ଜୟପାଟଣା:୦୧/୦୨(ମ ନି ସ) ଧାନ ଉତ୍ପାଦନରେ କଳାହାଣ୍ଡି ଜିଲ୍ଲା ଦେଶରେ ଅଗ୍ରଣୀ ଭୁମିକା ନେଇଥାଏ । ଜିଲ୍ଲାରେ ଏକତୃତୀଆଂଶ ଲୋକ କୃଷି ଉପରେ ନିର୍ଭରଶୀଳ । ତଥାପି ଅନ୍ୟକୁ ଖାଦ୍ୟ ଯୋଗାଉଥିବା ଚାଷୀଭାଇ ଜିଲ୍ଲାରେ ଅତ୍ୟନ୍ତ ଅନଗ୍ରସର । କଥାରେ ଅଛି ଚାଷ କାମ ଯାହାର କେଡେ ସୁଖ ତାହାର କିନ୍ତୁ ସ୍ଥାନୀୟ ଚାଷୀଙ୍କ ଅବସ୍ଥା ସମ୍ପୁର୍ଣ୍ଣ ବିପରୀତ ।
ଧାନ ଚାଷୀ ଧାର ଉଧାର କରି ଚାଷ କରିଥାଏ କିନ୍ତୁ ସରକାରଙ୍କର ସିଷ୍ଟମ ଓ ଦଲାଲ ମାନଙ୍କର ଶିକାର ହୋଇ ସର୍ବଦା ଶାଗ ମାଛ ଦରରେ ଧାନ ଗଣ୍ଡିଏ ଅନ୍ୟ ହାତକୁ ଟେକିଦିଏ । ଠିକ ସେହିପରି ପରିବା ଚାଷୀଙ୍କ ଭାଗ୍ୟ ବଜାରରେ ବସୁଥିବା ବ୍ୟବସାୟୀଙ୍କ ହାତରେ । ପରିବା ଚାଷୀ ଚଢା ଦରର ହାଇବ୍ରିଡ଼ ବିହନ ସାଙ୍ଗକୁ ରୋଗ ପୋକ ଦାଉରୁ ଫସଲକୁ ରକ୍ଷା କରିବା ପାଇଁ ଅନେକ ମୂଲ୍ୟବାନ ଅଧିକ ଦରର କୀଟନାଶକ ବ୍ୟବହାର କରିଥାଏ । 
ଜଳସେଚନ ପାଇଁ କିରାସିନି ଚାଳିତ ପମ୍ପ ବ୍ୟବହାର କରୁଛି କିରାସିନି ମୁଲ୍ୟ ଲିଟର ପିଛା ୯୦ଟଙ୍କା ପଡିଯାଉଛି । ବର୍ତ୍ତମାନ ପରିସ୍ଥିତିରେ କିରାସିନି ନମିଳିବାରୁ ବାଧ୍ୟହୋଇ ଚାଷୀ ଡିଜେଲ ପମ୍ପ କିଣି ବ୍ୟବହାର କରୁଛନ୍ତି ।ବାରିରେ କାମ କରିବାକୁ ଶ୍ରମିକଙ୍କର ଘୋର ଅଭାବ ।ଏତେ ସବୁ ସତ୍ୱେ ବିଭିନ୍ନ କିଷମର ପରିବା ମାତ୍ର ୫ଟଙ୍କା ୧୦ଟଙ୍କା ଦରରେ ମାର୍କେଟକୁ ଛାଡୁଛନ୍ତି । ଚାଷୀ ନିଜ ମଜୁରୀ ଖର୍ଚ୍ଚ ମଧ୍ୟ ବାହାର କରିପାରୁନଥିବା ଅଭିଯୋଗ କରୁଛନ୍ତି । 
ଜୟପାଟଣା ଅଞ୍ଚଳକୁ ପଡୋଶୀ ନବରଙ୍ଗପୁର,କୋରାପୁଟ,ଛତିଶଗଡ଼ ଇତ୍ୟାଦି ଅଞ୍ଚଳରୁ ପରିବା ଆସୁଥିବାରୁ ସ୍ଥାନୀୟ ଚାଷୀଙ୍କର ପରିବାର ଚାହିଦା କମି ଯାଉଥିବା ଅଭିଯୋଗ ହେଉଛି । ସରକାରଙ୍କୁ ବାରମ୍ବାର ଅଞ୍ଚଳରେ ଏକ ଶୀତଳ ଭଣ୍ଡାର ସ୍ଥାପନ ପାଇଁ ଚାଷୀକୁଳ ଦାବି କରି ଆସୁଛନ୍ତି ତାହା ମଧ୍ୟ ପୂରଣ ହେଉନାହିଁ । ଏତେସବୁ ଅସୁବିଧାରେ ଚାଷୀର ଆର୍ଥିକ ମାନଦଣ୍ଡ ଭାଙ୍ଗି ପଡୁଛି । ଚାଷୀର ପାରିବାରିକ ସମସ୍ୟା ମଧ୍ୟ ବଢ଼ିବାରେ ଲାଗିଛି । ଶିକ୍ଷା,ସ୍ୱାସ୍ଥ୍ୟ ଅନ୍ୟାନ୍ୟ ଆନୁଷଙ୍ଗିକ ଆବଶ୍ୟକତା ସମ୍ପାଦନ କରିବାରେ ପଛରେ ରହି ଯାଉଛି ଚାଷୀ । କୃଷି ବିଭାଗର ସ୍ଥାଣୁତା ଯୋଗୁଁ ହଟ୍ଟିକଲଚର ବିଭାଗରୁ ଅସଲି ଚାଷୀକୁ କୌଣସି ପ୍ରୋତ୍ସାହନ ଦିଆଯାଉନାହିଁ । ସମସ୍ତ ସରକାରୀ ସ୍କିମକୁ ବଡ଼ ବଡ଼ିଆ,ରାଜନୀତିଆ ଏବଂ ଯାହା ପ୍ରତି ବିଭାଗୀୟ କତ୍ତୃପକ୍ଷଙ୍କର ଭୟ ସେମାନଙ୍କୁ ଥଇଥାନ କରି ଯୋଜନା ଗୁଡିକୁ ଚଳୁ କରୁଥିବା ଅଭିଯୋଗ ହେଉଛି ।
ଜଗମୋହନ ପଟ୍ଟନାୟକ (ବରିଷ୍ଠ ସାମ୍ବାଦିକ)
