ଭିଜା ଭିଜା ସ୍ମୃତି
ଭିଜା ଭିଜା ସ୍ମୃତିମାନ ସବୁ
ଅଲେଖା ଗପଟିଏ ସାଇତା
ଅଦେଖା ସ୍ବପ୍ନ ସିଏ ସ୍ମୃତିର
ପିଲାଦିନ କେତେ ଧୂଳିଖେଳ
ମୁକ ସାକ୍ଷୀ ହୋଇ ରହିଥାଏ
ଭାବନାର ଚିକ୍ ମିକ୍ ଭରା
ଝଲମଲ ତାଜମହଲ ସିଏ
ଜ୍ୟୋସ୍ନାଭିଜା ଶୀତ ସନ୍ଧ୍ୟା
ସମୁଦ୍ରବେଳାର ମିନାର ସିଏ ।
ଦଗ୍ଧ ହୃଦୟର ଶୀତଳତାର
ସ୍ପର୍ଶର ଶୁଭାକାଂକ୍ଷୀ ସିଏ
ହୃଦୟର କେଉଁ ଏକ ନିଭୃତ
କୋଠରୀର କରାଘାତ
କରୁଥିବା ଅଜଣା ଅତିଥିଟିଏ ।
ସୁଖ,ଦୁଃଖ,ହସ,ଲୁହ ଭରା
ପ୍ରେମ ପ୍ରତାରଣାର ମୁକ
ତଥା ନିରବଦ୍ରଷ୍ଟା ସାକ୍ଷୀଟିଏ
ସ୍ମୃତି ,ଅପରାହ୍ନର ମଳୟ ସିଏ ।