ଜୁନାଗଡ଼,୪/୮(ମ ନି ସ) ପ୍ରକୃତି ଓ ପରିବେଶ ସୁରକ୍ଷା ପାଇଁ ତେନ୍ତୁଳିପଡ଼ା ବାସୀ ଆଜି ତହସିଲ ଅଫିସ ଘେରାଉ କରି ସରକାରୀ ଜଙ୍ଗଲ ଓ ଜମିକୁ ବେସରକାରୀ ଲୋକଙ୍କ କବଜାରୁ ଉଦ୍ଧାର ଦାବୀକରିଛନ୍ତି।ପ୍ରାପ୍ତ ସୂଚନାରୁ ପ୍ରକାଶ ଯେ, କଳାହାଣ୍ଡି ଜିଲ୍ଲା ଜୁନାଗଡ଼ ବ୍ଳକ ଅନ୍ତର୍ଗତ ବୁଢ଼ୀଦର ପଞ୍ଚାୟତର ତେନ୍ତୁଳିପଡ଼ା ଗ୍ରାମର ରୋଗବଲା ନାଳ ନିକଟ ପଡ଼ିଆରେ ଗତ ୨୦୦୭/୦୮ ମସିହାରେ ୨୦ ଏକର ଜମିରେ ବନ ବିଭାଗ ପକ୍ଷରୁ ସାବୁନ ଗଛ ସହିତ ବିଭିନ୍ନ ପ୍ରକାର ଗଛ ଲଗା ଯାଇଥିଲା । ବର୍ତ୍ତମାନ ଏହି ଗଛ ୧୫ ରୁ ୨୦ ଫୁଟ ଲମ୍ବ ହେଲାଣି । ହେଲେ ବାଙ୍କପଲାସ ଗ୍ରାମର ରାମଚନ୍ଦ୍ର ମାଝୀ ଓ ତେନ୍ତୁଳିପଡ଼ା ଗ୍ରାମର ଲମ୍ବୋଦର ଶବର ଦୁଇଜଣ ମିଶି ୨ ଏକର ଜାଗାରେ ଲାଗିଥିବା ମୂଲ୍ୟବାନ ଗଛ ଗୁଡିକୁ କାଟିବା ସହିତ ଜେସିବି ମେସିନ ଲଗାଇ ଜୋର ଜବରଦସ୍ତ ନୂତନ ଜମି ତିଆରି କରୁଛନ୍ତି । ଏନେଇ ଗତ ଜୁଲାଇ ୨୩ ତାରିଖରେ ଜୁନାଗଡ଼ ଥାନା ଅଧିକାରୀ ଓ ୨୫ ତାରିଖରେ ଜୁନାଗଡ଼ ରେଞ୍ଜର ଓ ତହସିଲଦାରଙ୍କୁ ଗ୍ରାମବାସୀ ଲିଖିତ ଅଭିଯୋଗ କରିଥିଲେ । ହେଲେ ଏହି ଦୁଇଜଣଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ କରାଯାଉନାହିଁ । ତେଣୁ ପ୍ରକୃତି ଓ ପରିବେଶ ସୁରକ୍ଷା ପାଇଁ ଆଜି ଜବରଦଖଲ ହୋଇଥିବା ୨ ଏକର ଜମିକୁ ଫେରାଇ ଆଣିବା ସହ ସେହି ସ୍ଥାନରେ ବୃକ୍ଷ ରୋପଣ କରାଯାଇ ଗ୍ରାମ୍ୟ ଜଙ୍ଗଲର ସୁରକ୍ଷା କରାଯିବା ସହିତ ୨ ଜଣଙ୍କ ବିରୋଧରେ ଫୌଜଦାରୀ ମାମଲା ରୁଜୁ କରିବା ନେଇ ଆଜି ତେନ୍ତୁଳିପଡ଼ା ଗ୍ରାମବାସୀ ତହସିଲ କାର୍ଯ୍ୟାଳୟ ଘେରାଉ କରିଥିଲେ ।ଏହି କାର୍ଯ୍ୟକ୍ରମରେ ସୁରକ୍ଷା କମିଟିର ପଦ୍ମଲୋଚନ ନାଏକ, ପ୍ରଦ୍ୟୁମ୍ନ ନାଏକ, ମାଧବ ବାଗ, ଓ ବିଭିନ୍ନ ସଙ୍ଗଠନର ବିଶ୍ୱନାଥ କର,ସୁରେଶ ମାଝୀ, ଦାମୋଦର ବେହେରା, ଅକ୍ଷୟ ମେହେର ପ୍ରମୁଖ ସାମିଲ ଥିଲେ।
ଜୁନାଗଡ଼ ରୁ ନରେନ୍ଦ୍ର ଖୀତି ଙ୍କ ରିପୋର୍ଟ
