ରାଜ୍ୟସରକାର ମାଗିଥିଲେ ୮,୪୦୦ କୋଟି, ମିଳିଲା ୧୦ ହଜାର ୧୨ କୋଟି
୨୦୨୨-୨୩ ଆର୍ଥିକ ବର୍ଷରେ ମିଳିଥିଲା ୯୭୩୪ କୋଟି
ଖୋର୍ଦ୍ଧା-ବଲାଙ୍ଗୀରକୁ ୧୬୦୦ କୋଟି, ୫୭ ଷ୍ଟେସନ୍ ଉନ୍ନତି ହେବ
ଲିଙ୍ଗରାଜ ରୋଡ୍ ଷ୍ଟେସନରୁ ପୁରୀକୁ ଚାଲିବ ବନ୍ଦେ ମେଟ୍ରୋ ଟ୍ରେନ୍…..
କେନ୍ଦ୍ର ସରକାରଙ୍କ ବଜେଟ୍ରେ ଓଡ଼ିଶାରେ ରେଳ ବିକାଶ ପାଇଁ ୧୦ ହଜାର କୋଟିରୁ ବି ଅଧିକ ଟଙ୍କା ବ୍ୟୟବରାଦ କରାଯାଇଛି । ୨୦୨୩-୨୪ ଆର୍ଥିକ ବର୍ଷରେ ଓଡ଼ିଶା ପାଇଁ ରେଳ ଅନୁଦାନ ବାବଦରେ ରାଜ୍ୟ ସରକାର ୮୪୦୦ କୋଟି ଟଙ୍କା ମାଗିଥିଲେ । କିନ୍ତୁ କେନ୍ଦ୍ର ସରକାର ଓଡ଼ିଶା ମାଗିଥିବା ପରିମାଣଠୁ ପ୍ରାୟ ୧୬୧୨ କୋଟି ଟଙ୍କା ଅଧିକ ଆବଣ୍ଟନ କରିଛନ୍ତି । କେନ୍ଦ୍ର ସରକାର ବଜେଟ୍ରେ ରାଜ୍ୟରେ ରେଳ ବିକାଶ ପାଇଁ ୧୦ ହଜାର ୧୨ କୋଟି ଟଙ୍କା ଦେଇଛନ୍ତି ବୋଲି ରେଳମନ୍ତ୍ରୀ ଅଶ୍ୱିନୀ କୁମାର ବୈଷ୍ଣବ କହିଛନ୍ତି । ୨୦୨୨-୨୩ରେ ରେଳର ବିକାଶ ପାଇଁ ୯୭୩୪ କୋଟି ଟଙ୍କା ମିଳିଥିଲା । ହେଲେ ଚଳିତବର୍ଷ ଗତବର୍ଷ ତୁଳନାରେ ମଧ୍ୟ ଅଧିକ ମିଳିଛି । ପୂର୍ବରୁ ୨୦୦୯ରୁ ୨୦୧୪ ମଧ୍ୟରେ ରେଳର ବିକାଶ ପାଇଁ ହାରାହାରି ୮୩୮ କୋଟି ଟଙ୍କା ମିଳୁଥିଲା । ମାତ୍ର ଚଳିତବର୍ଷ ଏହି ଅନୁଦାନ ପାଖାପାଖି ୧୦୯୫% ବୃଦ୍ଧି ପାଇଛି ବୋଲି ରେଳ ବିଭାଗ ଦାବି କରିଛି ।
ସେହିପରି ଖୋର୍ଦ୍ଧା-ବଲାଙ୍ଗୀର ରେଳ ପ୍ରକଳ୍ପ ପାଇଁ ବଜେଟରେ ୧୬ ଶହ କୋଟି ଟଙ୍କା ବ୍ୟୟବରାଦ କରାଯାଇଛି । ବିଜୟନଗରମ ଓ ସମ୍ବଲପୁର ତୃତୀୟ ରେଳ ଲାଇନ୍ ପାଇଁ ୯୨୦ କୋଟି ଟଙ୍କା ବ୍ୟୟବରାଦ କରାଯାଇଛି । ତେବେ ଓଡ଼ିଶାରେ ୫୭ଟି ରେଳ ଷ୍ଟେସନର ଉନ୍ନତିକରଣ କରାଯିବ । ସେଥି ମଧ୍ୟରୁ ପୁରୀରେ ନିର୍ମାଣ କାର୍ଯ୍ୟ ଆରମ୍ଭ ହୋଇସାରିଛି । ବୈଜ୍ଞାନିକ ଜ୍ଞାନ କୌଶଳରେ କାମ କରାଯାଉଛି । ରାଜଧାନୀ ଭୁବନେଶ୍ୱର ଷ୍ଟେସନରେ ମଧ୍ୟ ଉନ୍ନତିକରଣ କାମ ପାଇଁ ଟେଣ୍ଡର୍ ପ୍ରକ୍ରିୟା ସରି ଠିକା ସଂସ୍ଥାକୁ ଦାୟିତ୍ୱ ଦିଆଯାଇଛି । ସେହିପରି ଲିଙ୍ଗରାଜ ରୋଡ୍ ଷ୍ଟେସନର ମଧ୍ୟ ବିକାଶ କରାଯିବ । ଭୁବନେଶ୍ୱର ବିମାନ ବନ୍ଦରରୁ ଲିଙ୍ଗରାଜ ରୋଡ୍ ଷ୍ଟେସନ୍କୁ ବ୍ୟାଟେରି ଓ ହାଇଡ୍ରୋଜେନ୍ ଗାଡି ଚାଲିବ । ଅନୁଗୁଳ, ବାଦାମପାହାଡ, ବଲାଙ୍ଗୀର, ବାଲେଶ୍ୱର, ବାଲୁଗାଁ, ବଡବିଲ୍, ବରଗଡ଼ ରୋଡ୍, ବାରିପଦା, ବରପାଲି, ବେଲପାହାଡ଼, ବେତନଟି, ଭଦ୍ରକ, ଭବାନିପାଟଣା, ଭୁବନେଶ୍ୱର, ବିମଳାଗଡ଼, ବ୍ରହ୍ମପୁର, ବ୍ରଜରାଜନଗର, ଛତ୍ରପୁର, କଟକ, ଦାମନଯୋଡି, ଢେଙ୍କାନାଳ, ଦାମନଯୋଡି, ଗୁଣୁପୁର, ହରିଶଙ୍କର ରୋଡ୍, ହୀରାକୁଦ, ଯାଜପୁର-କେନ୍ଦୁଝର ରୋଡ୍, ଜଳେଶ୍ୱର, ଜରୋଲି, ଜୟପୁର, ଝାରସୁଗୁଡ଼ା, ଝାରସୁଗୁଡ଼ା ରୋଡ୍, କଣ୍ଟାବାଞ୍ଜି, କେନ୍ଦୁଝରଗଡ଼, କୋରାପୁଟ, କେସିଙ୍ଗା, ଖରିଆର ରୋଡ୍, ଖୋର୍ଦ୍ଧା ରୋଡ୍, ଲିଙ୍ଗରାଜ ଟେମ୍ପଲ୍ ରୋଡ୍ ପ୍ରମୁଖ ଷ୍ଟେସନଗୁଡିକର ଉନ୍ନତିକରଣ କାର୍ଯ୍ୟ କରାଯିବ । ତେବେ ଖୋର୍ଦ୍ଧା ରୋଡ୍ ଷ୍ଟେସନ୍ର ଗୋଟିଏ ପାର୍ଶ୍ଵର କାମ ସରିଥିବା ବେଳେ ଶୀଘ୍ର ଦ୍ୱିତୀୟ ପାର୍ଶ୍ଵର କାମ ହେବ ବୋଲି ରେଳମନ୍ତ୍ରୀ ଅଶ୍ୱିନୀ କହିଛନ୍ତି ।
ବାହାରୁ ଆସୁଥିବା ପର୍ଯ୍ୟଟକଙ୍କ ସୁବିଧା ପାଇଁ ବିମାନବନ୍ଦରରୁ ଲିଙ୍ଗରାଜ ରୋଡ୍ ଷ୍ଟେସନ୍କୁ ବ୍ୟାଟେରି କିମ୍ବା ହାଇଡ୍ରୋଜେନ୍ ଗାଡ଼ି ଚଳାଇବା ବ୍ୟବସ୍ଥା କରାଯିବ । ମହାପ୍ରଭୁଙ୍କ ଦର୍ଶନ ପାଇଁ ସାରା ବିଶ୍ୱରୁ ଆସୁଥିବା ଲୋକ ଉପକୃତ ହୋଇପାରିବେ । ସୁନ୍ଦର ବିଶ୍ୱସ୍ତରୀୟ ଟ୍ରେନ୍ରେ ବସି ପୁରୀ ଯିବେ ଭକ୍ତ । ମଞ୍ଚେଶ୍ୱର, ମେରାମୁଣ୍ଡଳୀ, ମୁନିଗୁଡ଼ା, ନ୍ୟୁ ଭୁବନେଶ୍ୱର, ପାନପୋଷ, ପାରାଦୀପ, ପାରଳାଖେମୁଣ୍ଡି, ରଘୁନାଥପୁର, ରେଢାଖୋଲ, ରାଇରଙ୍ଗପୁର, ରାଜଗାଙ୍ଗପୁର, ରାୟଗଡ଼ା, ରାଉରକେଲା, ସାକ୍ଷୀଗୋପାଳ, ସମ୍ବଲପୁର, ସମ୍ବଲପୁର ସିଟି, ତାଳଚେର, ତାଳଚେର ରୋଡ୍ ଓ ଟିଟିଲାଗଡ଼ ଷ୍ଟେସନର ଉନ୍ନତିକରଣ କରାଯିବ ।
ରାଜ୍ୟରେ ୪.୫ କୋଟି ଓଡ଼ିଆଙ୍କ ସେବା କରିବା ପାଇଁ ସମସ୍ତେ ରାଜନୀତିରୁ ଉଦ୍ଧ୍ୱର୍ରେ ରହି କାର୍ଯ୍ୟ କରିବା ଦରକାର । ବିକାଶ ସହ ରାଜନୀତିକୁ ଯୋଡିବା ଠିକ୍ ନୁହେଁ । ତେବେ ଓଡ଼ିଶାରେ ଜମି ଅଧିଗ୍ରହଣରେ ବିଳମ୍ବ ଯୋଗୁଁ କେତେକ ରେଳପ୍ରକଳ୍ପର ନିର୍ମାଣ କାର୍ଯ୍ୟରେ ବିଳମ୍ବ ହେଉଛି । ତେଣୁ ଜମି ଅଧିଗ୍ରହଣ କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ରାଜ୍ୟ ସରକାର ସମସ୍ତ ବାଧା ଦୂର କରିବା ଆବଶ୍ୟକ ବୋଲି ରେଳମନ୍ତ୍ରୀ କହିଥିଲେ । ବନ୍ଦେ ଭାରତ ଟ୍ରେନ୍ ଭଳି ବନ୍ଦେ ଭାରତ ମେଟ୍ରା ୩୫-୫୦ କିମି ଥିବା ଷ୍ଟେସନ ଭିତରେ ଚାଲିବ । ଓଡ଼ିଶାରେ ପ୍ରଥମ ବନ୍ଦେ ଭାରତ ମେଟ୍ରା ଲିଙ୍ଗରାଜ ରୋଡ୍-ପୁରୀ ଭିତରେ ଚାଲିବା ଯୋଜନା ହୋଇଛି ।
ରାଜ୍ୟରେ ୨୮୦ କିମି ନୂଆ ରେଳଲାଇନ ନିର୍ମାଣ ଲାଗି ଚଳିତବର୍ଷ ୨୫୬୫ କୋଟି ଟଙ୍କା ବ୍ୟୟବରାଦ ହୋଇଛି । ସେହିପରି ଦ୍ୱିତୀୟ ରେଳ ଲାଇନ୍ ପାଇଁ ୩୮୦୦ କୋଟି ଟଙ୍କା ବ୍ୟୟବରାଦ କରାଯାଇଛି । ବହୁ ପ୍ରତୀକ୍ଷିତ ରାଉରକେଲା-ଝାରସୁଗୁଡ଼ା ୧୦୧ କିମି ତୃତୀୟ ଲାଇନ ନିର୍ମାଣ ପାଇଁ ୧୨୬ କୋଟି ଟଙ୍କା, ବନ୍ଧମୁଣ୍ଡା-ରାଉରକେଲା ଚତୁର୍ଥ ଲାଇନ ନିର୍ମାଣ ପାଇଁ ୩୯ କୋଟି, ଭଦ୍ରକ-ଖଡ଼ଗପୁର ପାଇଁ ୩୭ କୋଟି, ନାରାୟଣଗଡ଼-ଭଦ୍ରକ ୧୫୫ କିମି ତୃତୀୟ ଲାଇନ୍ ଇପାଇଁ ୫୦୫ କୋଟି ଟଙ୍କା ବ୍ୟୟବରାଦ ହୋଇଥିବା ପୂର୍ବତଟ ରେଳପଥ ମହାପ୍ରବନ୍ଧକ ମନୋଜ ଶର୍ମା ସୂଚନା ଦେଇଛନ୍ତି । ପୂର୍ବତଟ ରେଳପଥ ସାମ୍ବାଦିକ ସମ୍ମିଳନୀରେ ଅତିରିକ୍ତ ମହାପ୍ରବନ୍ଧକ ଶରତ କୁମାର ଶ୍ରୀବାସ୍ତବ, ପ୍ରମୁଖ ଯନ୍ତ୍ରୀ ଏନ୍ ଏସ୍ ଉଇକି, ମୁଖ୍ୟ ଲୋକ ସମ୍ପର୍କ ଅଧିକାରୀ ବିଶ୍ୱଜିତ୍ ସାହୁ ପ୍ରମୁଖ ଉପସ୍ଥିତ ଥିଲେ ।