ଆଜିର ଦିବସର ଅନୁଚିନ୍ତା : ଅକ୍ଟୋବର ୧ ତାରିଖ: ଆନ୍ତର୍ଜାତୀୟ ବୟୋଜ୍ୟେଷ୍ଠ ବ୍ୟକ୍ତି ଦିବସ,ବିଶ୍ୱ ଶାକାହାରୀ ଦିବସରେ ବୟୋଜ୍ୟେଷ୍ଠଙ୍କ ଅନୁଭବ, ଗଣିତ,ବିଜ୍ଞାନର ଯୁକ୍ତିବୋଧ,ଇତିହାସର ଶିକ୍ଷା ଓ ମନୀଷୀମାନଙ୍କ ଆଦର୍ଶର ଏକ ଅପୂର୍ବ ସମନ୍ବୟ
ଡା.ଦେବୀ ପ୍ରସାଦ ମିଶ୍ର,
ସମୟର ସ୍ରୋତ ଅବିରାମ।କାଳର କପାଳରେ ପ୍ରତ୍ୟେକ ପ୍ରଭାତ ଇତିହାସର ଏକ ନୂଆ ପୃଷ୍ଠା ଲେଖିଯାଏ।କେତେକ ଦିନ ଘଟଣାର ଘନଘଟାରେ ସ୍ମରଣୀୟ,କେତେକ ଦିନ ମନୀଷୀମାନଙ୍କ ସ୍ମୃତିରେ ମହିମାନ୍ୱିତ,ଆଉ କେତେକ ଦିନ ମଣିଷକୁ ନୂଆ ଚିନ୍ତା ଓ ଚେତନାର ଆଲୋକ ଦିଏ।ଅକ୍ଟୋବରର ପ୍ରଥମ ଦିନଟି ଏହି ତିନୋଟିର ଏକ ଅନନ୍ୟ ସମନ୍ୱୟ। ତେଣୁ ଅକ୍ଟୋବର ୧ କେବଳ କ୍ୟାଲେଣ୍ଡରର ଏକ ତାରିଖ ନୁହେଁ;ଏହା ଇତିହାସକୁ ପଢ଼ିବା,ବର୍ତ୍ତମାନକୁ ବୁଝିବା ଓ ଭବିଷ୍ୟତକୁ ଗଢ଼ିବାର ଏକ ଆହ୍ୱାନ।
ବିଶ୍ୱ କ୍ଷେତ୍ରରେ ଆଜି ଆନ୍ତର୍ଜାତୀୟ ବୟୋଜ୍ୟେଷ୍ଠ ବ୍ୟକ୍ତି ଦିବସ।ବୟସ ଶରୀରକୁ ଦୁର୍ବଳ କରିପାରେ, କିନ୍ତୁ ଜୀବନାନୁଭବ ଓ ପ୍ରଜ୍ଞାକୁ ନୁହେଁ।ବୃଦ୍ଧ ପିତାମାତା ଓ ପ୍ରବୀଣମାନେ ଆମ ପରିବାରର ଜୀବନ୍ତ ଇତିହାସ,ପରମ୍ପରାର ବାହକ ଓ ଅନୁଭବର ଅମୂଲ୍ୟ ଭଣ୍ଡାର।ଆଧୁନିକତାର ଦ୍ରୁତ ଗତିରେ ସମ୍ପର୍କର ଉଷ୍ମତା ହ୍ରାସ ପାଉଥିବା ବେଳେ ସେମାନଙ୍କ ପ୍ରତି ସମ୍ମାନ,ସ୍ନେହ ଓ ସୁରକ୍ଷା ଆମର ମାନବିକ କର୍ତ୍ତବ୍ୟ।ଅକ୍ଟୋବର ୧ ବିଶ୍ୱ ଶାକାହାରୀ ଦିବସ ଭାବରେ ମଧ୍ୟ ପାଳିତ ହୁଏ।ଖାଦ୍ୟ କେବଳ ଜୀବନଧାରଣର ଉପାଦାନ ନୁହେଁ;ଏହା ସ୍ୱାସ୍ଥ୍ୟ, ପରିବେଶ ଓ ଜୀବଜଗତ ସହ ଗଭୀର ଭାବେ ସଂପୃକ୍ତ।ପ୍ରକୃତି ପ୍ରତି ସମ୍ମାନ ଓ ଜୀବଜନ୍ତୁଙ୍କ ପ୍ରତି ସହାନୁଭୂତିର ଚେତନା ଏହି ଦିବସ ଆମ ମନରେ ଜାଗ୍ରତ କରେ।ବିଜ୍ଞାନର ଆକାଶରେ ମଧ୍ୟ ଅକ୍ଟୋବର ୧ର ଦୀପ୍ତି ଅନନ୍ୟ।୧୯୫୮ରେ ନାସା ଆନୁଷ୍ଠାନିକ ଭାବେ କାର୍ଯ୍ୟ ଆରମ୍ଭ କରି ମାନବର ମହାକାଶ ଅନ୍ୱେଷଣକୁ ନୂଆ ଦିଗ ଦେଇଥିଲା।ଏହି ଦିନ ଭାରତୀୟ ମୂଳର ବିଶିଷ୍ଟ ଗଣିତଜ୍ଞ ହରିଶ-ଚନ୍ଦ୍ରଙ୍କ ଜନ୍ମଦିନ ମଧ୍ୟ।ପ୍ରତିନିଧିତ୍ୱ ତତ୍ତ୍ୱ ଓ ଲି ଗ୍ରୁପ୍ ସମ୍ପର୍କିତ ତାଙ୍କ ଗବେଷଣା ଗଣିତଜଗତକୁ ସମୃଦ୍ଧ କରିଛି।
ଭାରତ କ୍ଷେତ୍ରରେ ଇତିହାସର ଦର୍ପଣରେ ଦେଖିଲେ ୧୯୫୩ ଅକ୍ଟୋବର ୧ରେ ଆନ୍ଧ୍ର ରାଜ୍ୟର ଗଠନ ଭାରତର ଭାଷାଭିତ୍ତିକ ରାଜ୍ୟ ପୁନର୍ଗଠନର ଏକ ଐତିହାସିକ ଅଧ୍ୟାୟ।ଭାଷା ଓ ସାଂସ୍କୃତିକ ପରିଚୟର ପ୍ରଶାସନିକ ସ୍ୱୀକୃତି ପରବର୍ତ୍ତୀ ରାଜ୍ୟ ପୁନର୍ଗଠନର ପଥକୁ ପ୍ରଶସ୍ତ କରିଥିଲା।ଅନ୍ୟପକ୍ଷରେ,୧୯୪୯ର ଏହି ଦିନରେ ଚୀନ ଗଣପ୍ରଜାତନ୍ତ୍ରର ପ୍ରତିଷ୍ଠା ଘୋଷିତ ହୋଇ ବିଶ୍ୱ ରାଜନୀତିରେ ଏକ ନୂଆ ଅଧ୍ୟାୟର ଆରମ୍ଭ ହୋଇଥିଲା।
ପରିଶେଷରେ ଏହି ସମସ୍ତ ଘଟଣା ଏକାଠି ହୋଇ ଆମକୁ ଏକ ଚିରନ୍ତନ ସତ୍ୟ ଶିଖାଏ ଯେ ପରିବର୍ତ୍ତନ ହିଁ ଜୀବନର ନିୟମ,କିନ୍ତୁ ମୂଲ୍ୟବୋଧ ହିଁ ତାହାର ଦିଗଦର୍ଶକ।ଅତୀତ ଦିଏ ଅନୁଭବ,ବର୍ତ୍ତମାନ ଦିଏ କର୍ତ୍ତବ୍ୟ ଏବଂ ଭବିଷ୍ୟତ ଆମଠାରୁ ଆଶା କରେ ସୃଜନଶୀଳ ସଂକଳ୍ପ।ତେଣୁ,ଅକ୍ଟୋବରର ପ୍ରଥମ ପ୍ରଭାତ ହେଉ ଆତ୍ମସମୀକ୍ଷାର ପ୍ରଭାତ।ବୟୋଜ୍ୟେଷ୍ଠଙ୍କ ଅନୁଭବ,ବିଜ୍ଞାନର ଯୁକ୍ତିବୋଧ, ଇତିହାସର ଶିକ୍ଷା ଓ ମନୀଷୀମାନଙ୍କ ଆଦର୍ଶକୁ ସାଥୀ କରି ଆମେ ଗଢ଼ିବା ଏକ ମାନବିକ,ସୁସ୍ଥ,ପ୍ରଗତିଶୀଳ ଶାନ୍ତିପୂର୍ଣ୍ଣ ସହାବସ୍ଥାନ ଭିତ୍ତିକ ବିଶ୍ୱ ସମାଜ।କାରଣ କାଳର କପାଳରେ ଆଜି ଆମେ ଯାହା ଲେଖିବୁ, ଆସନ୍ତାକାଲି ତାହା ହିଁ ଇତିହାସ ହେବ।
ଡା.ଦେବୀ ପ୍ରସାଦ ମିଶ୍ର,
