କୋକସରା,୬ା୬- ( ମ ନି ସ ) କଳାହାଣ୍ଡି ଜିଲ୍ଲା କୋକସରା ବ୍ଲକ ଗମ୍ଭାରିଗୁଡା ଗ୍ରାମରେ ୨୦ଟି ମେଣ୍ଢା ଚରୁଥିବା ବେଳେ ଆଜି କୁକୁର ପଲ ଆକ୍ରମଣ କରି ମାରି ଦେଇଥିବା ଜଣାପଡିଛି । ସୂଚନା ଅନୁସାରେ, ସୋମବାର ସକାଳେ ଗମ୍ଭାରିଗୁଡା ଗ୍ରାମର ମେଣ୍ଢା ଚରାଳି ସୋମେଶ୍ୱର ଶବର ପ୍ରତି ଦିନ ଭଳି ନିଜ ମେଣ୍ଢା ସହିତ ଗ୍ରାମର ମେଣ୍ଢା ଚାଷୀ ବନିତା ଶବର, ଜୟନ୍ତୀ ପଟେଲ ଓ ପ୍ରକାଶ ଶବର ୨୦ ଟି ମେଣ୍ଢା କୁ ସକାଳୁ ଗାଁ ନିକଟସ୍ଥ ଚିଙ୍ଗୁଡ଼ିବନ୍ଧ ପାଖରେ ଚରାଇବାକୁ ନେଇଥିଲେ ।
ହେଲେ ମେଣ୍ଢା ପଲକୁ ୧୫ ରୁ ୨୦ ଟି ବୁଲା କୁକୁର ଗୋଡ଼ାଇ ଗୋଡ଼ାଇ ଆକ୍ରମଣ କରି ମାରି ଦେଇଥିଲେ । ଏମିତିକି ମେଣ୍ଢା ଚରାଳି ସୋମେଶ୍ୱର ଶବର ଙ୍କୁ ମଧ୍ୟ କୁକୁର ପଲ ଆକ୍ରମଣ କରିବାକୁ ଗୋଡାଇଥିଲେ । ହେଲେ କୌଶଲ କ୍ରମେ ସୋମେଶ୍ୱର ଜମି ହୁଡାରେ ଥିବା ଏକ ଗଛରେ ଚଢି ଯାଇ ନିଜ ଜୀବନ ରକ୍ଷା କରିଥିଲେ । 
ମେଣ୍ଢା ଚରାଳି ଚିତ୍କାର କରି ଗ୍ରାମବାସୀ ଙ୍କୁ ଡାକ ଦେବାରୁ ଚାଷଜମି ରେ କାମ କରୁଥିବା କିଛି ଲୋକ ଦୌଡି ଆସି କୁକୁରଙ୍କୁ ଘଉଡାଇଥିଲେ । ତେବେ ଏହି ସମୟ ମଧ୍ୟରେ ସମସ୍ତ ମେଣ୍ଢା ଙ୍କ ମୃତ୍ୟୁ ହୋଇ ସାରିଥିଲା । ଏହା ବ୍ୟତୀତ ନିକଟସ୍ଥ ଓଲମା ଗ୍ରାମରେ ମଧ୍ୟ ଏହି କୁକୁର ପଲ ଛେଳି ଓ ମେଣ୍ଢା କୁ ଆକ୍ରମଣ କରିଥିବା ସୁଚନା ମିଲିଛି ।
ମେଣ୍ଢା ଚାଷ କରି ନିଜ ପରିବାର ପ୍ରତିପୋଷଣ କରୁଥିବା ଗମ୍ଭାରୀଗୁଡା ଗ୍ରାମର ଗରିବ ମେଣ୍ଢା ଚାଷୀ ମାନେ କ୍ଷତିପୂରଣ ପାଇଁ ପ୍ରଶାସନ ପାଖରେ ଦାବି କରିଛନ୍ତି । ଏନେଇ କୋକସରା ପ୍ରାଣୀ ଚିକିତ୍ସାଳୟ ଡାକ୍ତର ପ୍ରସନ୍ନ କୁମାର ଙ୍କୁ ପଚାରିବାରୁ ସେମିତି କିଛି କ୍ଷତିପୂରଣ ପାଇଁ ବ୍ୟବସ୍ଥା ନାହିଁ ବୋଳି କହିଛନ୍ତି ।
