ବୋଲେରୋ ଗାଡ଼ି ସହ ୩୯ କେଜିରୁ ଅଧିକ ଗଞ୍ଜେଇ ଜବତ
କେସିଙ୍ଗା – ଏକ ବୋଲଲେରୋ ଗାଡିରେ ଗଞ୍ଜେଇ ଚୋରାଚାଲାଣ ହେଉଥିବା ବେଳେ କେସିଙ୍ଗା ଆଦର୍ଶ ଥାନା ପୋଲିସ ଧରପଗଡ କରି ୩୯ କେଜି ୯୬୬ ଗ୍ରାମ ଓଜନ ଗଞ୍ଜେଇ ଜବତ କରିଛି । ପୁଲିସ ଗଞ୍ଜେଇ ଜବତ କରିବା ସହ ସଂପୃକ୍ତ ବୋଲେରୋ ଗାଡ଼ି କୁ ଜବତ କରିଥିବା ବେଳେ ଏଥିରେ ସଂପୃକ୍ତ ୪ ଜଣକୁ ଗିରଫ କରିଛି । 
ଗିରଫ ୪ ଅଭିଯୁକ୍ତମାନେ ସମସ୍ତେ ବିହାର ରାଜ୍ୟର ବାସିନ୍ଦା ବୋଲି ଜଣାପଡିଛି । ସେମାନେ ବିହାର ରାଜ୍ୟର ଔରଙ୍ଗାବାଦ ଜିଲ୍ଲା ହସପୁର ଥାନା ଶଙ୍କରପୁର ଗ୍ରାମର ପ୍ରେମ କୁମାର (୨୪),ସଞ୍ଜିତ କୁମାର ଓରଫ୍ ଭୋଲା (୨୦), ଭରୁଣ ଥାନା ରକସାନି ଗ୍ରାମର ମୁକେଶ କୁମାର (୨୮) ଓ ଆରଓ୍ବାଲ ଜିଲ୍ଲା କାରପି ଥାନା ବାସନବିଘା ଗ୍ରାମର ରାନ୍ଧିର କୁମର (୩୩) ବୋଲି ପୁଲିସ ପ୍ରକାଶ କରିଛି । 
ମିଳିଥିବା ସୂଚନା ଅନୁଯାୟୀ, କୋରାପୁଟ ଜିଲ୍ଲା ସିମିଳିଗୁଡା ଅଞ୍ଚଳ ରୁ ଜେଏଚ୍ ୦୧ ଆର୍ ୭୧୧୮ ନମ୍ବର ବିଶିଷ୍ଟ ଏକ ବୋଲେରୋ ଗାଡ଼ି ରେ ବିହାର ରାଜ୍ୟକୁ ଗଞ୍ଜେଇ ଚୋରା ଚାଲାଣ ହେଉଥିଲା । ତେବେ, କୌଣସି ସୂତ୍ରରୁ ଖବର ପାଇ କେସିଙ୍ଗା ଆଦର୍ଶ ଥାନା ଆଇଆଇସି ସତ୍ୟକୁମାର ନନ୍ଦଙ୍କ ନେତୃତ୍ୱରେ ପୋଲିସ୍ ଉକ୍ତ ବୋଲେରୋ ଗାଡ଼ି କୁ ଜାତୀୟ ରାଜପଥ ୨୬ରେ ତହସିର ଗାଁ ନିକଟରେ ଅଟକାଇ ଯାଞ୍ଚ କରିଥିଲା । ପୋଲିସର ଯାଞ୍ଚ ବେଳେ ବୋଲେରୋ ଗାଡ଼ି ଭିତରେ ଗଞ୍ଜେଇ ରହିଥିବା ନେଇ ଜଣାପଡିଥିଲା । ମାଜିଷ୍ଟ୍ରେଟ ଭାବରେ କେସିଙ୍ଗା ଅତିରିକ୍ତ ତହସିଲଦାର ରୁଦ୍ରମଣି ନାଏକ ଙ୍କ ଉପସ୍ଥିତିରେ ବୋଲେରୋ ଗାଡ଼ିର ଚେମ୍ବର ଭିତରୁ 39..966 କେଜି ଗଞ୍ଜେଇ ବାହାର କରାଯାଇଥିଲା । କେସିଙ୍ଗା ପୋଲିସ୍ ଉକ୍ତ ଗଞ୍ଜେଇ ଓ ବୋଲେରୋ ଗାଡ଼ି କୁ ଜବତ କରି ଏକ ମାମଲା ରୁଜୁ କରିଥିବା ବେଳେ ୪ ଜଣକୁ ଗିରଫ କରିଛି । ଏ ନେଇ ଆହୁରି ତଦନ୍ତ ଜାରି ରହିଛି ବୋଲି ଆଇଆଇସି ସତ୍ୟ କୁମାର ନନ୍ଦ ସୂଚନା ଦେଇଛନ୍ତି ।
ଏଲ. କୋଟେଶ୍ୱର ନାଇଡୁ ଙ୍କ ରିପୋର୍ଟ
