ଭିକମାଗିଲେ ବି ପେଟ ପୁରୁନି, ପର ବାରଣ୍ଡାରେ ବିତୁଛି ଜୀବନ
ଚନ୍ଦାହାଣ୍ଡି (ଦିଲୀପ ଦାସ )ରହିବାକୁ ଘର ଖଣ୍ଡେ ନାହିଁ, ଜମିବାଡ଼ି କି ଘର ଡିହ ଖଣ୍ଡେ ନାହଁ।ପରିଶ୍ରମ କରି ପେଟକୁ ଦାନା ଗଣ୍ଡେ ଯୋଗେଇବା ପାଇଁ ସକ୍ଷମ ନାହିଁ ଆମର।ପୁଅ ଝିଅ ଆମକୁ କେହି ପଚାରୁ ନାହାନ୍ତି ।ଉପାୟ ନ ପାଇ ଶେଷରେ ବାଧ୍ୟ ହୋଇ ଭିକ ମାଗୁଛୁ।ହେଲେ ଭିକ ମାଗିଲେ ବି ଏଥିରେ ଆମ ଦୁଇ ପ୍ରାଣୀଙ୍କ ପେଟ ପୁରୁନି ବାବୁ ।ଅନେକ ସମୟରେ ଭୋକ ଉପାସରେ ଦିନ କାଟିବାକୁ ପଡୁଛି।ଏଭଳି କୋହଭରା କଣ୍ଠ ରେ କହିଛନ୍ତି ବୃଦ୍ଧ ଦମ୍ପତି।ଏମାନେ ହେଲେ ନବରଙ୍ଗପୁର ଜିଲ୍ଲା ରାଇଘର ବ୍ଲକ ଅନ୍ତର୍ଗତ ଟିମନପୁର ପଞ୍ଚାୟତ ର ଚିଙ୍ଗରାଭଟା ଗାଁ ର କଛରୁ ବେଶ୍ରା(୬୫)ଓ ସ୍ତ୍ରୀ ମିଲନ୍ତି ଗୌଡ଼(୫୦) । ଏମାନେ ଦୀର୍ଘଦିନ ହେଲା ଚନ୍ଦାହାଣ୍ଡି ଅଂଚଳ ର ବିଭିନ୍ନ ଗାଁ ଗାଁ ବୁଲି ଭିକ ମାଗନ୍ତି ରାତି ହେଲେ କାହା ଦୋକାନ ବାରଣ୍ଡା ରେ ତ ସ୍କୁଲ, ଅଙ୍ଗନବାଡ଼ି ଗୃହ କିମ୍ବା କାହା ଘର ବାରଣ୍ଡାରେ ରାତି କାଟନ୍ତି। ସକାଳ ପାହିଲେ ପୁଣି ଭିକ ମାଗିବାକୁ ବାହାରି ପଡନ୍ତି l ବିଡ଼ମ୍ବନାର ବିଷୟ ୯ମାସ ହେଲା ଚାଉଳ ପାଉନାହାନ୍ତି। କଛରୁ ଙ୍କ କହିବା ଅନୁଯାୟୀ ତାଙ୍କ ପାଖରେ ପରିଚୟ ପତ୍ର,ରାସନ କାର୍ଡ, କିମ୍ବା ଆଧାର କାର୍ଡ ବି ନାହିଁ। ଯାହାସବୁ ଥିଲା ହଜିଯାଇଛି । ରାସନ କାର୍ଡ ହଜିଯିବାରୁ ପଞ୍ଚାୟତରେ ଚାଉଳ ଦେବା ପାଇଁ ମନାକରିଦେଇଥିବା କହିଛନ୍ତି।ଅନେକ ଥର ପଂଚାୟତ କୁ ଯାଇ ଗୁହାରି କରିଛନ୍ତି ହେଲେ ତାଙ୍କ ଗୁହାରି କେହି ଶୁଣୁନଥିବା କ୍ଷୋଭ ର ସହ କହିଛନ୍ତି।କଛରୁ ଙ୍କ ଦୁଇ ପୁଅ ଓ ଗୋଟେ ଝିଅ ସମସ୍ତଙ୍କୁ ବିବାହ କରିଦେଇଛନ୍ତି।କଛରୁ ଓ ମିଲନ୍ତି ଙ୍କୁ ଘରୁ ତଡିଦେଇ ଦାଦନ ଖଟିବାକୁ ଦୁଇ ପୁଅ ମହାରାଷ୍ଟ୍ରକୁ ଯାଇଛନ୍ତି।ମିଲନ୍ତି ମାନସିକ ରୋଗରେ ଥିବା ବେଳେ ଶରୀରର ଡାହାଣ ହାତ ନିଆଁ ରେ ପୋଡି ଅକାମି ହୋଇଯାଇଛି। ସରକାର ଅସହାୟଙ୍କ ପାଇଁ ବିଭିନ୍ନ ଯୋଜନା କରିଛନ୍ତି।ହେଲେ କଛରୁ ଓ ମିଲନ୍ତି ସେ ସବୁ ଯୋଜନାରୁ ବଞ୍ଚିତ ହୋଇଛନ୍ତି।ଆଜି ଯାଏଁ ତାଙ୍କୁ ଆବାସ ଯୋଜନାରେ ଘର ଖଣ୍ଡିଏ ମିଳିନି।ଏପରିକି ଭତା ଓ ଚାଉଳ ପାଇବାରୁ ବଞ୍ଚିତହେବା ନେଇ ସରକାରୀ ଅଧିକାରୀ ଓ ସ୍ଥାନୀୟ ନେତାଙ୍କ ପରିବାପଣିଆକୁ ନେଇ ପ୍ରଶ୍ନ ଉଠିଛି।ଉଭୟଙ୍କ ନା ରେ ରହିଛି ରାସନ କାର୍ଡ।ହେଲେ ଚାଉଳ କାର୍ଡ ହଜିଯିବାରୁ ୧୦କେଜି ଚାଉଳ ସେମାନେ ପାଉନାହାନ୍ତି। ୯ମାସ ହେଲା ଚାଉଳ ପାଇନାହାନ୍ତି କଛରୁ ଓ ମିଲନ୍ତି।ଭୋକ ଉପାସରେ ରହି ରହି କଣ୍ଟା ହୋଇଗଲେଣି ଉଭୟେ।ଜିଲ୍ଲା ପ୍ରଶାସନ ଉଭୟଙ୍କୁ ସହାୟତା ପ୍ରଦାନ ଲାଗି ତୁରନ୍ତ ପଦକ୍ଷେପ ନେବା ସହିତ ରାଇଘର ବ୍ଲକ ପ୍ରଶାସନ ତାଙ୍କୁ ନୂତନ ରାସନ କାର୍ଡ ଯୋଗାଇବା ଏବେ ଜରୁରୀ ହୋଇପଡିଛି।