ବାଲେଶ୍ଵର,୨୬/୭/୨୨- ମୁଖ୍ୟତଃ ଗଦ୍ୟ ସାହିତ୍ୟର ଉନ୍ନତି ପାଇଁ ବାଲେଶ୍ଵର ଜିଲ୍ଲା ଖଇରା ଠାରେ ଗଢି ଉଠିଛି ମୋ ଅନୁଷ୍ଠାନ ସାହିତ୍ୟ ଅନୁଷ୍ଠାନ । ବିଭିନ୍ନ ପ୍ରତିଯୋଗିତା ମାଧ୍ୟମରେ ସାହିତ୍ୟର ଉନ୍ନତି ପାଇଁ ଅନୁଷ୍ଠାନ ସଦାସର୍ବଦା ଜାଗ୍ରତ ପ୍ରହରୀ ଭଳି କାର୍ଯ୍ୟ କରୁଅଛି । କିନ୍ତୁ ବେଳେବେଳେ କବିତା ପ୍ରତିଯୋଗିତା ମଧ୍ୟ ହୋଇଥାଏ । ରାଜ୍ୟର ପ୍ରାୟ ପ୍ରତ୍ୟେକ ଜିଲ୍ଲାରୁ କବି କବୟିତ୍ରୀ ମାନେ ପ୍ରତିଯୋଗିତା ମୂଳକ କାର୍ଯ୍ୟକ୍ରମରେ ଅଂଶ ଗ୍ରହଣ କରିଥାଆନ୍ତି । ସେହି ପରିପ୍ରେକ୍ଷୀରେ ରାକ୍ଷୀ ପୂର୍ଣ୍ଣିମା ଉପଲକ୍ଷେ ଗତ ତା ୨୪/୭/୨୨ ରିଖ ରବିବାର ଦିନ କବିତା ପ୍ରତିଯୋଗିତା ଅନୁଷ୍ଠିତ ହୋଇଥିଲା ।
ଯାହାର ଶୀର୍ଷକ ଥିଲା- ରାକ୍ଷୀ ରହିଲା ସାକ୍ଷୀ । ଏଥିରେ ରାଜ୍ୟର ବିଭିନ୍ନ ଜିଲ୍ଲାରୁ କବି କବୟିତ୍ରୀ ମାନେ ଅଂଶ ଗ୍ରହଣ କରି ନିଜକୁ ଧନ୍ଯ ମନେ କରିଥିଲେ । ସେଥିମଧ୍ୟରୁ କଟକ ଜିଲ୍ଲା ଚୌଦ୍ୱାର ଅଞ୍ଚଳର କବୟିତ୍ରୀ ରଶ୍ମିତା ଧଳ ପ୍ରଥମ ସ୍ଥାନ ଅଧିକାର କରି ଥିବାବେଳେ ଝାରସୁଗୁଡା ଜିଲ୍ଲାର କବୟିତ୍ରୀ ପ୍ରିୟଦର୍ଶିନୀ ସାମନ୍ତରାୟ ଦ୍ବିତୀୟ ଓ ଜଗତସିଂହପୁର ଜିଲ୍ଲାର କବୟିତ୍ରୀ ସଂହିତା ଜେନା ତୃତୀୟ ସ୍ଥାନ ଅଧିକାର କରି ସନ୍ତୁଷ୍ଟ ହୋଇଛନ୍ତି । କବିତା ଗୁଡିକୁ ସମୀକ୍ଷା କରିଥିଲେ ବାଲେଶ୍ଵର ସ୍ଥିତ ବାଲିଆ ଶିଶୁ ମନ୍ଦିର ଆଚାର୍ଯ୍ୟା ତଥା ଜିଲ୍ଲାର ଜଣେ ସୁ-ନାରୀକବି ତାନଶ୍ରୀ ପାଣିଗ୍ରାହୀ । ଶ୍ରୀମତୀ ପାଣିଗ୍ରାହୀଙ୍କ ସମୀକ୍ଷାକୁ ଆଧାର କରି ଅନୁଷ୍ଠାନ ଫଳାଫଳ ଘୋଷଣା କରିଛି ବୋଲି ଅନୁଷ୍ଠାନର ପ୍ରତିଷ୍ଠାତା ଓ ସମ୍ପାଦକ ନରେନ୍ଦ୍ର ପ୍ରସାଦ ବେହେରା ଗଣମାଧ୍ୟମକୁ ସୂଚନା ପ୍ରଦାନ କରିଛନ୍ତି । ଅନ୍ୟ ଅଂଶ ଗ୍ରହଣକାରୀଙ୍କ ମଧ୍ୟରେ ସବିତା ଶତପଥୀ, ବାସନ୍ତୀ ଲତା ଜେନା ଓ ବଳରାମ ଜେନାଙ୍କ ସମେତ ୩୦ ରୁ ଉର୍ଦ୍ଧ୍ବ କବି କବୟିତ୍ରୀ ସାମିଲ ଥିଲେ ।।ବାଲେଶ୍ଵରରୁ ନରେନ୍ଦ୍ର ପ୍ରସାଦ ବେହେରାଙ୍କ ରିପୋର୍ଟ
