ହେ ନୀଳାଦ୍ରି ନାଥ
ବିଜୟ କୁମାର ଜେନା
ତୁମରି ପରଶେ ନଦୀ ବହି ଯାଏ
ସାଗର ମିଳନ ସୁଖ
ତୁମେ ଦୟା କଲେ ସର୍ବ ପ୍ରାଣୀଙ୍କର
ଲାଘବ ହୁଅଇ ଦୁଃଖ।
ନିତି ପ୍ରତ୍ୟୁଷରେ ରବିଙ୍କ କିରଣ
ଝଲସାଇ ଦିଏ ମହୀ
ତୁମ ସୃଷ୍ଟି କେଡେ ଜୀବନ୍ତ ଲାଗଇ
ମୋ ମନ ହେଉଛି କହି।
ତୁମରି ଆଜ୍ଞାରେ ଦିନ ପରେ ରାତି
ମାସ ବର୍ଷ ଋତୁ ଚକ୍ର
ଘୁରି ଘୁରି କାଳ ମୋର ସରି ଯାଏ
ମୁକତି ପାଇଁକି ବ୍ୟଗ୍ର।
କେତେ ଦିନ ଆଉ ମାୟା ବନ୍ଧନରେ
ଘାଣ୍ଟି ହେବି ଏ ସଂସାରେ
ହେ ନୀଳାଦ୍ରି ନାଥ ତୁମ କରୁଣାରୁ
ବିନ୍ଦୁ ଏ ପଡୁ ମଥାରେ।
ଏହି ଆଶା ନେଇ ଶରଣ ପଶିଲି
ନକର ବାରଣ ନାଥ
ପ୍ରତି ଓଡ଼ିଆର ଚେତନାରେ ତୁମେ
ଆହେ ପ୍ରଭୁ ଜଗନ୍ନାଥ।
ଅବସର ପ୍ରାପ୍ତ ପ୍ରାଧ୍ୟାପକ
ଶାମୁକା ସାହି ,ରଣପୁର ନୟାଗଡ଼
