୟରେ ବେଶ୍ ଉତ୍ସାହ ଦେଖାଦେଇଛି।
ନରେନ୍ଦ୍ର କ୍ଷିତି ଙ୍କ ରିପୋର୍ଟ୍
