ଲାଞ୍ଜିଗଡ଼,୨୬/୦୭(ମନିସ)-ପଡ଼ୋଶୀଙ୍କ ଘରକୁ ପିଠା ତିଆରିରେ ସାହାଯ୍ୟ କରିବାକୁ ଯାଇଥିବା ନିଜ ସ୍ତ୍ରୀଙ୍କୁ ଗାଳିଗୁଲଜ କରି ଗରମ ତେଲ ଥିବା କଡ଼େଇକୁ ଲାତ ମାରିବାରୁ ଏଥିରେ ଦୁଇଜଣ ମହିଳା ଗୁରୁତର ହୋଇଛନ୍ତି ! ଏପରି ଏକ ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଥିବାବେଳେ ଏଇ ଘଟଣାରେ ଜଣେ ଗିରଫ ହୋଇ କୋର୍ଟଚାଲାଣ ହୋଇଛି ! ପୁଲିସ ସୂତ୍ରରୁ ମିଳିଥିବା ସୂଚନାନୁଯାୟୀ, ଲାଞ୍ଜିଗଡ଼ ଥାନା ମସ୍କାପଦର ଗାଁର ଶରତ ନାଏକ ଓ ମଧୁସୂଦନ ହରିଜନଙ୍କ ମଧ୍ୟରେ କୌଣସି କାରଣରୁ ଅପଡ଼ ଥିଲା ! ତେବେ ମଧୁ ଘରେ ନଥିବାବେଳେ ତାଙ୍କ ସ୍ତ୍ରୀ ମିଲ୍କୀ ହରିଜନଙ୍କୁ ଶରତଙ୍କ ସ୍ତ୍ରୀ ଅନୀତା ନାଏକ ତାଙ୍କ ଘରକୁ ପିଠା ତିଆରି କରିବାରେ ସାହାଯ୍ୟ କରିବାକୁ ଡାକିନେଇଥିଲେ ! 
ଏଇ ସମୟରେ ମଧୁ ଘରକୁ ଫେରି ନିଜ ସ୍ତ୍ରୀ ଘରେ ନଥିବା ଦେଖି ଖୋଜାଖୋଜି କରିବାରୁ ସେ ଶରତଙ୍କ ଘରେ ଥିବା ଦେଖି ହଠାତ୍ ରାଗିଯାଇ ଗାଳିଗୁଲଜ କରିଥିଲେ ! ଏହାକୁ ଶରତ ବିରୋଧ କରିବାରୁ ମଧୁ ଉତ୍ତ୍ୟକ୍ତ ହୋଇ ମାରଧର କରିବା ସହିତ ପିଠା ତିଆରି କରୁଥିବା ଗରମ ତେଲ କଡ଼େଇକୁ ଗୋଇଠା ମାରିଥିଲେ ! ଯାହାଫଳରେ ପିଠା ତିଆରି କରୁଥିବା କଡ଼େଇରୁ ଗରମ ତେଲ ପଡ଼ି ଅନୀତା ଗୁରୁତର ଆହତ ହୋଇଥିବାବେଳେ ଅନ୍ୟ ଜଣେ ସରୋଜିନୀ ନାଏକ ମଧ୍ୟ ଆହତ ହୋଇଥିଲେ ! ଉଭୟଙ୍କୁ ଗୁରୁତର ଭାବେ ପ୍ରଥମେ ଲାଞ୍ଜିଗଡ଼ସ୍ଥିତ ବେଦାନ୍ତ ହସ୍ପିଟାଲରେ ଭର୍ତ୍ତି କରାଯାଇଥିବାବେଳେ ସେଠାରୁ ଭବାନୀପାଟଣା ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି ! ଏ ନେଇ ଶରତ ଲାଞ୍ଜିଗଡ଼ ଥାନାରେ ଅଭିଯୋଗ କରିବା ପରେ ପୁଲିସ ପକ୍ଷରୁ ମଧୁଙ୍କୁ ଗିରଫ କରି ଆଜି କୋର୍ଟଚାଲାଣ କରାଯାଇଛି ! ଏନେଇ ଲାଞ୍ଜିଗଡ଼ ଥାନାରେ କେସ୍ ନଂ ୪୩/୨୦୨୨ରେ ଏକ ମାମଲା ରୁଜୁ ହୋଇଥିବାବେଳେ ଥାନାଧିକାରୀ ସତ୍ୟାନନ୍ଦ ପାତ୍ରଙ୍କ ତତ୍ତ୍ବାବଧାନରେ ଏସ୍ଆଇ ବିଳାସିନୀ ଭୋଇ ଘଟଣାର ତଦନ୍ତ କରୁଛନ୍ତି !
ଲାଞ୍ଜିଗଡ଼ ରୁ ସୁଶୀଲ କୁମାର ବାଗ ଙ୍କ ରିପୋର୍ଟ
