l l ବିଦାୟୀ -ବରଷ l l

ବିଦାୟ ଲଗନ ହେଲା ଉପଗତ

         ଆହେ ଦୁଇ ହଜାର ବାଇଶ 

ଧୀରେ ଧୀରେ ପଦ ଗଣତି ନ କରି

          ପାହୁଣ୍ଡଟା ପକାଅ ସତ୍ୱର l 

ଚାଲି ଗଲାଦିନ ଛାଡିଗଲ ଚି଼ହ୍ନ

      ମନ ମୟୂରୀଟା ଶରାହତ

ମାର୍ମିକ ବେଦନା ଅଶ୍ରୁ ବିସର୍ଜନ

      ହୋଇଯାଉ ପରାହତ l 

ଅଳସୀ ଶ୍ରାବଣୀ ରୂପେ ନୃତ୍ୟରତ

      ନୟନେ କୋଣେ ବରଷିଗଲ

ମୁଖମଣ୍ଡଳରୁ  ଆଶା ପୋଛି ନେଇ

      ବିଷାଦ କାଳିମା ଲେପିଦେଲ l 

ତୃଣ ମୂଳ ଠାରୁ ବିଶ୍ୱ ବଜାରରେ

      ହଇଚଇ କେତେ ରଚାଇଲ 

କେତେ  ଘଟଣା ଦୁର୍ଘଟଣାସାକ୍ଷୀ 

       ସ୍ମୃତି ର ଗନ୍ତାଘର ସାଜିଲ l 

କାରୁଣ୍ୟର ପ୍ରତିଲିପି ରହିଗଲ

      ଲେଖିଦେଇ ଅଭୁଲା ଗଳପ

ସମୟ ବାଲୁକା ଶଯ୍ୟାରେ ଆଙ୍କିଲ

       କଳଙ୍କିତ ବେନି ପାଦଛାପ l 

ନବ ବରଷ ଆଗମନେ ସକଳେ 

      ସ୍ୱାଗତମେ ପ୍ରସ୍ତୁତି ପରବ 

ଆଶା ଭରସା ବିଶ୍ଵାସ କୁ ହୃଦୟେ 

    ଆଗାମୀର ସପନେ ମଗନ l 

ଜଗତ କରତା ହେ ବିଶ୍ୱ ନିୟନ୍ତା

    କରୁଣା ଟିକେ କର ସିଞ୍ଚନ

ଆତ୍ମପ୍ରତ୍ୟୟ ର ସାଜି ବାର୍ତ୍ତାବହ

     ନବ ବର୍ଷ କରୁ ଆଗମନ l 

ନର୍ମଦା ନାୟକ

ରାଉରକେଲା