ଗୋଳାମୁଣ୍ଡା/1/9/23 /ନିର୍ଭୟ, ନିରପେକ୍ଷ ମସିହା/ କଳାହାଣ୍ଡି ଜିଲ୍ଲା ଗୋଳାମୁଣ୍ଡା ବ୍ଲକରେ ଅନିୟମିତତା ବର୍ଷା ଯୋଗୁଁ ସମ୍ପୂର୍ଣ୍ଣ ଗଜା ମରୁଡି ଦେଖା ଦେଇଛି । ବ୍ଲକରେ ୨୮ ଗୋଟି ପଞ୍ଚାୟତ ଥିବା ବେଳେ ଚାଷୀଙ୍କ ପାଇଁ ପ୍ରତି ପଞ୍ଚାୟତରେ ଚାରି ରୁ ପାଞ୍ଚଟି ଲେଖାଏଁ ଚେକଡ୍ୟାମ ଗୁଡିକ ନିର୍ମାଣ କରାଯାଇଥିଲେ ସୁଦ୍ଧା କାମରେ ଆସୁ ନ ଥିବାରୁ ଚାଷୀ ମହଲରେ ଅସନ୍ତୋଷ ପ୍ରକାଶ ପାଇଛି । ଚାଷୀଙ୍କ କହିବା ଅନୁଯାୟୀ ଚେକଡ୍ୟାମ ଗୁଡିକ ଠିକାଦାର, ରାଜନେତା ଓ କର୍ମଚାରୀଙ୍କ ପାଇଁ ତିଆରି ହୋଇଛି ଚାଷୀଙ୍କ ପାଇଁ ତିଆରି ହୋଇ ନାହିଁ ବୋଲି ବୁଦ୍ଧିଜୀବି ମହଲରେ ଚର୍ଚ୍ଚା ହେଉଛି । ବ୍ଲକର କେତେ ପଞ୍ଚାୟତ ରୁଆ ବେଉଷଣ କାର୍ଯ୍ୟ ସରିଥିବା ବେଳେ ଆଉ କେତେ ପଞ୍ଚାୟତ ରୁଆ ବେଉଷଣ ହୋଇପାରି ନାହିଁ । ବର୍ତ୍ତମାନ ବର୍ଷା ଋତୁ ଶେଷ ହେଲାଣି ଜମି ବାଡ଼ିରେ ପାଣି ଟୋପାଏ ଦେଖିବାକୁ ମିଳୁନି । ଯେଉଁ ଜମି ଗୁଡିକ ରୁଆ ବେଉଷଣ ହୋଇଥିଲେ ସୁଦ୍ଧା ସେହି ଜମିଗୁଡିକ ଫାଟି ଆଁ କଲାଣି । ଯଦି ବ୍ଲକ ସ୍ତରୀୟ ଚେକଡ୍ୟାମ ଚାଷୀଙ୍କ କାମରେ ଆସନ୍ତା ହେଲେ କିଛି ଜମିଗୁଡିକ ମରୁଡ଼ିରୁ ବଞ୍ଚିତ ହୋଇଥାନ୍ତା ବୋଲି ଚାଷୀ ମହଲରେ ଚର୍ଚ୍ଚା ହେଉଛି । ସରକାର ଜୟ ଯବାନ ଜୟ କିଷାନ ନାରାବାଜି ଦେଉଥିବା ବେଳେ ଚାଷୀଙ୍କ ପ୍ରତି କଣ କରିଛନ୍ତି ବୋଲି ଚାଷୀ ମହଲରେ ପ୍ରଶ୍ନ ଉଠିଛି । ଚାଷୀ ବ୍ୟାଙ୍କ ଋଣ କିମ୍ବା ହାତ କରଜ କରି ଚାଷ କରିଥିବା ବେଳେ ଅଭାବି ବର୍ଷା ଚାଷୀଙ୍କ ପାଇଁ ବାଧକ ସାଜିଛି । ଏପରି ସ୍ଥିତିରେ ଚାଷୀ ବ୍ୟାଙ୍କ ଋଣ ସୁଝିବ ନା ନିଜର ପରିବାର ପ୍ରତିପୋଷଣ କରିବ ଚିନ୍ତାରେ ଚାଷୀକୁଲ । ଏପଟେ ଭୟାଭୟ ମରୁଡି ଦେଖାଦେଇଥିବା ବେଳେ କୃଷି ବିଭାଗ କର୍ମଚାରୀ ମାନେ ନିରବ ଦ୍ରଷ୍ଟା ସାଜିଛନ୍ତି । ଗତ ମଙ୍ଗଳବାର ଦିନ ନକଟିକାନି ଗ୍ରାମପଞ୍ଚାୟତକୁ ତୁରନ୍ତ ମରୁଡି ଘୋଷଣା କରାଯାଉ ବୋଲି ଗୋଲାମୁଣ୍ଡା ତହସିଲଦାର ଏବଂ କୃଷି ଅଧିକାରୀଙ୍କୁ ଉକ୍ତ ପଞ୍ଚାୟତର ଅନେକ ଚାଷୀ ଦାବିପତ୍ର ଦେଇ ଆସନ୍ତା ୮ଦିନ ଭିତରେ ମରୁଡି ଘୋଷଣା ନ କଲେ ତହସିଲ ଅଫିସ ଘେରାଓ କରାଯିବ ବୋଲି ଚେତାବନୀ ଦେଇଛନ୍ତି । ଏ ଉପରେ ଜିଲ୍ଲା ପ୍ରଶାସନ ଦୃଷ୍ଟି ଦେଇ ବ୍ଲକ କୃଷି ବିଭାଗ ସହ ଗୋଳାମୁଣ୍ଡା ବ୍ଲକ ସମସ୍ତ ପଞ୍ଚାୟତ ତଦନ୍ତ କରି ସହାୟତା ଦେବାକୁ ଚାଷୀ ମହଲରେ ଦାବି ହେଉଛି ।