ସକାଳର ଜଣାଣ
ଶ୍ରୀ ଜଗନ୍ନାଥ
ବିଜୟ କୁମାର ଜେନା
ଶ୍ରୀ ଶ୍ରୀ ଅକ୍ଷରରେ ଲକ୍ଷ୍ମୀ ଭକ୍ତି ପ୍ରୀତି
ଶୋଭା ପ୍ରଦାୟିନୀ ଶକ୍ତି
ସଂସାର କାରିଣୀ ଶକତି ରୂପରେ
ବିଦ୍ୟମାନ ଯଥା ରୀତି।
ଜ ସୂଚାଉ ଅଛି ଜନ୍ମ କେନ୍ଦ୍ର ସ୍ଥଳ
ସର୍ବ ଦେବତା ଉତ୍ପତ୍ତି
ଜଗନ୍ନାଥ ମୂର୍ତ୍ତୀ ଆପେ ଜନ୍ମ ଲଭି
ଜଗନ୍ମୟ ସେହି ଜ୍ୟୋତି।
ଗ ର ଅର୍ଥକୁ ଯେ ଧରି ନେବା ଆମେ
ଗଭୀର ଗୁହ୍ୟ ଅନନ୍ତ
ସିଏ ତ ଅଟନ୍ତି ଗୋଲକ ବିହାରୀ
ଦୁଃଖୀ ଦୁଃଖ ସନ୍ତାପିତ।
ନ୍ନା ହିଁ ନିର୍ବିକଳ୍ପ ବ୍ରହ୍ମ ନିରାକାର
ନିତ୍ଯ ନିର୍ମାୟା ନିର୍ମଳ
ନର୍କ ନିସ୍ତାରଣ ଅବିନାଶୀ ପ୍ରଭୁ
ନିରୀହର ଅତି ବଳ।
ଥ ଯେ ବୁଝାଉଛି ଧର୍ମ ସୁଦର୍ଶନ
ଅର୍ଥ କାମ ମୋକ୍ଷ ସ୍ଥାନ
ସ୍ଥାବର ଜଙ୍ଗମ ଅଷ୍ଟାଦଶ ସିଦ୍ଧି
ସର୍ବ ପ୍ରାଣୀ ହିତେ ଜାଣ।
ଶ୍ରୀ ଜଗନ୍ନାଥ ଙ୍କ ଶରଣ ନିଏ ମୁଁ
ଦିବା ରାତ୍ର ଏ ସଂସାରେ
ହେ ଆରାଧ୍ୟ ଦେବ ଶୁଣିବ ଗୁହାରୀ
ଏଇ ଭିକ୍ଷା ଶ୍ରୀ ପୟରେ ।
ଅବସର ପ୍ରାପ୍ତ ପ୍ରାଧ୍ୟାପକ
ଶାମୁକା ସାହି ରଣପୁର ନୟାଗଡ଼