ଅବିନାଶୀ ଆତ୍ମା
କେବେ ଦୃଶ୍ୟମାନ କେବେ ଅନ୍ତର୍ଧ୍ୟାନ
ନିରାକାର ପରମାତ୍ମା
ଅଜର-ଅମର. ରୂପରେ ଓଁକାର
ଅବିନାଶୀ ସେଇ ଆତ୍ମା |(୧)
ସୃଷ୍ଟିର ସୃଜକ ତ୍ରିଲୋକ ରକ୍ଷକ
ଚରାଚରେ ବିଦ୍ୟମାନ
ଯାହାର ଇଙ୍ଗିତେ ସୂରୁଜ ବିୟତେ
ହୁଅଇ ପ୍ରକାଶମାନ |(୨)
ଗଗନରେ ତାରା ବାଦଲରେ ଧାରା
ପୁନେଇଁ ଜହ୍ନ ନଭରେ
ମହୀଧର-ମହୀରୁହ ଯେ ମଣିଷ
ସର୍ବତ୍ର ବ୍ରହ୍ମ ତହିଁରେ |(୩)
ଜଣା ତିନିଲୋକେ ତିନିଦେବ ଭାବେ
ତ୍ରିକାଳ ଦଶ ଦିଗରେ
ସେଇ ସର୍ବବ୍ୟାପୀ ପ୍ରଭୁ ଅବିନାଶୀ
ସ୍ଥିତ ସକଳ ଆତ୍ମାରେ |(୪)
ସତ୍ୟ ଯେ ସୁନ୍ଦର ସିଏ ହିଁ ଈଶ୍ୱର
ଅନ୍ତର ହୃଦୟବାସୀ
ଶୀର୍ଷ ରୁ ଯେ ଶେଷ ସିଏ ହିଁ ସର୍ବସ୍ଵ
ଆତ୍ମା ସିଏ ଅବିନାଶୀ |(୫)
ଶ୍ରୀମତୀ ପ୍ରିୟଦର୍ଶିନୀ ମିଶ୍ର
ଜୁନାଗଡ଼ (କଳାହାଣ୍ଡି)
ଜନ୍ମଭୂମି:-ମଣ୍ଡଳ (ବଲାଙ୍ଗୀର)
