ବିଭିନ୍ନ କ୍ଲୋଷ୍ଟରରେ ଆଞ୍ଚଳିକ ସ୍ତରୀୟ ସୁରଭି କାର୍ଯ୍ୟକ୍ରମ ଅନୁଷ୍ଠିତ
କୋଲନରା ବ୍ଲକର ବିଭିନ୍ନ କ୍ଲୋଷ୍ଟରରେ ଥିବା ବିଦ୍ୟାଳୟ ଗୁଡିକରେ ଆଞ୍ଚଳିକ ସ୍ତରୀୟ ସୁରଭି କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି | ମୁକୁନ୍ଦପୁର କ୍ଲୋଷ୍ଟର ଅଧୀନ ମୁକୁନ୍ଦପୁର ଗ୍ରାମରେ ଥିବା ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟ ପରିସରରେ ସୁରଭି କାର୍ଯ୍ୟକ୍ରମ ଅନୁଷ୍ଠିତ ହୋଇଥିବା ବେଳେ ରେଖପଦର କ୍ଲୋଷ୍ଟରର ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟ ରେଖପଦର, ରୋବାଡି 
କ୍ଲୋଷ୍ଟରର ସରକାରୀ ପ୍ରାଥମିକ ବିଦ୍ୟାଳୟ ବାଙ୍କିଲି ଏବଂ କୈଳାସପୁର କ୍ଲୋଷ୍ଟର ଅଧୀନ ସରକାରୀ ପ୍ରାଥମିକ ବିଦ୍ୟାଳୟରେ ଆଞ୍ଚଳିକ ସୁରଭି କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି | ଏହି ଅବସରରେ କୋଲନରା ଗୋଷ୍ଠୀ ଶିକ୍ଷା ଅଧିକାରୀ ମଞ୍ଜୁଲତା ଜେନା ସମସ୍ତ କ୍ଲୋଷ୍ଟରରେ ହେଉଥିବା ସୁରଭି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ଏବିଇଓ ପିତୃଦେବ ବିଡିକା, ବ୍ଲକ ଶିକ୍ଷକ ସଂଘ ସଭାପତି ନାରାୟଣ ବିଡିକା ପ୍ରମୁଖ ସମ୍ମାନିତ ଅତିଥି ଭାବେ ଯୋଗ 
ଦେଇଥିଲେ | ଏହି କାର୍ଯ୍ୟକ୍ରମରେ ଜୁନିଅର ଓ ସିନିୟର ବର୍ଗରେ ପ୍ରବନ୍ଧ ଲିଖନ, ବକୃତା, ସୃଜନ ଲିଖନ, ସଙ୍ଗୀତ, ଚିତ୍ରାଙ୍କନ ଓ ଦେଶାତ୍ମବୋଧକ ସଙ୍ଗୀତରେ ଗ୍ରୁପ ଡ୍ୟାନ୍ସ ଭଳି ମୋଟ ୧୫ଟି ପ୍ରତିଯୋଗିତା ଅନୁଷ୍ଠିତ ହୋଇଥିଲା | ବିଭିନ୍ନ ପ୍ରତିଯୋଗିତାରେ ଅଂଶଗ୍ରହଣ କରିଥିବା କୃତି ଛାତ୍ରଛାତ୍ରୀଙ୍କୁ ଉପସ୍ଥିତ ଅତିଥୀଙ୍କ ଦ୍ଵାରା ମାନପତ୍ର ସହ ପୁରସ୍କୃତ କରାଯାଇଥିଲା | ଛାତ୍ରଛାତ୍ରୀଙ୍କ ମନୋବଳକୁ ସୁଦୃଢ଼ କରିବା ସହ ପିଲାଙ୍କୁ ବିକଶିତ ଓ ପିଲାଙ୍କ ଲୁକ୍କାୟିତ ପ୍ରତିଭାକୁ ସର୍ବସମ୍ମୁଖରେ ବିକଶିତ କରିବା ଏଭଳି କାର୍ଯ୍ୟକ୍ରମ ସହାୟକ ହୋଇଥାଏ ଏବଂ ଯେଉଁ ଛାତ୍ରଛାତ୍ରୀ ମାନେ ଆଞ୍ଚଳିକ ସ୍ତରରେ କୃତି ହାସଲ କରିଛନ୍ତି ସେମାନେ ବ୍ଲକ ସ୍ତରୀୟ ଶିଶୁ ମହୋତ୍ସବ ସୁରଭି ପ୍ରତିଯୋଗିତାକୁ ମନୋନୀତ ହୋଇଥିବା ମୁଖ୍ୟ ଅତିଥି ଶ୍ରୀମତୀ ଜେନା କହିଥିଲେ | ମୁକୁନ୍ଦପୁର କ୍ଲୋଷ୍ଟର ଅଧିନ ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟ ପରିସରରେ ପ୍ରଧାନ ଶିକ୍ଷକ ଭି ସତ୍ୟନାରାୟଣଙ୍କ ସଭାପତିତ୍ବରେ ଆୟୋଜିତ କାର୍ଯ୍ୟକ୍ରମରେ ବିଦ୍ୟାଳୟ ସଭାପତି ନରେନ୍ଦ୍ର ନିଶାଲ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ | କ୍ଲୋଷ୍ଟରର ସମସ୍ତ ବିଦ୍ୟାଳୟରୁ ୧୭୫ ଜଣ ଛାତ୍ରଛାତ୍ରୀ ଆୟୋଜିତ ପ୍ରତିଯୋଗିତାରେ ଅଂଶଗ୍ରହଣ କରିଥିଲେ | ସିଆରସିସି ଗୋବର୍ଦ୍ଧନ କୁଲେସିକା ପରିଚାଳନା କରିଥିବା ବେଳେ ସହକାରୀ ଶିକ୍ଷକ ସଞ୍ଜୟ କୁମାର ନାଗ୍ ମଞ୍ଚ ପରିଚାଳନା କରିଥିଲେ | କାର୍ଯ୍ୟକ୍ରମରେ ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟିତ୍ରୀ ଓ ବିଭିନ୍ନ ବିଦ୍ୟାଳୟରୁ ଆସିଥିବା ଶିକ୍ଷକ ଶିକ୍ଷୟିତ୍ରୀ ମାନେ ସହଯୋଗ କରିଥିଲେ | ସେହିପରି ରୋବାଡ଼ି କ୍ଲୋଷ୍ଟର ଅଧିନ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ବାଙ୍କିଲି ଠାରେ ପ୍ରଧାନ ଶିକ୍ଷକ ଚନ୍ଦ୍ରଭୂଷଣ ମାଣ୍ଡାଙ୍ଗୀଙ୍କ ସଭାପତିତ୍ବରେ ଆୟୋଜିତ କାର୍ଯ୍ୟକ୍ରମରେ ସ୍ଥାନୀୟ ସରପଞ୍ଚ କୁନି ମାଣ୍ଡାଙ୍ଗୀ ମୁଖ୍ୟ ବକ୍ତା ଭାବେ ଯୋଗ ଦେଇଥିବା ବେଳେ ସମିତି ସଭ୍ୟା ସୁଜାତା ତୁଳ, ଝୋରଡି ସମିତି ସଭ୍ୟା ମାଧୁରୀ ବେହେରା ପ୍ରମୁଖ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ | କ୍ଲୋଷ୍ଟରର ସମସ୍ତ ବିଦ୍ୟାଳୟରୁ ୧୫୦ ଜଣ ଛାତ୍ରଛାତ୍ରୀ ବିଭିନ୍ନ ପ୍ରତିଯୋଗିତାରେ ଅଂଶଗ୍ରହଣ କରିଥିଲେ | ସହକାରୀ ଶିକ୍ଷକ କୃଷ୍ଣପ୍ରସାଦ ମିଶ୍ର ମଞ୍ଚ ପରିଚାଳନା କରିଥିବା ବେଳେ ସିଆରସିସି ନରେନ୍ଦ୍ର କୁମାର ଭୁୟାଁ କାର୍ଯ୍ୟକ୍ରମ ପରିଚାଳନା କରିଥିଲେ | କ୍ଲୋଷ୍ଟରର ସମସ୍ତ ଶିକ୍ଷକ ଶିକ୍ଷୟିତ୍ରୀ ମାନେ ଉପସ୍ଥିତ ରହି ସହଯୋଗ କରିଥିଲେ | ସେହିପରି ରେଖପଦର, ଭୋଇମଡା ଓ କୈଳାସପୁର କ୍ଲୋଷ୍ଟରରେ ସୁରଭି କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି | ରେଖପଦର କ୍ଲୋଷ୍ଟରରେ ସିଆରସିସି ପ୍ରଦୀପ କୁମାର ନାଏକ ପରିଚାଳନା କରିଥିବା ବେଳେ କୈଳାସପୁର କ୍ଲୋଷ୍ଟରରେ ସିଆରସିସି ବାଲୁ ସାହୁ ଏବଂ ଭୋଇମଡା କ୍ଲୋଷ୍ଟରରେ ସିଆରସିସି ଯୁଧିଷ୍ଠିର ମୁଟୁକା ପରିଚାଳନା କରିଥିଲେ |
ରାୟଗଡା ରୁ ଗୌରୀ ପଟ୍ଟନାୟକ ଙ୍କ ରିପୋର୍ଟ୍
