ଆସ ପ୍ରେମ ଦୀପ ଜାଳି ଦେବା
ପ୍ରତାପ କିଶୋର ରାଉତ
ପ୍ରେମର ପ୍ରଦୀପ ଜାଳିଦେବା ଆସ
ଏ ହୃଦୟ ମନ୍ଦିରରେ
ଜ୍ୟୋତିର୍ମୟ ହେବ ଏହି ଦିବ୍ୟ ତନୁ
ସ୍ନେହ ପ୍ରେମ ପୁଲକରେ ।
ଅସୂୟା ଅନୀତି କ୍ରୋଧ ଅହଂକାର
ବିରାଜଇ ହୃଦୟରେ
ତଥାପି ମଣିଷ ଦୀପ ଟିଏ ଜାଳି
ସୁଖ ଶାନ୍ତି ଆଶା କରେ ।
ଅଶାନ୍ତ ଅନଳେ ଜୀବନ ଜଳୁଛି
ସୁଖ ଯେ ସାତ ସପନ
ଅନ୍ୟର ସୁଖ ଯେ ଅସହ୍ୟ ହୁଅଇ
ଭାଙ୍ଗୁନାହିଁ ଅଭିମାନ ।
ଦୀପାବଳୀ ଦିଏ ଏ ଶୁଭ ସନ୍ଦେଶ
ହୃଦୟ ରେ ଦୀପ ଜାଳ
ଲକ୍ଷେ କଳଙ୍କ କୁ ଦୁର କରିଦେଇ
ହୃଦୟ କର ମଞ୍ଜୁଳ ।
ଆତ୍ମ ସମୀକ୍ଷା ର ସମୟ ଆସିଛି
ବୁଝ ଆହେ ନର ନାରୀ
ସବୁ ରାତି ହେଉ ଦୀପାବଳି ରାତି
ନଦିଅ ଏହା ପାଶୋରି ।
ଗୃହ ଆଲୋକିତ ନିମିଷକ କଥା
ପରେ ଅନ୍ଧାର ଆସିବ
ହୃଦୟଟି ଯଦି ଆଲୋକିତ ହୁଏ
ସୁଖ ଶାନ୍ତି ବିରାଜିବ ।
ପ୍ରେମର ଦୀପାଳି ଜଳାଇ ହୃଦୟେ
ସୁଖକୁ ଆହ୍ୱାନ କର
ପ୍ରୀତିର ମଳୟ ସଦା ବହୁଥିବ
ସବୁ ହେବେ ଆପଣାର।
ତେନ୍ତୁଳିପଦୀ ,ହାଟଡିହି ,କେନ୍ଦୁଝର
