ଆସ ଗୋ ମୌସୁମୀ
ମମତା ସାହୁ
ଆସ ଗୋ ମୌସୁମୀ ନ କରି ଉଛୁର
ମେଘ ପାଲିଙ୍କିରେ ବସିକି ଚଞ୍ଚଳ।।
ଅବନୀ ନିଦାଘେ ହୁଏ ହନ୍ତସନ୍ତ
ଅଧିରେ ଡାକୁଛି କର ମୋତେ ଶାନ୍ତ।।
ଭିଜାଇ ଦିଅ ଗୋ ସନ୍ତାପିତ ଧରା
ବରଷା ପୁଲକେ ଶିହରଉ ଧରା।।
ଆସ ଗୋ ମୌସୁମୀ ପାଦ ଝୁମି ଝୁମି
ସ୍ବାଗତ ଜଣାଏ ଶୁଷ୍କ ଧରା ରାଣୀ।।
ପୋଖରି ଗାଡିଆ ନଦୀ ନିର୍ଝରିଣୀ
ଯେତେ ଜଳ ଧାର ବିକଳେ ଡାକନ୍ତି।।
ପଶୁପକ୍ଷୀ ସାରା ଏ ଜୀବ ଜଗତ
ତରୁଲତା ତୃଣ ସଭିଏଁ ତୃଷାର୍ତ୍ତ।।
ଶୁଷ୍କଧରା ତୁମେ କର ପଲ୍ଲବୀତ
ନାଚିବ ମୟୂରୀ ରାଗିଣୀ ସଙ୍ଗୀତ।।
ଶୀତଳ ବାଆକୁ ଶୁଭୁ ଘଡଘଡି
ବିଜୁଳି ଚମକୁ ସଦା ରହି ରହି।।
କଳା ବଉଦର ମାଳାରେ ଭାଷଇ
ଧିରେ ଧିରେ ବର୍ଷା ଦେଗୋ ତୁହାଇ।।
ମହକିବ ମାଟି ପହିଲି ବର୍ଷାରେ
ଭୁରୁ ଭୁରୁ ବାସ୍ନା ଧରଣୀ ହସେରେ।।
ଆସ ଗୋ ମୌସୁମୀ ଶାନ୍ତ ସୀମନ୍ତିନୀ
ତବ ଆଗମନେ ହରଷୁ ଧରଣୀ।।
ମମତା ସାହୁ
ଗାଈଗାଁ,କଳାହାଣ୍ତି
