ଉପର ଦୁଣ୍ଡାରେ ଆଜି ଦ୍ୱିତୀୟଥର ଗ୍ରାମବାସୀଙ୍କ ଭୋଟ ବର୍ଜନ।
ଜୁନାଗଡ଼-
ଗତ ୧୬ ତାରିଖରେ ଜୁନାଗଡ଼ ବ୍ଲକ ରେ ତ୍ରିସ୍ତରୀୟ ପଞ୍ଚାୟତ ନିର୍ବାଚନ ରେ ଜୁନାଗଡ଼ ର ୩୯୦ ଟି ବୁଥରେ ଭୋଟ ଗ୍ରହଣ ପାଇଁ ବ୍ୟବସ୍ଥା କରାଯାଇଥିଲା । ଦୁର୍ଗମ ଅଞ୍ଚଳ ଦୁନ୍ଦେଲମାଲ ପଞ୍ଚାୟତ ର ଉପର ଦୁଣ୍ଡା ଗ୍ରାମକୁ ଭୋଟଦାନ ନିମନ୍ତେ ପୁଲିଂ ପାର୍ଟି ଯାଇଥିଲେ । ହେଲେ ସରକାରଙ୍କ ମୌଳିକ ଅଧିକାରରୁ ବଞ୍ଚିତ ହେଉଥିବା ଯୋଗୁଁ ଗ୍ରାମବାସୀ ଭୋଟ ବର୍ଜନ ପାଇଁ ଜିଦ ଧରିଥିଲେ । ପରେ ଗ୍ରାମବାସୀ ମାନେ ପୁଲିଂ ପାର୍ଟିକୁ ଫେରେଇ ଦେଇଥିଲେ । ନିର୍ବାଚନ ସରିଲା ପରେ ପ୍ରଶାସନ ପକ୍ଷରୁ ଏକ ଟିମ ଉପର ଦୁଣ୍ଡା ଗ୍ରାମକୁ ଯାଇ ଗ୍ରାମବାସୀଙ୍କୁ ବୁଝାଇଥିଲେ ଏବଂ ଆଜି ୨୩ ତାରିଖରେ ଭୋଟ ଦେବା ପାଇଁ ସମସ୍ତ ବନ୍ଦୋବସ୍ତ କରାଯାଇଥିଲା। ପ୍ରଶାସନ ପକ୍ଷରୁ ଉପର ଦୁଣ୍ଡା ରେ ବୁଥ ନ କରି ନିକଟସ୍ଥ ବାଙ୍କପଲାସ ପଞ୍ଚାୟତର ସାନ ଟିକ୍ରାଗୁଡା ଗ୍ରାମର ପ୍ରାଥମିକ ବିଦ୍ୟାଳୟରେ ବୁଥ କରିଥିଲେ । ହେଲେ ନଛୋଡ଼ବନ୍ଧା ଗ୍ରାମବାସୀ ଆଜି ମଧ୍ୟ ଭୋଟ ବର୍ଜନ କରିଥିଲେ ।ସୂଚନାଯୋଗ୍ୟ ଯେ ଏଠାରେ ଗୋଟିଏ ବୁଥ ରହିଥିବାବେଳେ ୨୯୮ ଜଣ ଭୋଟର ଅଛନ୍ତି। ଜୁନାଗଡ ରୁ ନରେନ୍ଦ୍ର ଖିତୀ ଙ୍କ ରିପୋର୍ଟ
