ଜଗତପୁର,୨୯/୦୭:ରାଜ୍ୟର କୋଣ ଅନୁକୋଣରୁ ବଚ୍ଛା ବଚ୍ଛା ବଣମଲ୍ଲି ବାହାର କରିବା ପାଇଁ ଘରୋଇ ଟିଭି ଚ୍ୟାନେଲ ଜୀସାର୍ଥକରେ ପ୍ରସାରିତ ହେଉଛି ରିୟଲିଟି ସୋ ରଜକୁଇନ | ଏହି ରିୟଲିଟି ସୋ ରଜକୁଇନ ୨୦୨୩ର ବିଜୟୀ ମୁକୁଟ ପିନ୍ଧିଛନ୍ତି ଜଗତପୁର ଅଞ୍ଚଳର ଚମ୍ପତ୍ତି ପଞ୍ଚାୟତ ଅନ୍ତର୍ଗତ ମଠସାହିର ଝିଅ ସାନିଆ ଖାତୁନ୍ | ସହରର ଆଲିସାନ ବଙ୍ଗଳାରେ ରହି ସମସ୍ତ ସୁବିଧା ତଥା ପ୍ରୋତ୍ସାହନ ପାଇ କୌଣସି କ୍ଷେତ୍ରରେ ପ୍ରଶଂସିତ ହେବାକୁ ଭୁଲ୍ ପ୍ରମାଣିତ କରିପାରିଛନ୍ତି ସାନିଆ | ନିଜର ଇଚ୍ଛାଶକ୍ତି, କର୍ତ୍ତବ୍ୟ ତଥା କଠିନ ପରିଶ୍ରମ ଆଗରେ ସମସ୍ତ ଫିକାପଡିଥାଏ | ପଙ୍କରୁ ପଦ୍ମ ଫୁଟିଲା ପରି ଏହାକୁ ପ୍ରମାଣ କରି ପାରିଛନ୍ତି ଭଙ୍ଗା ଆଜବେଷ୍ଟସ ଘରେ ରହୁଥିବା ସେଖ୍ ଅଖତର ଅଲ୍ଲି ଓ ରିନା ବିବିଙ୍କ ୧୫ବର୍ଷର ସାନ ଝିଅ ସାନିଆ ଖାତୁନ୍ | ସେଖ୍ ଅଖତର କଲିକତାର ମୁଳ ବାସିନ୍ଦା ହୋଇଥିବା ବେଳେ ଦୀର୍ଘ ୨୦ବର୍ଷ ହେବ ମଠସାହିରେ ଭଙ୍ଗା ଆଜବେଷ୍ଟସ ଘର କରି ରହିଆସୁଛନ୍ତି | ବାପା ମାଆ ଦୁହେଁ ଦିନ ମଜୁରିଆ ଭାବେ କାମ କରି ପରିବାର ଚଳାଉଛନ୍ତି | ସାନିଆ ଗତ ଦଶମ ବୋର୍ଡ ପରୀକ୍ଷାରେ ରାଜକିଶୋର ବିଦ୍ୟାପୀଠରୁ ପ୍ରଥମ ଶ୍ରେଣୀରେ ଉତ୍ତୀର୍ଣ୍ଣ ହୋଇ ଚଳିତ ବର୍ଷ ଯୁକ୍ତ ଦୁଇ ପ୍ରଥମ ବର୍ଷରେ ଆଡମିଶନ କରିଛନ୍ତି | ଜୀସାର୍ଥକରେ ପ୍ରସାରିତ ହେଉଥିବା ରିଅଲିଟି ସୋ ରଜକୁଇନରେ ପ୍ରଥମେ କଟକର ସାରଳା ଭବନରେ ପ୍ରି ଅଡିସନରେ ଭାଗନେଇ ବିଚାରକଙ୍କ ମନ ଜିଣିପାରିଥିଲେ | ଦୀର୍ଘ ଚାରି ମାସ ପରେ ଏହାର ଗ୍ରାଣ୍ଡ ଫାଇନାଲ ସୋ ଜଗତପୁର ସ୍ଥିତ ଜୀସାର୍ଥକ ଷ୍ଟୁଡିଓରେ ଅନୁଷ୍ଠିତ ହୋଇଥିଲା | ଏହି ଗ୍ରାଣ୍ଡ ଫାଇନାଲ ପ୍ରତିଯୋଗୀତାରେ ଭାଗ ନେଇଥିବା ୧୨ଜଣ ପ୍ରତିଯୋଗୀଙ୍କ ମଧ୍ୟରୁ ସାନିଆଙ୍କୁ ଶ୍ରେଷ୍ଠ ପ୍ରତିଯୋଗୀ ଭାବେ ବିବେଚିତ କରାଯାଇ ବିଜୟୀ ମୁକୁଟ ପିନ୍ଧା ଯାଇଥିଲା | ସାନିଆଙ୍କ ଏହି ସଫଳତା ପାଇଁ ଚାରିଆଡୁ ପ୍ରଶଂସାର ସୁଅ ଛୁଟୁଥିବା ବେଳେ ସ୍ଥାନୀୟ ଅଞ୍ଚଳରେ ଖୁସିର ଲହରି ଖେଳିଯାଇଛି | ଭବିଷ୍ୟତରେ ଜଣେ ସଫଳ ଅଭିନେତ୍ରୀ ହେବା ପାଇଁ ସେ ଲକ୍ଷ୍ୟ ରଖିଛନ୍ତି |
କଟକ ରୁ ସୁକାନ୍ତ ମହାପାତ୍ରଙ୍କ ରିପୋର୍ଟ୍
