ଝରିଗାଁ ବ୍ଲକର ୬୭ଗାଁ କୁ ନାହିଁ ପକ୍କା ରାସ୍ତା
ନବରଙ୍ଗପୁର(ମସିହା)-ଦେଶକୁ ସ୍ୱାଧୀନତାର ୭୭ବର୍ଷ ପୂର୍ଣ୍ଣ ହୋଇଯାଇଛି |ନିକଟରେ ଜି -୨୦ସମ୍ମିଳନୀରେ ପ୍ରତିନିଧିତ୍ବ ମଧ୍ୟ କରିଛି |କେନ୍ଦ୍ର ରୁ ରାଜ୍ୟ ସବୁଠି ବିକାଶର କଥା ଚର୍ଚ୍ଚା ହେଉଛି |ବାସ୍ତବରେ ରାଜ୍ୟରେ ଅନେକ ଗାଁ ରହିଛି ଯେଉଁଠି ବିକାଶର ପାଦ ବି ପଡ଼ିନାହିଁ |ବଦଳି ପାରିନାହିଁ ଉପାନ୍ତ ଅଞ୍ଚଳର ବିକଳ ଚିତ୍ର |ନବରଙ୍ଗପୁର ଜିଲ୍ଲା ଝରିଗାଁ ବ୍ଲକର ୬୭ଗାଁକୁ ଏଯାଏ ପକ୍କା ରାସ୍ତା ଟିଏ ହୋଇପାରିନି |ଏହାର ପ୍ରଭାବରେ ସମ୍ପୃକ୍ତ ଅଞ୍ଚଳରେ ଶିକ୍ଷା, ସ୍ୱାସ୍ଥ୍ୟ ଏବଂ ବିଜୁଳି ମଧ୍ୟ ପହଞ୍ଚି ପାରିନି |କେନ୍ଦ୍ର ଓ ରାଜ୍ୟ ସରକାର ବିକାଶ ଲାଗି ଯୋଜନା କରୁଛନ୍ତି |ସମ୍ପୃକ୍ତ ଯୋଜନା ଗୁଡିକର କିଭଳି ସଫଳ ରୂପାୟନ ହେଉଛି ଏଥିରୁ ଅନୁମେୟ |ଝରିଗାଁ ବ୍ଲକବାସୀଙ୍କ ମୁଖ୍ୟ ଆୟୁଧ ହେଉଛି କୃଷି |ଚାଷ କରି ବଂଚିବା ଲାଗି ବ୍ଲକ ର ବିଭିନ୍ନ ଉପାନ୍ତ ଅଂଚଳରେ ଜନବସତି ଗଢିଛନ୍ତି ଲୋକେ |ଉପାନ୍ତ ଅଞ୍ଚଳ ଗାଁ ଗୁଡିକରେ କେଉଁଠି ୧୫ ପରିବାର ତ ଆଉ କେଉଁଠି ୨୫ପରିବାର ରୁ ଅଧିକ ପରିବାର ବସବାସ କରୁଛନ୍ତି |ବ୍ଲକ ର ଅଧିକାଂଶ ଗାଁ ସୀମାନ୍ତ ପଞ୍ଚାୟତ ଗୁଡିକରେ ରହିଛି |ସେଥିରୁ ୯୦ପ୍ରତିଶତ ଗାଁ ରିଜର୍ଭ ଜଙ୍ଗଲ ମଧ୍ୟରେ ରହିଛି |ଜବର ଦଖଲ କରି ରହୁଥିବାରୁ ସମ୍ପୃକ୍ତ ଅଞ୍ଚଳର ସଠିକ ବିକାଶ ହୋଇପାରୁନାହିଁ |ପକ୍କା ରାସ୍ତା ନିର୍ମାଣ ହୋଇପାରୁନି |ପାଦଚଲା ରାସ୍ତା ଆଜିବି ସେମାନଙ୍କ ଭରସା |ସ୍ଥାନୀୟ ଜନସ୍ୱାସ୍ଥ୍ୟ ସମ୍ପ୍ରସାରଣ ଅଧିକାରୀ ଗୋପାଳ କୃଷ୍ଣ ପାଢ଼ୀଙ୍କ ଅନୁଯାୟୀ,ବ୍ଲକର ୬୭ଗାଁ କୁ ଗମନାଗମନ ସୁବିଧା ନାହିଁ |୨୭ଖଣ୍ଡ ଗାଁକୁ ଗମନାଗମନ ପାଇଁ ଅନୁକୂଳ ରାସ୍ତା ନାହିଁ |ବର୍ଷାଦିନେ ୪୦ଖଣ୍ଡ ଗାଁ କୁ ଯୋଗାଯୋଗ ବିଛିନ୍ନ ସମସ୍ୟା ଲାଗି ରହୁଛି |ସମ୍ପୃକ୍ତ ଗାଁ ଗୁଡିକୁ ଆମ୍ବୁଲାନ୍ସ ଯାଇପାରୁନି |ସ୍ୱାସ୍ଥ୍ୟସେବା ଯୋଗାଇବାରେ ବାଧା ସୃଷ୍ଟି ହେଉଛି |ବ୍ଲକର ସୀମାନ୍ତ ତେଲନଦୀ,ଚକଳାପଦର, ସାନ ଟେମରା, ଗୁରୁସିଙ୍ଗା, ଇଚ୍ଛାପୁର, ଝରିଗାଁ ଆଦି ପଂଚାୟତରେ ଅନେକ ଗାଁ ରହିଛି |ଯେଉଁଠିକୁ ବର୍ଷାଦିନେ ଯୋଗାଯୋଗ ବିଛିନ୍ନ ହେଉଛି |ଆଉ କେତେକ ଗାଁକୁ ବର୍ଷାଦିନେ ଚାଲିକି ଯିବା ସମ୍ଭବ ହେଉନି |ଯାନବାହାନ ଚଳାଚଳ ସମ୍ପୂର୍ଣ୍ଣ ବାଧାପ୍ରାପ୍ତ ହେଉଛି |ଛାତ୍ରଛାତ୍ରୀ ବିଦ୍ୟାଳୟକୁ ଯିବାଆସିବା କରିବାରେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି |ଗୁରୁତର ରୋଗୀ ଏବଂ ଗର୍ଭବତୀ ମାନଙ୍କୁ ଖଟିଆରେ ଡାକ୍ତରଖାନାକୁ ନେବାକୁ ପଡୁଛି |ଏ ସମ୍ପର୍କରେ ଜିଲ୍ଲା ଯୋଜନା କମିଟି ଅଧ୍ୟକ୍ଷ ତଥା ଡାବୁଗାଁ ବିଧାୟକ ମନୋହର ରନ୍ଧାରୀଙ୍କୁ ପଚାରିବାରୁ ପୂର୍ବ ଅପେକ୍ଷା ଜିଲ୍ଲାରେ ଅପହଂଚ ଗାଁ ସଂଖ୍ୟା କମିଥିବା କହିଛନ୍ତି |ବଳକା ଗାଁ ଗୁଡିକୁ ପଂଚାୟତ ସହ ସଂଯୋଗ କରିବାକୁ ରାଜ୍ୟ ସରକାରଙ୍କୁ ଅବଗତ କରାଯାଇଛି |ଅପହଞ୍ଚ ଅଂଚଳ ଗୁଡିକୁ ଗମନାଗମନ ସୁବିଧା କରିବା ପାଇଁ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି |