ଭଲରେ ଅଛି ମୁହିଁ
ଅପର୍ତ୍ତି ସେଠୀ
ମୋ ଚାଳଘର ଭଙ୍ଗା ଛପର
ରାତିରେ ଜହ୍ନ ପଡ଼େ,
ରାତି ପାହିକି ସକାଳ ହେଲେ
ଖରା ପଡେ ମୋ ଘରେ।
ବରଷା ପାଣି ଗଳଇ ପୁଣି
ହେଲେ ବରଷା ଦିନ,
ଶୀତ କାକରେ ମୋ କୁଡିଆରେ
ସୁଖରେ ବିତେ ଦିନ।
ସୁଖ ଓ ଶାନ୍ତି ରହିଛି ଲାଖି
ମୋ ଝାଟିମାଟି କାନ୍ଥେ,
ଶାଗ ପଖାଳ ଖୁସି ମଧୁର
ମୋ ସ୍ତ୍ରୀ ପିଲା ସାଥେ।
ଦିନ ମଜୁରୀ ମୂଲରେ ପୁଣି
କିଣେ ମୁଁ ତେଲ ଲୁଣ,
ବଡ଼ ମୋ ପାଇଁ ବଡଠାକୁର
ବଡ଼ ମୋ ସନମାନ।
କାହାରି ମନ୍ଦ ଚିନ୍ତା କରେନା
କାହାରି ଧାରେ ନାହିଁ,
ଖଣ୍ଡିଏ ପିନ୍ଧି ଗଣ୍ଡିଏ ଖାଇ
ଭଲରେ ଅଛି ମୁହିଁ।
ପାଞ୍ଚ ପରାଣୀ କୁଟୁମ୍ବ ଘେନି
ଛୋଟିଆ ମୋର ରାଜ୍ୟ,
ସେଇ ରାଇଜେ କାଳିଆ ରଜା
କରେ ମୁଁ ତାଙ୍କ କାର୍ଯ୍ୟ।
କାର୍ଯ୍ୟରୁ ଫେରି ପିଲାଙ୍କୁ ଦେଖି
ପେଟ ମୋ ଯାଏ ପୁରି,
ଖୁସି ଗପରେ ହସ ମଜାରେ
ମୋ ଦିନ ଯାଏ ସରି।
ଜାଣିନି ମାୟା ଜୀବନେ ଯାହା
ସଞ୍ଚି ମୁଁ ନାହିଁ ଧନ,
ଧନ ସିନ୍ଧୁକ କଳାମାଣିକ
ସିଏ ମୋ ପ୍ରାଣ ଧନ।
ମୋ ଭଙ୍ଗା ଡଙ୍ଗା ଭବ ସାଗରେ
ଚାଲିଛି ହଲି ହଲି,
ନାହିଁ ମୋ ଡର କଳା ଠାକୁର
ମଙ୍ଗ ଧରିଛି ବୋଲି।
ବୃଦ୍ଧ ବି ହେଲି ଯିବି ମୁଁ ଚାଲି
ନିଶ୍ଚେ ମଶାଣୀ ଭୂଇଁ,
ରାମନାମକୁ ଗଣ୍ଠି କରିଛି
କେବେ ଛାଡ଼ିବି ନାହିଁ।
ପାଳକଣା, କୋରୋ, କେନ୍ଦ୍ରାପଡ଼ା
