ବାଲ୍ ଯାତ୍ରାରେ ଏକାଠି ହେଲେ ସାତପାଲି ମୁଖ୍ୟ , ମାଟି ଦେବତାଙ୍କ ନିକଟରେ ନବାନ୍ନ ଚଢିଲା 

୩୦ରେ ଭାଦ୍ରବ ଯାତ୍ରା ଦିନ ଧାର୍ଯ୍ୟ

ରାଇଘର (ମ ନି ସ )୨୪/୦୮ ନବରଙ୍ଗପୁର ଜିଲ୍ଲା ରାଇଘର ବ୍ଲକ ସାତପାଲି ଗ୍ରାମବାସୀ ଏକାଠି ହୋଇ ପାରମ୍ପରିକ ମାଟି ଦେବତାଙ୍କ ନିକଟରେ ନବାନ୍ନ ଲାଗି କରିଛନ୍ତି ଏହି ପୁଜା ବାଲ୍ ଯାତ୍ରା ନାମରେ ପରିଚିତ l ନବରଙ୍ଗପୁର ଜିଲ୍ଲା ରାଇଘର ବ୍ଲକ ଏକ ଆଦିବାସୀ ଅଧ୍ୟୁଷିତ ଅଂଚଳ l ଏଠାକାର ଆଦିବାସୀଙ୍କ ପରମ୍ପରା ଭିନ୍ନ ଅଟେ l ସମସ୍ତ ଅଞ୍ଚଳବାସୀ ମିଳିତ ଭାବେ ଅଂଚଳର ପରମ୍ପରା ଉପରେ ଗୁରୁତ୍ୱ ଦେଇ ପୂଜା ବିଧି କରି ଥାନ୍ତି l ଆଜି ରାଇଘର ସଦର ମହକୁମା ଧଡ଼ରାପାରା ମଧ୍ୟ ଭାଗରେ ଥିବା ମାଟି ଦେବତାଙ୍କ ପୁଜା ସ୍ଥଳରେ ସାତପାଲି ଗ୍ରାମର ସମସ୍ତ ଅଂଚଳବାସୀ ମୁଖ୍ୟ କର୍ମକର୍ତ୍ତାଙ୍କୁ ନେଇ ଏକାଠି ହୋଇ ଏହି ବାଲ୍ ଯାତ୍ରା ପାଳନ କରିଥିଲେ l ବାଲ୍ ଯାତ୍ରା ସଂପର୍କରେ ରାଇଘର ସାତପାଲି ମୁଖ୍ୟ କମଳ ସିଂ ରାଜପୁତଙ୍କ ସୂଚନା ଅନୁଯାୟୀ ମାଟି ଦେବତାଙ୍କ ଯାତ୍ରା ଦିନ ଅଂଚଳବାସୀ ସାମିଲ୍ ହୋଇ ଚାଷ କାର୍ଯ୍ୟ ନିମନ୍ତେ ଧାନ ବୁଣିବା ଓ ଫସଲ ଭଲରେ ହେବା ପାଇଁ ପୁଜା ପାଠ କରିଥାନ୍ତି l ପରମ୍ପରା ଅନୁଯାୟୀ ଜମିରେ ଧାନ ହେବା ପରେ ନବାନ୍ନ ଭୋଗ ମାଟି ଦେବତାଙ୍କ ନିକଟକୁ ଚଢ଼ାଇବା ହିଁ ଏହି ଯାତ୍ରା ର ଉଦେଶ୍ୟ l ଭାଦ୍ରବ ମାସର ପ୍ରଥମ ସପ୍ତାହରେ ଏହି ବାଲ୍ ଯାତ୍ରା ହୁଏ l ପରେ ଠାକୁରାଣୀ ମନ୍ଦିର ଠାରେ ଭାଦ୍ରବ ଯାତ୍ରା ନିମନ୍ତେ ତାରିଖ ନିର୍ଘଣ୍ଟ ହୁଏ l ଏହି କ୍ରମରେ ଆସନ୍ତା ୩୦ ତାରିଖ ଦିନ ଭାଦ୍ରବ ଯାତ୍ରା ଅନୁଷ୍ଠିତ ହେବ ବୋଲି ଜଣାପଡିଛି l ସେହି ଦିନ ନୁଆଖାଇ ନିମନ୍ତେ ତାରିଖ ନିର୍ଦ୍ଧାରଣ ହୁଏ l ଏହି ଯାତ୍ରା ରେ କେବଳ ନବାନ୍ନ ଭୋଗ ଚଢ଼ାଇବା ନିମନ୍ତେ ମାଟି ଦେବତାଙ୍କ ନିକଟରେ ସମସ୍ତେ ଏକାଠି ହୋଇଥାନ୍ତି l ମାଟି ପୂଜାରୀ ଲବ ପୂଜାରୀ,ଠାକୁରାଣୀ ପୂଜାରୀ ପରଦେଶୀ ପୁଜାରୀ,ଗ୍ରାମ ମୁଖିଆ କମଳ ସିଂ ରାଜପୁତ,ସୁଦର୍ଶନ ମାଝୀ,ସବ୍ ସିଂ ମାଳୀ,ମହେଶ ଧୁରୁଆ,ଗୋବିନ୍ଦ ଗଣ୍ଡ ସହ ସାତ କୁଳ,ଯଥା ଗାଇତା,ସମରଥ୍,ସାମପୁରିଆ ,ଡେଙ୍ଗୁରମୁନିଆ,ଧୁରୁଆ,ନେଙ୍ଗି,ପାତ୍ର,ଓ ଦଣ୍ଡସେନା ପ୍ରମୁଖ ଉପସ୍ଥିତ ଥିଲେ l

ରାଇଘର ରୁ କିରଣ କୁମାର ପଟ୍ଟନାୟକ ଙ୍କ ରିପୋର୍ଟ