ଡାବୁଗାଁ, ୨୧/୮ – ନବରଙ୍ଗପୁର ଜିଲା ଡାବୁଗାଁ ବ୍ଲକ ସରାଗୁଡ଼ା ନିକଟସ୍ଥ ସଂଗ୍ରାମୀ ସୋନୁ ମାଝି ସେବାସଂଘ ଗୃହରେ ପୋଲ ଭଙ୍ଗା ଦିବସ ପାଳନ କରାଯାଇଛି | ବେଲାରି ନଦୀ କୂଳ ରେ ତିଳ ତର୍ପଣ କରାଯାଇଛି ।
୧୯୪୨ ଭାରତ ଛାଡ ଆନ୍ଦୋଳନରେ ମହାତ୍ମା ଗାନ୍ଧୀଙ୍କ ଡାକରାରେ ସଂଗ୍ରାମୀ ସୋନୁ ମାଝିଙ୍କ ନେତୃତ୍ଵରେ ସରାଗୁଡ଼ା ନିକଟରେ ଥିବା ବେଲାରୀ ନଦୀ ଉପରେ ଥିବା କାଠ ପୋଲ କୁ ସ୍ୱାଧୀନତା ସଂଗ୍ରାମୀ ମାନେ ଅଗଷ୍ଟ ୨୦ ତାରିଖରେ ଭାଙ୍ଗି ଦେଇଥିଲେ । ତା ପରେ ତିନି ସହ ସ୍ଵାଧୀନତା ସଂଗ୍ରାମୀ ଗିରଫ ହୋଇଥିଲେ । 
ତା ପରେ ଅଗଷ୍ଟ ୨୪ ତାରିଖରେ ତୁରି ନଦୀ ଗୁଳିକାଣ୍ଡ ରେ ୧୯ ସ୍ଵାଧୀନତା ସଂଗ୍ରାମୀ ସହୀଦ ହୋଇଥିଲେ । ତେଣୁ ଅଗଷ୍ଟ ୨୦ ତାରିଖରେ ସରାଗୁଡ଼ା ରେ ପୋଲ ଭଙ୍ଗା ଦିବସ ପାଳନ କରାଯାଏ ଓ ସ୍ୱାଧୀନତା ସଂଗ୍ରାମୀ ମାନଙ୍କ ପାଇଁ ତିଳ ତର୍ପଣ କରାଯାଏ । ଆଜି ସକାଳୁ ସଂଗ୍ରାମୀ ସୋନୁ ମାଝି ସେବା ସଂଘ ଗୃହରେ ଝରିଗାଁ ବିଧାୟକ ପ୍ରକାଶ ମାଝି ପତାକା ଉତ୍ତୋଳନ କରିଥିଲେ । ତା ପରେ ସଭା କାର୍ଯ୍ୟ ଆରମ୍ଭ କରାଯାଇଥିଲା । ସେବା ସଂଘ ସଭାପତି ଦଇନୁ ପୂଜାରୀ ପ୍ରଦୀପ ପ୍ରଜ୍ଜ୍ୱଳନ କରିଥିଲେ । 
ଅର୍ଜୁନ ନାୟକଙ୍କ ସଭାପତିତ୍ଵ ରେ ଜିଲା ସଂଯୋଜକ ସରାଦୁ ଭତ୍ରା ମଞ୍ଚ ପରିଚାଳନା କରିଥିଲେ । ମୁଖ୍ୟ ଅତିଥିଭାବେ ଡାବୁଗାଁ ବିଧାୟକ ମନୋହର ରନ୍ଧାରୀ ଯୋଗ ଦେଇ ବେଲାରୀ ନଦୀ ଘାଟ କୁ ଯାଇ ସଂଗ୍ରାମୀ ମାନଙ୍କ ନିମନ୍ତେ ତିଳ ତର୍ପଣ କରିଥିଲେ । ଏହି କାର୍ଯ୍ୟକ୍ରମରେ ସେବା ସଂଘ ସମ୍ପାଦକ ନକୁଳ ପୂଜାରୀ, ବନୁଦାସ ପନକା , କେଶବ ଅମାନାତ୍ୟ, ଡମୁଦାଶ ସାନ୍ତା, ସୁକମନ ପୂଜାରୀ, ରାଜ କୁମାର ଗଣ୍ଡ, ଭଗବାନ କଲାର ଓ ସରାଗୁଡ଼ା ଗ୍ରାମବାସୀ ସହଯୋଗ କରିଥିଲେ। ସରାଗୁଡା ୱାର୍ଡ ସଭ୍ୟ ସୁକଦେବ ପୂଜାରୀ, ଲାଇବାନ ଭତ୍ରା, ପୁରନ ମାଝୀ ଓ ଅନ୍ୟ ଅତିଥି ମାନଙ୍କ ମଧ୍ୟରେ ସାଂସଦ ପ୍ରତିନିଧି ଏମ୍. ଅପ୍ପା ରାଓ, ବିଧାୟକ ପ୍ରତିନିଧି ଏମ୍. ବୁଲୁ ରାଓ, ବ୍ଲକ ବିଜେଡି ସଭାପତି ସୁରେନ୍ଦ୍ର କୁମାର ମିଶ୍ର, ଲଇଖନ ପନକା ଉପସ୍ଥିତ ଥିଲେ।
ପ୍ରଜ୍ଞାରଞ୍ଜନ ପରିଡା, ଡାବୁଗାଁ
