ଜଣାଣ

ମାନଗୋବିନ୍ଦ ସ୍ବାଇଁ

ସମୟ ପାଇଲେ ପ୍ରଭୁ ତୁମ ନାମ

      କରୁଛି ମୁ ଜପାମାଳି

ରୂପ ଦେଖା ଦିଅ ବଚନ ନ କୁହ

     ଭକ୍ତି ନାଚେ ଢଳି ଢଳି।

ନୀରବ ବସିଛ ମଉନ ଶୁଣୁଛ

   ଭକ୍ତ ଆସେ କେତେ ଦୂର

ଥକି ପଡୁ ନାହିଁ ତୁମ ଆଶିର୍ବାଦ

   ଖାଲି ଘେନ ତା ଜୁହାର।

ତୋ ଧଣ୍ଡା ତୂଳସୀ ପାଦୁକା ପାଇଲେ

      ମନ ମୋ ହୁଏ ପବିତ୍ର

ତୁମରି ନାମରେ ଭଜନ ଗାଇଲେ

      ସୁସ୍ଥ ରହୁ ଜୀବନର।

ସବୁ ଦିନ ଭଳି ସେହି ରୂପ ଦେଖା

     ଥରେ କରିବି ଦର୍ଶନ

ଜୀବନର ପାପ ଲିଭି ଯାଉ ମୋର

   ତୁମେ ମୋର ଭଗବାନ।

ତୁମ ଛବି ମୋର ଅମୂଲ୍ୟ ସଂପଦ

    ଯୁଆଡ଼େ ଯାଉଛି ଧରି

ସକାଳ ସନ୍ଧ୍ୟାରେ ତୁମ ନୀତି କାମ

     ପ୍ରାର୍ଥନା କରୁଛି ହରି।

ଗୋଜାବନ୍ଧ ମହାକାଳପଡ଼ା

କେନ୍ଦ୍ରାପଡ଼ା