ବଡଦିନ ପାଇଁ ସଜେଇ ହେଲାଣି ଚର୍ଚ୍ଚ ପରିସର । କନ୍ଧମାଳରେ ଥିବା ଚର୍ଚ୍ଚ ଗୁଡିକ ସନ୍ଧ୍ୟା ପରେ ଆଲୋକମାଳାରେ ଝଲସୁଛି । ଯୀଶୁଙ୍କୁ ସ୍ବାଗତ କରିବା ଲାଗି ଖ୍ରୀଷ୍ଟ ଧର୍ମୀମାନେ ସବୁପ୍ରକାର ପ୍ରସ୍ତୁତି ଶେଷ କରିସାରିଲେଣି
କନ୍ଧମାଳ : ରାତି ପାଇଲେ ବଡଦିନ । ଧରା ପୃଷ୍ଟରେ ଅବତରଣ କରିବେ ପ୍ରଭୁ ଯୀଶୁ ଖ୍ରୀଷ୍ଟ । ଏହି ଅବସରରେ ଚଳଚଞ୍ଚଳ ହୋଇ ଉଠିଛି କନ୍ଧମାଳ ଜିଲ୍ଲାର ପୁରପଲ୍ଲୀ । ଜିଲ୍ଲାର ସମସ୍ତ ଗିର୍ଜା ଗୃହ ଗୁଡିକ ସଜେଇ ହୋଇଛି । ରାତିରେ ଚିକ୍ମିକ ଆଲୁଅରେ ଝଲସୁଛି ସମସ୍ତ ଚର୍ଚ୍ଚ । ଦୁଇ ବର୍ଷ ହେବ କୋଭିଡ କଟକଣା ଯୋଗୁଁ ଫିକା ପଡିଥିଲା ବଡଦିନ ଓ ନବ ବର୍ଷ । ତେଣୁ ଚଳିତ ବର୍ଷ ଧୁମ ଧାମରେ ବଡ ଦିନ ପାଳନ କରିବା ନେଇ ଉତ୍ସାହିତ ଅଛନ୍ତି ଖ୍ରୀଷ୍ଟ ଧର୍ମାବଲମ୍ବୀ ଆଉ କିଛି ସମୟର ଅପେକ୍ଷା ପରେ ପ୍ରଭୁ ଯୀଶୁ ଧରାବତରଣ କରିବେ । ଆଡମ୍ବରର ସହ ଯିଶୁ ଖ୍ରୀଷ୍ଟଙ୍କ ଜନ୍ମଦିନ ପାଳନ କରିବା ନେଇ ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ । ରାଜ୍ୟ ବାହାରେ ରହୁଥିବା ଖ୍ରୀଷ୍ଟ ଧର୍ମାବଲମ୍ବୀ ନିଜ ନିଜକୁ ଘରକୁ ଫେରିବା ଆରମ୍ଭ କଲେଣି । 
ଆତ୍ମୀୟ ସ୍ୱଜନଙ୍କ ସହିତ ମିଶି ବଡଦିନ ପାଳନ କରିବା ପାଇଁ ସମସ୍ତେ ଉତ୍କଣ୍ଠାର ସହ ଅପେକ୍ଷା କରିଛନ୍ତି । ଆଲୋକମାଳାରେ ସୁସଜ୍ଜିତ ହେଲାଣି ଚର୍ଚ୍ଚ ଏବଂ ପ୍ରାଥର୍ନା ଗୃହ । ମହାମାରୀ କୋରୋନା ସଂକ୍ରମଣରୁ ଦୁଇବର୍ଷ ବଡଦିନ ପର୍ବକୁ ଫିକା କରି ଦେଇଥିବା ବେଳେ ଚଳିତ ବର୍ଷ ମହା ଆଡମ୍ବରରେ ପାଳନ କରିବାକୁ ଜୋର ସୋରରେ ପ୍ରସ୍ତୁତି ଚାଳିଛି ।
ସଜେଇ ହେଲାଣି ଫୁଲବାଣୀର ଚର୍ଚ୍ଚ
ଫୁଲବାଣୀରେ ଥିବା କ୍ୟାଥିଲିକ ଚର୍ଚ୍ଚ, ବାପିଷ୍ଟ ଚର୍ଚ୍ଚ ସଜେଇ ହୋଇଥିବାବେଳେ ଜି. ଉଦୟଗିରି,ରାଇକିଆ, ବାଲିଗୁଡା ଚର୍ଚ୍ଚ ମାନଙ୍କରେ ମଧ୍ୟ ପ୍ରସ୍ତୁତି ଶେଷ ହେଲାଣି । ବଜାରରେ ଆଲୋକମାଳା, ଏକ୍ସମାକ୍ସ ଟ୍ରି, କ୍ୟାଣ୍ଡେଲ, ବିଭିନ୍ନ ପ୍ରକାର କେକ, ସହିତ ଭଳି କି ଭଳି ମିଠା ଦେଖିବାକୁ ମିଳୁଛି । ବଡଦିନ ଅବସରରେ କ୍ୟାଣ୍ଡେଲ ଶୋଭାଯାତ୍ରା, ସାମୁହିକ ପ୍ରାର୍ଥନା, ମନୋରଞ୍ଜନ କାର୍ଯ୍ୟକ୍ରମ, ରାତ୍ର ପ୍ରାର୍ଥନା, ଯୀଶୁ ଖ୍ରୀଷ୍ଟଙ୍କ ଜନ୍ମ ଉତ୍ସବ, ଖେଳକୁଦ ପ୍ରତିଯୋଗିତାର ଆୟୋଜନ କରାଯିବାର ସୂଚନା ରହିଛି । ବଡଦିନକୁ ନେଇ ପ୍ରଶାସନିକ ସ୍ତରରେ ପ୍ରସ୍ତୁତି ଆରମ୍ଭ ହୋଇଛି ।
କନ୍ଧମାଳ ରୁ ଜୟ ସେନ ପରିଡା
