ଜୁନାଗଡ଼,୩/୬(ମ ନି ସ) କଳାହାଣ୍ଡି ଜିଲ୍ଲା ଜୁନାଗଡ଼ ବ୍ଲକ ଅନ୍ତର୍ଗତ ଦୁନ୍ଦେଲମାଲ, ଦେଦର ଓ ବାଙ୍କପଲାସ ଏକ ଆଦିବାସୀ ଅଧ୍ୟୁଷିତ ପଞ୍ଚାୟତ ଅଟେ । ଏହି ୩ ପଞ୍ଚାୟତରେ କୌଣସି ଜଳସେଚନର ବ୍ୟବସ୍ଥା ନାହିଁ । କେବଳ ବର୍ଷା ଉପରେ ସମ୍ପୂର୍ଣ୍ଣ ଭରସା ରଖି ଚାଷ କରିଥାନ୍ତି ।ଜଳସେଚନ ସୁବିଧା ନ ଥିବାରୁ ଏ ଅଂଚଳରେ ମେଗା ଉଠା ଜଳସେଚନ କରି ଚାଷୀଙ୍କୁ ସୁବିଧା ଯୋଗାଇ ଦେବା ଦ।ବିନେଇ ସେ ଅଂଚଳର ଚାଷୀମାନେ ବିକ୍ଷୋଭ କରି ତହସିଲଦାରଙ୍କୁ ଦାବି ପତ୍ର ଦେଇଥିଲେ।ଗତ ୨୦୨୧ ମସିହାରେ ସ୍ଵଳ୍ପବର୍ଷା କାରଣରୁ ଭୟଙ୍କର ମରୁଡି ସୃଷ୍ଟି ହୋଇଥିଲା । ଯାହା ଫଳରେ ଏହି ତିନି ପଞ୍ଚାୟତରେ ଫସଲ ସମ୍ପୂର୍ଣ୍ଣ ନଷ୍ଟ ହୋଇଥିଲା । ମରୁଡି ସମ୍ପର୍କରେ କୃଷି ବିଭାଗକୁ ମଧ୍ୟ ଅବଗତ କରାଯାଇଥିଲା ଓ ତଦନ୍ତ ମଧ୍ୟ କରିଥିଲେ ଏବଂ ନଷ୍ଟ ହୋଇଥିବା ଫସଲର କ୍ଷତିପୂରଣ ପ୍ରଦାନ କରିବାର ବ୍ୟବସ୍ଥା କରିବୁ ବୋଲି ପ୍ରଶାସନ ପକ୍ଷରୁ ପ୍ରତିଶ୍ରୁତି ଦେଇଥିଲେ । ହେଲେ ଆଜକୁ ଏକ ବର୍ଷ ବିତିଯାଇଥିଲେ ସୁଦ୍ଧା ଆଜିପର୍ଯ୍ୟନ୍ତ କୌଣସି କ୍ଷତିପୂରଣ ମିଳି ପାରି ନାହିଁ । ଏମାନଙ୍କ ମୁଖ୍ୟ ଜୀବିକା ହେଉଛି ଚାଷ, ମରୁଡି କାରଣରୁ ଲୋକେ ଗାଁ ଛାଡି ଦାଦନ ଖଟିବାକୁ ପଳାୟନ ହେଉଛନ୍ତି । ଚେକଡ୍ୟାମ ନିର୍ମାଣ କରି ଉଠାଜଳସେଚନର ବ୍ୟବସ୍ଥା କରି ମରୁଡ଼ିର ସ୍ଥାୟୀ ପ୍ରତିକାର କରାଯାଉ । ତେଣୁ ବାଙ୍କପଳାଶ ଠାରେ ଏକ ମେଗା ଉଠାଜଳସେଚନ ପ୍ରକଳ୍ପ ନିର୍ମାଣ କରିବାର ସୁ ବ୍ୟବସ୍ଥା କରିବାକୁ ଦାବୀ କରିଛନ୍ତି । ଅନ୍ୟ ପକ୍ଷରେ ଗତ ୨୦୨୧ ମସିହାରେ ହୋଇଥିବା ମରୁଡି କ୍ଷୟକ୍ଷତିରେ ୩ ଟି ପଞ୍ଚାୟତର ଚାଷୀଙ୍କୁ ସହାୟତା ଯୋଗାଇ ଦେବା ଦାବୀ କରିଥିଲେ।ପରେ ମୁଖ୍ୟମନ୍ତ୍ରୀଙ୍କ ଉଦେଶ୍ୟରେ ତହସିଲଦାରଙ୍କୁ ଏକ ଦାବିପତ୍ର ପ୍ରଦାନ କରିଥିଲେ । ଏହି ବିକ୍ଷୋଭରେ ଚାଷୀ ହରେକୃଷ୍ଣ ମାଝୀ, ଉଜଲ ବେମାଲ, ବିଜୟ କୁମାର ଯାନୀ, ଚାଷୀନେତା ବିଶ୍ୱନାଥ କର, ଦାମୋଦର ବେହେରା, ଦୁର୍ଯ୍ୟୋଧନ ମାଝୀ, ହୃଦାନନ୍ଦ ମାଝୀ, ବାଲେଶ୍ଵର ମାଝୀ, ଖଗେଶ୍ବର ମାଝୀ, ହରିଶ୍ଚନ୍ଦ୍ର ମାଝୀ ସମେତ ୩ ଟି ପଞ୍ଚାୟତର ଶତାଧିକ ଚାଷୀ ସାମିଲ ହୋଇଥିଲେ ।
ଜୁନାଗଡ ରୁ ନରେନ୍ଦ୍ର ଖିତି ଙ୍କ ରିପୋର୍ଟ।