ମୋ କାଳିଆ ପ୍ରେମରେ
ଗାଁ ପୋଖରୀକୁ ସ୍ନାନକରି ଗଲେ
ମହୋଦଧି ମୋତେ ଲାଗେ
ମୋ ଗାଁ ଦାଣ୍ଡର ଗାଁ ଧୂଳିକୁ ମୁଁ
ଶରଧା ବାଲି ତ ଭାବେ ||
ମୋ ଭଙ୍ଗା ଚାଳିଆ ଶ୍ରୀମନ୍ଦିର ପରି
ବସି ଗାଏ ଜଗା ନାମ
ବାଡ଼ି ଅଗଣାରେ ଲଗାଏ ତୁଳସୀ
ମୋ ମନେ କାଳିଆପ୍ରେମ ||
ଅନ୍ତରରେ ଭାବି କାଳିଆ ମୂରତି
ଲିମ୍ବକାଷ୍ଠେ ଆଙ୍କେ ଚିତା
ମୋ ମାଟି ପିଣ୍ଡିକୁ ରତ୍ନବେଦୀ ଭାବି
ପଢେ ଭାଗବତ ଗୀତା ||
ଘର ରାନ୍ଧଣା ମୋ ଅବଢ଼ା ବାସେରେ
ଆନନ୍ଦେ ଦିଏ ମୁଁ ଖାଇ
ନିଦ ତ ଲାଗିଲେ ମୋ ଘର ଅଗଣା
ବାଇଶି ପାବଛ ହୋଇ ||
ପଡିଶା ମୋର ଯେ ପଣ୍ଡା ସୁଆଁର ଲୋ
ସହଯୋଗ ସେ କରନ୍ତି
ତନ ମନ ମୋର କାଳିଆ ପ୍ରେମରେ
ହଜିଛି ବୋଲି କୁହନ୍ତି ||
ସହଜେ ଦାରିଦ୍ରେ ଜୀବନ ମୋ ବିତେ
ବିକଳାଙ୍ଗ ମୁଁ ସଂସାରେ
ସତରେ କାଳିଆ ଅଭାବି ଜୀବନେ
ଭାବର ଅମୃତ ଝରେ ||
ଯାଇ ପାରୁନାହିଁ ତୋର ଶ୍ରୀକ୍ଷେତ୍ରକୁ
ଗାଁ ମା” ମୋ ଶ୍ରୀଦେବୀ
ଭାବର ଠାକୁର ତୋ ଦିବ୍ୟରୂପକୁ
ନୀତି ଦେଖେ ଭାବେ ଭାବି ||
ପ୍ରତାପ କେଶରୀ ବେହେରା
ଠିକଣା :- ମୋଟ , ବ୍ରହ୍ମଗିରି , ପୁରୀ