ଆସନ୍ତୁ ଆଚାର୍ଯ୍ୟ ଦ୍ରୋଣଙ୍କ ଜନ୍ମ ରହସ୍ଯ ବିଷୟରେ ଜାଣିବା
ମହାଭାରତ ଯୁଦ୍ଧରେ ବଡ଼ ବଡ଼ ବୀର ଯୋଦ୍ଧା ଯୁଦ୍ଧ କରିଥିବା ଆପଣ ଜାଣିଥିବେ । ସେମାନଙ୍କ ମଧ୍ୟରୁ ଜଣେ ଥିଲେ ଦ୍ରୋଣାଚାର୍ଯ୍ଯ । ଦ୍ରୋଣାଚାର୍ଯ୍ଯ କୌରବ ଏବଂ ପାଣ୍ଡବ ଦୁହିଁଙ୍କର ଗୁରୁ ଥିଲେ । ଦ୍ରୋଣାଚାର୍ଯ୍ଯଙ୍କର ସବୁଠାରୁ ପ୍ରିୟ ଶିଷ୍ୟ ଥିଲେ ଅର୍ଜୁନ । ଗୁରୁ ଦ୍ରୋଣ ଜଣେ ମହାନ୍ ଯୋଦ୍ଧା ହୋଇଥିଲେ ମଧ୍ୟ ତାଙ୍କ ଜନ୍ମ ବୃତ୍ତାନ୍ତ ହେଉଛି ସଵୁଠାରୁ ଆଶ୍ଚର୍ଯ୍ୟଜନକ । ଗୁରୁ ଦ୍ରୋଣାଚାର୍ଯ୍ଯଙ୍କ ପିତା ହେଉଛନ୍ତି ମହର୍ଷି ଭରଦ୍ବାଜ । ହେଲେ ବିନା ମା’ ରେ ଜନ୍ମ ଭୂମିଷ୍ଠ ହୋଇଥିଲେ ଭାରତର ଏହି ମହାନ୍ ଗୁରୁ ।
ଥରେ ଦ୍ରୋଣଙ୍କର ପିତା ଋଷି ଭରଦ୍ବାଜ କିଛି ଋଷିମାନଙ୍କ ସହିତ ମିଶି ଗଙ୍ଗାକୂଳରେ ଏକ ବଡ଼ ଯଜ୍ଞ କରୁଥିଲେ । ସଵୁଦିନ ପରି ଭରଦ୍ବାଜ ଅନ୍ୟ ଋଷି କୁମାର ମାନଙ୍କ ସହିତ ଗଙ୍ଗାରେ ସ୍ନାନ କରିବାକୁ ଯାଆନ୍ତି । ଏକଦା ସେ ସ୍ନାନ କରୁଥିବା ବେଳେ ସ୍ବର୍ଗର ଜଣେ ସୁନ୍ଦରୀ ଅପ୍ସରାଙ୍କୁ ଦେଖି ବିଚଳିତ ହୋଇ ପଡିଥିଲେ ଭରଦ୍ବାଜ । ଗଙ୍ଗାରୁ ସ୍ନାନ ସାରି ବାହାରୁ ଥିବା ସମୟରେ ଓଦା ବସ୍ତ୍ରରେ ଅପୂର୍ବ ସୁନ୍ଦର ଦିଶୁଥିବା ଏହି ଅପ୍ସରାଙ୍କୁ ଦେଖି ଋଷି ଭରଦ୍ବାଜଙ୍କ ମନରେ କାମଭାବନା ଜାଗ୍ରତ ହୋଇଥିଲା । ମନରେ ଜାତ ହୋଇଥିବା କାମନା ଯୋଗୁ ତାଙ୍କର ଶୁକ୍ର ସ୍ଖଳିତ ହୋଇଥିଲା । ଏହାପରେ ଋଷି ଭରଦ୍ବାଜ ସେହି ଶୁକ୍ରକୁ ପତ୍ରରେ ତିଆରି ହୋଇଥିବା ଏକ ଠୋଲା(ସଂସ୍କୃତରେ ଯାହାକୁ ଦ୍ରୋଣ କୁହାଯାଏ)ରେ ବୁଦାମୂଳେ ରଖି ଦେଇଥିଲେ । ଏହାପରେ ଋଷି ମାନଙ୍କ ସହିତ ସ୍ନାନ କରି ପୁନଶ୍ଚ ଯଜ୍ଞ ସ୍ଥଳକୁ ଫେରି ଆସିଥିଲେ ।
ଏହିପରି ଯଜ୍ଞ ସମାପ୍ତ ହେବାପରେ ମହର୍ଷି ଭରଦ୍ବାଜ ନିଜ ଆଶ୍ରମକୁ ଆସି ରହିଥିଲେ । ଏହାର କିଛି ଦିନ ବିତିଯିବା ପରେ ତପୋବଳରେ ଋଷି ଭରଦ୍ବାଜଙ୍କୁ ଉକ୍ତ ଘଟଣା ସମ୍ପର୍କରେ କିଛି ଜ୍ଞାତ ହୋଇଥିଲା । ସେ ଆଶ୍ରମରୁ ବାହାରି ଗଙ୍ଗାନଦୀ କୂଳରେ ଥିବା ସେହି ସ୍ଥାନକୁ ଯାଇଥିଲେ, ଯେଉଁଠାରେ ସେ ନିଜ ଶୁକ୍ର ଧାରଣ କରିଥିବା ପତ୍ର ଠୋଲାକୁ ରଖିଥିଲେ । ସେହି ଠୋଲାରେ ଏକ ଶିଶୁପୁତ୍ର ଖେଳୁଛି । ଅପୂର୍ବ ତେଜମୟ ଦିଶୁଥିବା ଶିଶୁଟିକୁ ଭରଦ୍ବାଜ ନିଜ ଆଶ୍ରମକୁ ନେଇ ଆସିଥିଲେ । ପରବର୍ତ୍ତୀ କାଳରେ ସେହି ଶିଶୁ ଭରଦ୍ବାଜଙ୍କର ପୁତ୍ର ଦ୍ରୋଣାଚାର୍ଯ୍ଯ ଭାବେ ପ୍ରସିଦ୍ଧି ଲାଭ କରିଥିଲେ ।
ମାତୃ ଗର୍ଭରୁ ଜନ୍ମ ନ ହୋଇ ଏକ ପତ୍ର ଠୋଲାରେ ଜନ୍ମ ଗ୍ରହଣ କରିଥିବାରୁ ତାଙ୍କର ନାମକରଣ ଦ୍ରୋଣ ହୋଇଥିଲା । ସେ ପରବର୍ତ୍ତୀ ସମୟରେ ଭଗବାନ ପରଶୁରାମଙ୍କ ଶିଷ୍ଯତ୍ବ ଲାଭ କରି ସମସ୍ତ ଦିବ୍ୟ ଅସ୍ତ୍ରଶସ୍ତ୍ରର ଜ୍ଞାନ ପ୍ରାପ୍ତ କରିଥିଲେ ।।