ମ.ରାମପୁର:୨୧/୧୦(ମସୀହା): କଳାହାଣ୍ଡି ଜିଲ୍ଲା ମ.ରାମପୁର ବ୍ଲକ ର ଉର୍ଲଦାନୀ ପଂଚାୟତ କଳାହାଣ୍ଡି ଜିଲ୍ଲାର ଶେଷସୀମା (କନ୍ଧମାଳ) ସୀମାନ୍ତରେ ରହିଥିବା ବେଳେ ଏହି ଅଂଚଳଟି ମ.ରାମପୁରଠାରୁ ଦୂରତା ପ୍ରାୟ ପନ୍ଦର କିଲୋମିଟର । ଆଦିବାସୀଙ୍କ ସ୍ୱାସ୍ଥ୍ୟସେବାକୁ ଦୃଷ୍ଟିରେ ରଖି ୨୦୧୨ ମସିହାରେ ଉର୍ଲଦନୀ ଠାରେ ପ୍ରତିଷ୍ଠା କରାଗଲା ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର । କଳାହାଣ୍ଡି ଜିଲ୍ଲା ମ.ରାମପୁର ବ୍ଲକର ମୁଖ୍ୟାଳୟରେ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ରହିଥିବା ବେଳେ ମୋହନଗିରୀ,ମଦନପୁର ଉର୍ଲାଦାନୀ ଓ ବାରବନ୍ଧାରେ ରହିଛି ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର l 
ଉର୍ଲାଦାନୀ ଠାରେ ଥିବା ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଫାର୍ମାସିଷ୍ଟ ଭାବରେ ହେମନ୍ତ ସାହୁ ଯୋଗଦେବା ପରେ ସ୍ୱାସ୍ଥ୍ୟ ସେବାଠାରୁ ଆରମ୍ଭ କରି କେନ୍ଦ୍ର ପରିସରର ପରିବେଶକୁ ସ୍ୱତନ୍ତ୍ର ଦୃଷ୍ଟି ଦେଇଆସିଛନ୍ତି l ଯାହାର ଜ୍ୱଳନ୍ତ ନମୁନା ହେଉଛି ଏହିଠାରେ ଥିବା ବିଭିନ୍ନ ଔଷଧୀୟ ବୃକ୍ଷ ଲତାର ସମାହାର । ତାଙ୍କର ନିଜସ୍ୱ ଉଦ୍ୟମ ଓ ନିଷ୍ଠା ବଳରେ ଏକ ସୁନ୍ଦର ଔଷଧୀୟ ବଗିଚା ସୃଷ୍ଟି ହୋଇଛି l ଯେଉଁଠି ଅନେକ ମୂଲ୍ୟବାନ ଓ ବିରଳ ଔଷଧୀୟ ଗଛ ସବୁ ତାଙ୍କରି ସେବା ଯତ୍ନ ପାଇ ସୁନ୍ଦର ଓ ସତେଜ ରହିଛନ୍ତି । ସେହିସବୁ ମୂଲ୍ୟବାନ ବୃକ୍ଷରାଜି ମଧ୍ୟରେ ରହିଛି- ଭୃଙ୍ଗରାଜ, ପୁଦିନା, ଡ଼ାଲଚିନି,ତେଜପତ୍ର, ଗୋଲ ମରୀଚ, ଲବଙ୍ଗ, ଅଳେଇଚ, ଗଙ୍ଗଶିଉଳୀ,ଗେଲୋଇ, ବିଶଲ୍ୟାକରଣୀ, ଦେଷଣ୍ଢ, ଏଲୋଭେରା, ଛତାବରୀ, ତୁଳସୀ, ଲେମନ୍ ଗ୍ରାସ୍, ଅଶ୍ୱଗନ୍ଧା, ଜୁଆଣି, ହାଡ଼ ଶିକଲୀ, ଗୁଡ଼ମାରୀ, ଅଁଳା, ରିଠା,ଅଦା,ହଳଦୀ ଭଳି ଅନେକ ପ୍ରକାର ଔଷଧୀୟ ଗୁଳ୍ମ ଲତା । କେବଳ ଯେ ଏହି ପରିସରରେ ଔଷଧୀୟ ଗଛ ରହିଛି ତାନୁହେଁ ସେ ଆମ୍ବ,ପଣସ, ଅମୃତଭଣ୍ଡା, କଦଳୀ,କଲରା,ଭେଣ୍ଡି,କାକୁଡ଼ି,ପାଣି କକ୍ଷାରୁ ଭଳି ଫଳ ଓ ପନିପରିବା ଗଛ ଲଗେଇ ମଧ୍ୟ ନିଜ ବୃକ୍ଷ ପ୍ରତି ରହିଥିବା ଅନୁରାଗ ଓ ଭଲପାଇବା ପ୍ରଦର୍ଶନ କରିଛନ୍ତି । ସ୍ୱାସ୍ଥ୍ୟକେନ୍ଦ୍ରର ପ୍ରବେଶ ଦ୍ୱାର ର ଦୁଇ ପାର୍ଶ୍ଵ ରେ ସମସ୍ତଙ୍କୁ ସ୍ୱାଗତ କରନ୍ତି ଜାତିଜାତିକା ଫୁଲରାଜି । ଏକ ପ୍ରକାର ପାର୍କର ଭ୍ରମ ସୃଷ୍ଟି କରୁଛି ଏହି ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରଟି । 
ଫାର୍ମାସିଷ୍ଟ ହେମନ୍ତ ସାହୁ ଏହି କେନ୍ଦ୍ରରେ ଯୋଗଦେବା ପରଠାରୁ ପର୍ଯ୍ୟାୟକ୍ରମେ ଏହି ସବୁ ଗଛ ଲଗେଇ ସଜେଇବା ସହିତ ଔଷଧୀୟ ଗଛ ଗୁଡ଼ିକରେ ଗଛର ନାମଫଳକ ବି ଲଗେଇଛନ୍ତି l ଯାହାଫଳରେ ଜଣେ ଗଛ ଚିହ୍ନିବାରେ ଭୁଲ ହେବ ନାହିଁ ଏବଂ ସଠିକ ଗଛରୁ ନିଜ ପାଇଁ ଉପଯୋଗୀ ଗଛର ପତ୍ର ଓ ଅନ୍ୟାନ୍ୟ ସାମଗ୍ରୀ ନେଇ ପାରିବ । ଆଦିବାସୀ ଅଧ୍ୟୁଷିତ ଏହି ସ୍ୱାସ୍ଥ୍ୟ କେନ୍ଦ୍ରରେ ଜଣେ ଡ଼ାକ୍ତର,ଜଣେ ଫାର୍ମାସିଷ୍ଟ,ଜଣେ ଲାବ୍ରୋଟାରୀ ଟେକ୍ନିସିଅନ ଙ୍କ ସମେତ ଅନ୍ୟମାନେ ରହି ରୋଗୀଙ୍କୁ ସ୍ୱାସ୍ଥ୍ୟ ସେବା ଦେଉଥିବା ବେଳେ ଆକର୍ଷଣୀୟ ବୃକ୍ଷର ସମ୍ଭାର ପାଇଁ ଅନ୍ୟମାନଙ୍କୁ ପ୍ରେରଣା ଯୋଗାଇବ ନିଶ୍ଚୟ । ସରକାରୀ ହତା ହେଲେ ମଧ୍ୟ ନିଜ ଘର ଭଳି ଗଛ ଗୁଡ଼ିକର ଯତ୍ନ ପାଇଁ ଫାର୍ମାସିଷ୍ଟ ହେମନ୍ତ ସାହୁଙ୍କ ଅବଦାନକୁ ଅଂଚଳବାସୀ ଭୁରି ଭୁରି ପ୍ରଶଂସା କରୁଛନ୍ତି l ଅନ୍ୟ ସମସ୍ତ ସ୍ୱାସ୍ଥ୍ୟକେନ୍ଦ୍ର ଗୁଡ଼ିକ ଏହି ଉର୍ଲାଦାନୀ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରୁ କିଛି ଶିଖିବା ଉଚିତ ବୋଲି ଆଲୋଚନା ହେଉଛି l
ମ.ରାମପୁରରୁ ପରମାନନ୍ଦ ବିଶି ଙ୍କ ରିପୋର୍ଟ
