ଶ୍ରୀକୃଷ୍ଣ ଜନ୍ମ ନାନ୍ଦୋତ୍ସବ 

ପିଲାଏ ଆସରେ ଶୁଣିବା ସଭିଏଁ

         କୃଷ୍ଣ ଭଗବାନ କିଏ

ଦ୍ୱାପର ଯୁଗରେ କଂସ ବନ୍ଦୀଶାଳେ

         ଜନମି ଥିଲେଟି ସିଏ ||1||

ଭାଦ୍ର କୃଷ୍ଣ ପକ୍ଷ ଅଷ୍ଟମୀ ତିଥିରେ

         ଘୋର ବରଷା କାଳରେ 

କଂସ ରାଜା ଭୟେ ପିତା ବସୁଦେବ

       ଦେଲେନେଇ ଗୋପ ପୁରେ ||2||

ଦେବକୀ କୋଳରୁ ନେଇ ଗୋବିନ୍ଦଙ୍କୁ

          ଯଶୋମତି କୋଳେ ଦେଲେ

ବାଟେ ଉଗ୍ରେସେନ ଦର୍ଶନ କରିଲେ

        ଯମୁନା ବାଟ ଛାଡିଲେ ||3||

ସପ୍ତଫେଣୀ ନାଗ ଛତ୍ର ପ୍ରାୟ ହୋଇ

        ସୁରକ୍ଷା ଯେ ଦେଇଥିଲେ

ଯଶୋଦାଙ୍କ କୋଳୁ ବିଜୁଳୀ କୁ ଆଣି

        କଂସ ରାଜନକୁ ଦେଲେ ||4||

ଏହିକଥା ସବୁ ଗୁପତେ ରହିଲା

         ମାୟାଧର ମାୟା କଲେ

କେହି କାହା କଥା ଜାଣିନ ପାରିଲେ

           ସଭିଏଁ ତ ଭୁଲି ଗଲେ ||5||

ବୃଦ୍ଧ କାଳେ ପାଇ ଗୋବିନ୍ଦଙ୍କୁ ନନ୍ଦ

         କେତେ ମହୋତ୍ସବ କଲେ

ପିଠା ମିଠା ଆଉ ସାକର ରାବିଡି

           ସମସ୍ତଙ୍କୁ ବାଣ୍ଟି ଥିଲେ ||6||

ପୁର୍ଣିମାର ଚାନ୍ଦ ଖସି ପଡିଛିକି      

       ଯଶୋମତୀ ମାଆ କୋଳେ

ଶଙ୍ଖ ହୁଳହୁଳି ବାଇଦ ବଜାଇ

       ଗୋପୀଏ ନାଚନ୍ତି ଭୋଳେ ||7||

ଗର୍ଗ ମୁନି ଡାକି ପିତୃପିଣ୍ଡ ଦେଇ

          ଯାତ କରମ କରିଲେ

ନନ୍ଦ ଘରେ ତହୁଁ ଉତ୍ସବ ଚାଲିଲା

          କୃଷ୍ଣ ଲୀଳା ଆରମ୍ଭିଲେ ||8||

ଦାନାଧର୍ମ ପୁଣ୍ୟ ସବୁତ ଚାଲିଲା

          ଏକ ବିଂଶେ ନାମ ଦେଲେ

କୃଷ୍ଣ ମହିମାରେ ସଭିଏଁ ମଗନ

             ସବୁ ଦୁଃଖ ଭୁଲି ଗଲେ ||9||

ସେହି ପ୍ରଭୁ ପାଦେ ରହିଥାଉ ମନ

         କୃଷ୍ଣ ନାମ ତୁଣ୍ଡେ ଥାଉ

ତାଙ୍କୁ ଜପୁଥିଲେ ପାର ହୋଇ ଥାଏ 

         ଜୀବନର ସବୁ ଦାଉ ||10||

 ରତିନାରାୟଣ ରାଉତ l(ପ୍ର. ଶି.)

 ହରିଚନ୍ଦନପୁର, କେନ୍ଦୁଝର, ଓଡିଶା