ସବୁଠୁ ଅଧିକ ଜଳସ୍ରୋତ ରହିଛି ପଶ୍ଚିମବଙ୍ଗ ରାଜ୍ୟରେ….
ଦେଶରେ ବର୍ତ୍ତମାନ ସୁଦ୍ଧା ଅଛି କେତୋଟି ଜଳସ୍ରୋତ? ସେନେଇ ପ୍ରଥମ ଥର ପାଇଁ ହୋଇଛି ଗଣନା । ଦେଶର ଜଳ ଶକ୍ତି ମନ୍ତ୍ରାଳୟ ଏନେଇ ରିପୋର୍ଟ ପ୍ରକାଶ କରିଛି । ସାରା ଦେଶରେ କେତୋଟି ପୋଖରୀ, ହ୍ରଦ ଓ ଜଳାଶୟ ଅଛି ସେ ନେଇ ତଥ୍ୟ ପ୍ରକାଶ କରାଯାଇଛି । ତେବେ ୨୦୧୮-୧୯ରେ କରାଯାଇଥିବା ଏହି ଗଣନା ମୁତାବକ ଏବେ ଦେଶରେ ମୋଟ ୨୪ ଲକ୍ଷ ଜଳସ୍ରୋତ ଥିବାବେଳେ, ସବୁଠୁ ଅଧିକ ଜଳସ୍ରୋତ ରହିଛି ପଶ୍ଚିମବଙ୍ଗ ରାଜ୍ୟରେ ।
ରିପୋର୍ଟ ମୁତାବକ, ଦେଶର ପଶ୍ଚିମବଙ୍ଗ ରାଜ୍ୟରେ ସବୁଠୁ ଅଧିକ ଜଳସ୍ରୋତ ରହିଛି । ତା ପଛକୁ ଉତ୍ତର ପ୍ରଦେଶ, ଆନ୍ଧ୍ରପ୍ରଦେଶ, ଓଡିଶା ଓ ଆସାମରେ ସବୁଠୁ ଅଧିକ ଜଳସ୍ରୋତ ରହିଛି । ଖାସ୍ କଥା ହେଉଛି, ଜଳସ୍ରୋତକୁ ନେଇ ଗ୍ରାମୀଣ ଅଞ୍ଚଳ ଓ ସହରାଞ୍ଚଳ ଭିତରେ ବଡ ଧରଣର ପାର୍ଥକ୍ୟ ଦେଖିବାକୁ ମିଳିଛି । ଦେଶରେ ଯେତିକି ବି ଜଳସ୍ରୋତ ରହିଛି, ତା ଭିତରୁ ପ୍ରାୟ ୯୭ ପ୍ରତିଶତ (୨୩,୫୫,୦୫୫) ଜଳସ୍ରୋତ କେବଳ ଗ୍ରାମୀଣ ଅଞ୍ଚଳରେ ରହିଛି । ସେହିପରି ବାକି ୨.୯ ପ୍ରତିଶତ (୬୯,୪୮୫) ଜଳସ୍ରୋତ ସହରାଞ୍ଚଳରେ ରହିଛି ।
ଜଳଶକ୍ତି ମନ୍ତ୍ରାଳୟର ମୁଖପାତ୍ରଙ୍କ ସୂଚନା ମୁତାବକ, ଏହି ଗଣନା ଦେଶରେ ଥିବା ସମସ୍ତ ଜଳସ୍ରୋତର ବ୍ୟାପକ ତଥ୍ୟ ପ୍ରଦାନ କରୁଛି । ଏମାନଙ୍କ ଭିତରୁ ୨୨ ପ୍ରତିଶତ ଜଳସ୍ରୋତ ପ୍ରାକୃତିକ ହୋଇଥିବାବେଳେ, ୭୮ ପ୍ରତିଶତ ଜଳସ୍ରୋତ ହେଉଛି ମାନବ ନିର୍ମିତ । ସେହିପରି ଦେଶରେ ଥିବା ସମସ୍ତ ଜଳସ୍ରୋତ ମଧ୍ୟରୁ ୫୫.୨ ପ୍ରତିଶତ ଜଳସ୍ରୋତ ବ୍ୟକ୍ତିଗତ ଲୋକ ଓ ସଂସ୍ଥା ହାତରେ ଥିବାବେଳେ, ୪୪.୮ ପ୍ରତିଶତ ଜଳସ୍ରୋତ ସରକାରୀ ନିୟନ୍ତ୍ରଣରେ ରହିଛି । ତେବେ ଦେଶରେ ସବୁଠୁ ଅଧିକ ହ୍ରଦ ତାମିଲନାଡୁରେ ଥିବାବେଳେ, ସବୁଠୁ ଅଧିକ ଜଳସଂରକ୍ଷଣ ଯୋଜନା ମହାରାଷ୍ଟ୍ରରେ ରହିଛି । ଅନ୍ୟପଟେ ରିପୋର୍ଟ ମୁତାବକ, ଉତ୍ତରପ୍ରଦେଶରେ ମୋଟ ୨.୪୫ ଲକ୍ଷ ଜଳସ୍ରୋତ ଥିବାବେଳେ, ଆନ୍ଧ୍ରପ୍ରଦେଶରେ ୧.୯୦ ଲକ୍ଷ ଜଳସ୍ରୋତ, ଓଡିଶାରେ ୧.୮୧ ଲକ୍ଷ ଜଳସ୍ରୋତ ରହିଛି । ତା ସହିତ ଆସାମରେ ୧.୭୨ ଲକ୍ଷ, ଝାଡଖଣ୍ଡରେ ୧.୦୭ ଲକ୍ଷ ଓ ତାମିଲନାଡୁରେ ୧.୦୬ ଲକ୍ଷ ଜଳସ୍ରୋତ ରହିଛି ।
ରିପୋର୍ଟରେ କୁହାଯାଇଛି ଦେଶରେ ଥିବା ମୋଟ ଜଳସ୍ରୋତ ମଧ୍ୟରୁ ୮୨ ପ୍ରତିଶତ ଜଳସ୍ରୋତ ଲୋକଙ୍କ ଉପଯୋଗରେ ଆସୁଛି । ଯେତେବେଳେ ବି ୧.୬ ପ୍ରତିଶତ ଜଳସ୍ରୋତ ଉପରେ ଜବରଦଖଲ ରହିଛି।
ବିଦ୍ୟାଧର ସାହୁଙ୍କ ରିପୋର୍ଟ…..
