ବାଲେଶ୍ଵର,୧୭/୭/୨୩- ବାଲେଶ୍ଵର ଜିଲ୍ଲା ଖଇରା ବ୍ଲକ ପରିସରରେ ଥିବା ଶିକ୍ଷକ ଭବନ ଗୃହ ମଧ୍ୟରେ ମିଳିତ ଜନଶୁଣାଣୀ ଶିବିର ଅନୁଷ୍ଠିତ ହୋଇଯାଇଛି । ଏଥିରେ ଜିଲ୍ଲାପାଳ ଦତାତ୍ରେୟ ଭାଉ ସାହେବ ସିନ୍ଧେ, ଏସପି ସାଗରିକା ନାଥ ଓ ଉପଜିଲ୍ଲାପାଳ କୁନାଲ ଚୌହାନ ପ୍ରମୁଖ ଯୋଗ ଦେଇଥିଲେ । ଜନସାଧାରଣଙ୍କ ତରଫରୁ ବିଭିନ୍ନ ସମସ୍ୟା ବିଷୟରେ ମୋଟ ୧୪୩ଟି ଅଭିଯୋଗ ପଞ୍ଜିକରଣ ହୋଇଥିଲା । ଜିଲ୍ଲାପାଳ ମହୋଦୟ ସମସ୍ତ ଅଭିଯୋଗକାରୀଙ୍କୁ ସନ୍ତୋଷ ଜନକ ଉତ୍ତର ଦେବା ସହିତ ତୁରନ୍ତ ପଦକ୍ଷେପ ନିମନ୍ତେ ବିଭାଗୀୟ ଅଧିକାରୀ ମାନଙ୍କୁ ନିର୍ଦ୍ଦେଶ ଦେଇଥିଲେ ଏବଂ ଅଭିଯୋଗ ପତ୍ରକୁ ସମ୍ପୃକ୍ତ ବିଭାଗକୁ ପଠାଇବା ନିମନ୍ତେ ପରାମର୍ଶ ଦେଇଥିଲେ । ଏଥିରେ ଅଧିକାଂଶ ବିଭାଗର ଅଧିକାରୀ ମାନେ ଅନୁପସ୍ଥିତ ଥିବାର ଦୃଷ୍ଟି ଗୋଚର ହୋଇଥିଲା । ବଡ଼ ଦୁଃଖର କଥା ଆଗରୁ ମିଳିତ ଜନଶୁଣାଣୀ ପୂର୍ବରୁ ଡାକବାଜି ଯନ୍ତ୍ର ମାଧ୍ୟମରେ ଜନସାଧାରଣ ମାନଙ୍କୁ ଅବଗତ କରାଯାଉଥିଲା, ମାତ୍ର ବର୍ତ୍ତମାନ ତାହା କରାଯାଉ ନାହିଁ ? ଏହାର କାରଣ ଦୁର୍ନୀତି ପଦାରେ ପଡିବା ନୁହେଁ ତ ? ଯଦି ଲୋକଙ୍କ ସମସ୍ୟା ସମାଧାନ ନିମନ୍ତେ ମିଳିତ ଜନଶୁଣାଣୀର ଆୟୋଜନ, ତା’ ହେଲେ ପୂର୍ବପରି ଡାକବାଜି ଯନ୍ତ୍ର ମାଧ୍ୟମରେ ଅବଗତ କରାଯାଉନାହିଁ କାହିଁକି ?
କୁପାରି ମୌଜାରେ ଇଡ୍କୋ(IDCO) MSME ଶିଳ୍ପ ପ୍ରତିଷ୍ଠା ପାଇଁ ଦିଆଯାଇଥିବା କେତେକ ଖସଡ଼ା(ପ୍ଲଟ)ର ପରିବର୍ତ୍ତନ ନିମନ୍ତେ କୁପାରି ଗ୍ରାମ ପଞ୍ଚାୟତ ସରପଞ୍ଚ ଜ୍ଯୋତ୍ସ୍ନାରାଣୀ ଦାସ, ସମିତି ସଭ୍ୟ ଅକ୍ଷୟ କୁମାର ଜେନା ଓ ଜିଲ୍ଲାପରିଷଦ ସଭ୍ୟ ଗଜେନ୍ଦ୍ର ପ୍ରସାଦ ଦାସଙ୍କ ସମେତ ଶ୍ଯାମସୁନ୍ଦର ମୁଖୀ, ରବୀନ୍ଦ୍ର ପ୍ରସାଦ ମଲ୍ଲିକ, ବିଜୟ ଶଙ୍ଖୁଆ, ବାଇଧର ଯେନା, ଭଗବାନ ସିଂ, ପୁଷ୍ପଲତା ଜେନା, ନୟନା ମହାନ୍ତି, ବିଜୟ ଗିରି, ସୁବାସିନୀ ନାଇକ, ଅନନ୍ତ ଦେହୁରୀ ଓ ଶଶିକାନ୍ତ ବିନ୍ଧାଣି ପ୍ରମୁଖ ଗ୍ରାମବାସୀ ମାନେ ଅଭିଯୋଗ ପ୍ରଦାନ କରିଥିଲେ ।
ସେହିପରି ପଦ୍ମଲୋଚନ ଦାସ ଆଳଦା ମୌଜାରେ ଥିବା ଶ୍ମଶାନ ଓ ପ୍ରାଣୀ ଚିକିତ୍ସାଳୟରେ ମଞ୍ଜରୀ ପ୍ରାପ୍ତ ୪ଟି ପଦବୀ ଏପର୍ଯ୍ୟନ୍ତ ଖାଲି ପଡିଥିବା ବିଷୟରେ ଜିଲ୍ଲାପାଳଙ୍କ ନିକଟରେ ଅଭିଯୋଗ ଦାଖଲ କରିଥିଲେ ।।