ନର୍ଲା (ମନିସ)ଗତ ବର୍ଷଭଳି ଏବର୍ଷ ମଧ୍ୟ ଚାଷୀକୁ ନିଦ ହଜାଇ ଦେଇଛି ଜଙ୍ଗଲି ହାତୀ। ହାତୀ ପଲ ବଢିବା ସହ ଚାଷ କ୍ଷତିର ପାଦୂର୍ଭାବ ବଢ଼ିଚାଲିଛି । ନର୍ଲା ରେଞ୍ଚ ଉତ୍ତର ବନଖଣ୍ଡ “କମେଁ” ବିଟରେ ହାତୀ ଆଡ୍ଡା ଜମାଇଛନ୍ତି। ଯାହାଫଳରେ ରାତିରେ ଖାଦ୍ୟ ଅନ୍ୱେଷଣରେ ବାହାରି ନିକଟର ଥିବା ଜାମପଡ଼ା, ବାଗପୂର, ବଫଲା ଅଞ୍ଚଳର ଚାଷୀଙ୍କ ଧାନ, ଫସଲ ନଷ୍ଟ କରୁଛନ୍ତି । ଚାଷୀ ନିଜ ଚାଷ ଜମିରେ ରାତିରେ ଜଗି ରହୁଛି। ବିଚରା ଚାଷୀ ହାଡ଼ଭଙ୍ଗା ପରିଶ୍ରମ କରି ବାର୍ଷିକ ନିଜର ପରିବାର ପ୍ରତିପୋଷଣ କରିବା ପାଇଁ ଚାଷ କରିଛି। କିନ୍ତୁ ଜଂଗଲୀ ହାତୀ ଆସି ନଷ୍ଟ କରୁଛନ୍ତି ଚାଷ । ବନବିଭାଗ ପକ୍ଷରୁ ହାତୀ ଘଉଡ଼ାଇବାର ଅସଫଳ ହେଉ ବା ଜଙ୍ଗଲରେ ହାତୀର ଖାଦ୍ୟ ଅଭାବ ହେଉ ଚାଷୀ ଚାଷ ଓ ଜୀବନ ସୁରକ୍ଷାରେ ଅସୁରକ୍ଷିତ ମନେ କରୁଛନ୍ତି। ସମସ୍ତ ଚାଷୀ ଏକତ୍ରିତ ହୋଇ ନିଜ ନିଜର ଚାଷ ବଞ୍ଚାଇ ବାକୁ ଯାଇ ହାତୀର ଆକ୍ରମଣ ଶିକାର ହେବାର ଦେଖାଦେଇଛି। 
ନର୍ଲାବ୍ଲକ୍ ଅନ୍ତର୍ଗତ ବାଗପୂର୍ ଗ୍ରାମର ଜଣେ ବ୍ୟକ୍ତି କ୍ଷମା ସାଗର ସାହୁ ବୟସ ( ୪୬) ରାତିରେ ନିଜ ଚାଷ ଜମିକୁ ଫସଲ ଜଗିବାକୁ ଯାଇଥିବା ବେଳେ ୬ଟିକିଆ ହାତୀ ଦଳ ହାବୁଡାରେ ପଡ଼ି ଦନ୍ତା ହାତୀ ଆକ୍ରମଣରେ ଆହତ ହୋଇ ମୃତ୍ୟୁ ମୁଖରୁ ବଞ୍ଚିଯାଇଥିଲେ । ତାଙ୍କୁ କିଛି ଚାଷୀ ପ୍ରଥମେ ନର୍ଲା ସ୍ବାସ୍ଥ୍ୟ କେନ୍ଦ୍ରକୁ ନେଇ ଥିଲେ କିନ୍ତୁ ଛାତିରେ ପିଠି ଓ ଅଣ୍ଟାରେ ଅଧିକ ଯନ୍ତ୍ରଣା ଅନୁଭବ କରିବାରୁ ତାଙ୍କୁ ଭବାନୀପାଟଣା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତରିତ କରିଥିଲେ। ଡାକ୍ତରଙ୍କ କହିବା ଅନୁଯାୟୀ ତାଙ୍କ ଆଖିରେ ଆଘାତ ଲାଗିବା ସହ ପିଠି ଓ ଛାତି ଚାପି ହେବା ଫଳରେ ଅଣ୍ଟାର କୌଣସି ଏକ ହାଡ଼ ଭାଙ୍ଗି ଯାଇଛି । ବନବିଭାଗ ପକ୍ଷରୁ ଫରେଷ୍ଟର ଭବାନୀଶଙ୍କର ନାଏକ ଉକ୍ତ ବ୍ୟକ୍ତିଙ୍କୁ ଭେଟି ସହାୟତା ରାଶି ବାବଦକୁ ୬ ହଜାର ଟଙ୍କା ଦିଆଯାଇଥିବା ଜଣାପଡିଛି। ଆହତ ବ୍ୟକ୍ତି ଜଣକର ସ୍ବାସ୍ଥ୍ୟ ଅବସ୍ଥା ଗୁରୁତର ଥିବା ଜଣା ପଡ଼ିଛି। ପରିବାରରେ ଏକମାତ୍ର ରୋଜଗାରିଆ ବ୍ୟକ୍ତି । ତାଙ୍କ ପରିବାର କହିଲେ ଦୁଇ ପୁତ୍ର ସ୍ତ୍ରୀ, ବାପା, ମାଙ୍କ ସାହା ଭରଷା ଦେଖିବାକୁ ଗଲେ ଚାଷରେ ଯାହା ମିଳେ ତାକୁ ନେଇ ପରିବାର ଚଳେ। ବିଲରେ ବର୍ତ୍ତମାନ ଚାଷ ପଡି ରହିଛି, ଫସଲ ଅମଳ ହୋଇ ନ ଥିବାରୁ ଆର୍ଥିକ ସ୍ଥିତି ଖରାପ୍ ତେଣୁ ଚିକିତ୍ସା ଅଭାବରୁ ବଞ୍ଚିତ ହେଉଛନ୍ତି। ଆହତ ବ୍ୟକ୍ତିଙ୍କ ପରିବାର ଏବେ ସରକାରୀ ସାହାଯ୍ୟ ପାଇଁ ଚାହିଁ ବସିଛନ୍ତି।
ପ୍ରଦୀପ କୁମାର ଗଉଡ ନର୍ଲା ମସୀହା ପ୍ରତିନିଧି
