ତିର୍ତ୍ତୋଲ :- 07/03/23:- ଋତୁରାଜ ବସନ୍ତ ଯେତେ ବେଳେ ଧରାପୃଷ୍ଟରେ ସବୁଜିମା ଭରିଦିଏ, ଠିକ କୋଇଲିର କୁହୁ ମୂର୍ଚ୍ଛନା ଜନମନ ମୋହିନେଉଥାଏ ! ଏହି ସମୟରେ ଫଗୁଣ ମାସର ଆଗମନ ସାଙ୍ଗକୁ ଓଡ଼ିଶାର କୋଣ ଅନୁକୋଣରେ ଫଗୁ ଦଶମୀ ତଥା ଦୋଳ ଦଶମୀ ଦିନଠାରୁ ରାଧାକୃଷ୍ଣଙ୍କର ମିଳିତ ଯୁଗଳ ମୂର୍ତ୍ତୀ ସ୍ୱତନ୍ତ୍ର ବିମାନରେ ଗ୍ରାମ ଭ୍ରମଣ କରିଥାନ୍ତି ! 
କେଉଁଠି କେଉଁଠି ଦୋଳ ମଣ୍ଡପ ମାନଙ୍କରେ ବିଭିନ୍ନ ଗ୍ରାମରୁ ଆସିଥିବା ବିମାନ ଗୁଡିକୁ ନେଇ ମେଲଣ କରାଯାଇଥାଏ ! ଯାନିଯାତ୍ରାରେ ଖୁସିର ମାହୋଲ ପୁରା ଜମିଯାଏ ! ବିକାକିଣା ଚାଲେ, କ୍ଷୀରିପୁରୀ, ପୀଠାପଣା ରେ ଆନନ୍ଦ ମନାନ୍ତି ଲୋକମାନେ ! 
ବିଶେଷ କରି ଗୋପାଳ ସାମ୍ପ୍ରଦାୟରେ ଗୋରୁ ଗାଈ ମହିଷୀ ଆଦିଙ୍କୁ ପୂଜାର୍ଚନା କରାଯାଇଥାଏ ! ସମସ୍ତ ପରିବାର ନୂତନ ବସ୍ତ୍ର ପରିଧାନ କରିଥାନ୍ତି ! ପୁରୁଷ ମାନେ ନୂଆ ବସ୍ତ୍ର ପିନ୍ଧି,ଗୋଠ କୁ ବାହୁଙ୍ଗୀ ଭାର ବହନକରି ଯାଇଥାନ୍ତି ଗୋଠ ପୂଜା ପାଇଁ ! 
ଗୋପାଳ ଯୁବା ମାନେ ହାତରେ କାଠି ଧରି ଲଉଡ଼ି ଖେଳି ଖେଳି, ଗୋପାଳ ଓଗାଳ ଗାନ କରି ପୁରୁଷ ମାନଙ୍କୁ ଗୋଠ ଯାଏ କଢେଇ ନେଇଥାନ୍ତି ! ଗୋପାଳ ଓଗାଳରେ କୃଷ୍ଣ ରାଧାଙ୍କ ପ୍ରେମ କାହାଣୀ ଜୀବନ୍ତ ହୋଇଉଠେ ! ନଟୁଚୋରି, ବସ୍ତ୍ର ଚୋରି, ଲବଣି ଚୋରି ଆଦି ବିଷୟକୁ ନେଇ ମହାପୁରୁଷ ଅଚ୍ୟୁତାନନ୍ଦ ଯୋଉ ଓଗାଳ କାବ୍ୟ ଲେଖିଯାଇଛନ୍ତି ! 
ତାହା ଗୋପାଳ ସାମ୍ପ୍ରଦାୟର ଗୀତିକବିତା ବା ଓଗାଳ ଭାବେ ପ୍ରଚଳିତ ହୋଇଆସୁଛି !ବାସ୍ତବରେ ଦୋଳ ପୂର୍ଣ୍ଣମୀର ରଙ୍ଗୀନ ବାତାବରଣ ବେଶ ଚିତାକର୍ଷକ ହୋଇଥାଏ ! ଏହି ପରମ୍ପରା କାହିଁ କେବେ ଠାରୁ ଚାଲିଆସୁଛି ! 
ଆମେ ଆପଣଙ୍କୁ ଦର୍ଶାଉଛୁ,ଜଗତସିଂହପୁର ଜିଲ୍ଲାର ତିର୍ତ୍ତୋଲ ବ୍ଲକ ଅଧିନସ୍ଥ ପୋଷଲ ଗ୍ରାମର ଗୋପାଳ ଭାଇ ମାନେ ଗୋଠ ପୂଜାକୁ ମହା ଆଡମ୍ବରରେ ଯାଇ ଗୋଠ ପୂଜା କରିଛନ୍ତି ! ଏହାସହିତ ବିଶନପୁର ପଞ୍ଚାୟତର କୋଲଟା ଗ୍ରାମସ୍ଥିତ ଗୋପାଳ ସମ୍ପ୍ରଦାୟ ମଧ୍ୟ ଯଥା ଵିଧି ଅନୁସାରେ ଗୋଠ ପୂଜା କରି ପଡୋଶୀ ମାନଙ୍କୁ ଖିରି ପିଠା ବଣ୍ଟନ କରିଛନ୍ତି !
ତିର୍ତ୍ତୋଲରୁ ଭାଗବତ ପ୍ରସାଦଙ୍କ ରିପୋର୍ଟ ମସୀହା ନ୍ୟୁଜ ଓଡିଶା !
