ଡାବୁଗାଁ, ୧/୮– ଚାଷ କାମ ଯାହାର କି ଆନନ୍ଦ ତାହାର ସିଏ ପରା ଯୋଗାଉଛି ଦୁନିଆକୁ ଆହାର | ଦିନେ ଏହି ଚାଷ କାର୍ଯ୍ୟ ପାଇଁ ଚାଷୀ ସଭିଙ୍କ ପାଖରେ ଆଦର ପାଉଥିଲା | ଦିନ ଥିଲା ଗ୍ରାମାଞ୍ଚଳର ଲୋକେ ଅନ୍ୟ କାର୍ଯ୍ୟ ଅପେକ୍ଷା ଚାଷ କାର୍ଯ୍ୟ କରିବା ପାଇଁ ଅତ୍ୟନ୍ତ ଆଗଭର ହେଉଥିଲେ | ବିଭିନ୍ନ କାରଣରୁ ଧୀରେ ଧୀରେ ଏବେ ଚାଷ କାମ ବନ୍ଦ ହେବାକୁ ଗଲାଣି | ପୂର୍ବ ରୁ ଚାଷ କରାଯାଉଥିବା ପ୍ରଣାଳୀ ବଦଳାଇ ନୂତନ ପଦ୍ଧତିରେ ଚାଷ କରି ଚାଷୀ ଅଧିକ ଉପାର୍ଜନ କରିବା ପାଇଁ ଉଦ୍ୟମ ଆରମ୍ଭ କରିଛି | ନବରଙ୍ଗପୁର ଭଳି ଆଦିବାସୀ ବହୁଳ ଅଞ୍ଚଳରେ ଚାଷୀ ମୁଖ୍ୟତଃ ଖରିଫ ଓ ରବି ଋତୁରେ ଧାନଚାଷ କରିଥାନ୍ତି | ଏବେ ଏହି ଚାଷ କାମ ବାଟବଣା ହୋଇଥିବା ବେଳେ ଚାଷ ର ଉପାୟ ମଧ୍ୟ ବଦଳିବାରେ ଲାଗିଛି | 
ବର୍ତମାନ ହଳରେ ଏବେ ଆଉ ପ୍ରାୟ କେହି ଚାଷ କରୁନଥିବା ବେଳେ ପୂର୍ବ ଭଳି ରୁଆ ବୁଣା ସମୟରେ ଚାଷୀ ମୁହଁରୁ ହୁଳହୁଳି, ହଳିଆ ଗୀତ ଆଉ ଶୁଣିବାକୁ ମିଳୁନାହିଁ | ପୂର୍ବରୁ ଚାଷୀ ଚାଷ ପାଇଁ ଜମିରେ ହଳ ଲଙ୍ଗଳ ବ୍ୟବହାର କରୁଥିଲେ | କିନ୍ତୁ ବର୍ତମାନ ସମୟରେ ଯୁଗ ଆଗକୁ ବଢିବା ଭଳି ଚାଷୀ ଚାଷ ପାଇଁ ଟ୍ରାକ୍ଟର ପାୱାରଟିଲର ବ୍ୟବହାର କରୁଛି | ମାସ ମାସ ଧରି ଚାଲୁଥିବା କାମ ଏବେ କମ ଦିନରେ ଶେଷ ହୋଇଯାଉଛି | ପ୍ରତି ଗାଁ ରେ ପୂର୍ବେ ଘରେ ଘରେ ଚାଷ ଜମି ପାଇଁ ବଳଦ ଓ ପୋଢ ପାଳନ କରାଯାଉଥିଲା | ଏପରିକି କିଛି ଧନୀ ଶ୍ରେଣୀର ଚାଷୀ ଗାଈ ବଳଦ ଙ୍କ ପାଇଁ ହଳିଆ ମଧ୍ୟ ରଖୁଥିଲେ | ଘର ଆଗରେ ଗୁହାଳ ଦେଖିବାକୁ ମିଳୁଥୁଲା | ହଳ ପାଇଁ ଚାଷୀ କୁସୁମ, ପାଶୀ , ବବୁଲ, ଗୁହାରିଆ ପ୍ରଭୃତି କାଠର ଲଙ୍ଗଳ, ଜୁଆଳି, ଇଷ ତଥା ଅନ୍ୟାନ୍ୟ ଉପକରଣ ରଖୁଥିଲେ | ପ୍ରତିବର୍ଷ ଚାଷୀ ମାନେ ବଳଦ କିଣାବିକା କରିବା ସହ ଅନ୍ୟ ଗ୍ରାମକୁ ଯାଇ ବଳଦ କିଣି ଆଣୁଥିଲେ | ଅକ୍ଷତୃତୀୟା ଦିନ ପୂଜାର୍ଚ୍ଚନା କରି ଚାଷ କାର୍ଯ୍ୟ ଆରମ୍ଭ କରୁଥିଲେ ନବରଙ୍ଗପୁର ଅଞ୍ଚଳର ଚାଷୀ | ହଳ ଧରୀ ବିଭିନ୍ନ ଢଙ୍ଗରେ ମଧୁର କଣ୍ଠରେ ଗୀତ ଗାଇ ହଳ କରୁଥିବା ଦେଖାଯାଉଥିଲା | ମହିଳା ମାନେ ହୁଳହୁଳି ସହ ମିଳିତ ଭାବେ ଗୀତ ଗାଉଥିଲେ | ଦୂରରୁ ଗୀତ ଶୁଭିଲେ ଚାଷ କାମ ଚାଲୁ ଥିବାର ସଙ୍କେତ ମିଳିପାରୁଥିଲା | ଗୋଟିଏ ଜମିରେ ମହିଳା ଗୀତଗାଇବା ଆରମ୍ଭ କଲେ ଅନ୍ୟ ଜମିର ଥିବା ମହିଳା ତାକୁ ଅନୁସରଣ କରୁଥିଲା | ଭିନ୍ନ ଭିନ୍ନ କାରଣ ଯୋଗୁଁ ବର୍ତମାନ ଏହିସବୁ ଲୁଚି ଯାଉଥିବା ବେଳେ ଚାଷୀ ହଳର ବ୍ୟବହାର ବନ୍ଦ କରିଦେଉଥିବା ଯୋଗୁଁ ପଶୁ ସମ୍ପଦ ବିଶେଷ ଭାବେ ହ୍ରାସ ପାଉଥିବା ଦେଖିବାକୁ ମିଳୁଛି | ଚାଷ ଜମିରେ ଘର ନିର୍ମାଣ ସହ ବର୍ଷ ବର୍ଷ ଧରି ଜମି ପଡିଆ ରଖାଯାଉଛି | ଉର୍ବର ଜମି ମଧ୍ୟ ଏଥିରୁ ବାଦ ପଡୁଛି | ପୂର୍ବରୁ ଶ୍ରମିକଙ୍କୁ ବର୍ଷିକିଆ ଚୁକ୍ତି ଭିତ୍ତିରେ ନିଯୁକ୍ତି ଦିଆଯାଇ ଧାନ, ମଣ୍ଡିଆ, ସୁଆଁ, ପ୍ରଭୃତି ମୂଲ ଦିଆ ଯାଉଥିଲା | ଶସ୍ୟ ମାପିବା ପାଇଁ ନଉତି, ଅଣା ଆଦି ବ୍ୟବହାର କରାଯାଉଥିବା ବେଳେ ଏବେ ସବୁ ଟଙ୍କାରେ ହେଉଛି | ଟ୍ରାକ୍ଟରରେ ଚାଷ କାର୍ଯ୍ୟ କରାଯାଉଛି | ବହୁ ଚାଷୀ ଚାଷ କାର୍ଯ୍ୟ କରିବା ପାଇଁ ଆଗଭଳି ମନ ବଳାଉନାହାଁନ୍ତି | ଚାଷ କାର୍ଯ୍ୟ ଅପେକ୍ଷା ସେମାନେ ଦାଦନ ଖଟିବା ପାଇଁ ସୁଦୂର ମୁମ୍ବାଇ, ସୁରତ, ବାଙ୍ଗାଲୋର, ହାଇଦ୍ରାବାଦ ଯିବା ପାଇଁ ମନ ବଳାଉଛନ୍ତି | ସମୟକ୍ରମେ ଚାଷ କାର୍ଯ୍ୟରେ ଅନେକ ପରିବର୍ତ୍ତନ ଘଟିଛି |ଚାଷ ଜମି ଶୈଳୀ ପରିବର୍ତ୍ତନ ଯୋଗୁଁ ହଳ, ହୁଳହୁଳି, ହଳିଆ ଗୀତ ଏବେ ପ୍ରାୟ ଲୋପ ପାଇବାକୁ ବସିଲାଣି | ଚାଷ କାମ ସାରିବା ପରେ ଗୋ ମାତାଙ୍କ ପର୍ବ ଦିଆଲି ମଦ୍ୟ ଧୂମଧାମରେ ପାଳନ ହେଉଥିଲା କିନ୍ତୁ ଏବେ ଏସବୁ ଲୋପ ପାଇବାକୁ ବସିଲାଣି | ବର୍ତ୍ତମାନ ସମ୍ପୁର୍ଣ୍ଣ ରୂପରେ ଚାଷ କାମର ଢାଞ୍ଚା ବଦଳି ଗଲାଣି, ପାରମ୍ପରିକ ହଳ ଲଙ୍ଗଳ ଆଉ ଦେଖିବାକୁ ମିଳୁନି | ଏଭଳି ଲାଗୁଛି ସତେ ଯେପରି ଯୁଗ ବଦଳି ଗଲାଣି |
ଡାବୁଗାଁ ରୁ ପ୍ରଜ୍ଞାରଞ୍ଜନ ପରିଡା ଙ୍କ ରିପୋର୍ଟ
