ମୋଟରସାଇକେଲ ଦୁର୍ଘଟଣାରେ ଜଣେ ମୃତ
ଡାବୁଗାଁ, ୨୮/୧ (ମ.ନି.ସ.)- ନବରଙ୍ଗପୁର ଜିଲା ଡାବୁଗାଁ ଥାନା ଅଧୀନ ଅର୍ଚ୍ଚିତଗୁଡା ଗ୍ରାମ ଛକ ରେ ମୋଟରସାଇକେଲ ଦୁର୍ଘଟଣା ଘଟି ଜଣଙ୍କର ମୃତ୍ୟୁ ଘଟିଥିବା ନେଇ ରବିବାର ଡାବୁଗାଁ ଥାନାରେ ଅଭିଯୋଗ ହୋଇଛି | ସୂଚନାଯୋଗ୍ୟ:- ଉମରକୋଟ ଥାନା ଅଧୀନ ତାରାଯୋଡି ଗ୍ରାମର ସଦନ ସାନ୍ତା (୩୫) ଶନିବାର ନିଜ ବନ୍ଧୁ ଘର କୋଡିଗାଁ ଗ୍ରାମକୁ ଯାଇଥିଲା | ସନ୍ଧ୍ୟା ରେ ସେଠାରୁ ମୋଟରସାଇକେଲ ନଂ ସିଜି ୨୭ ଏଲ ୩୭୬୧ ଯୋଗେ ଫେରୁଥିବା ବେଳେ ଡାବୁଗାଁ ଥାନା ଅଧୀନ ଅର୍ଚ୍ଚିତଗୁଡା ଗ୍ରାମ ଛକ ପାଖରେ ଏକ ଗାଈ ସହ ଧକ୍କା ହୋଇଥିଲା | ଫଳରେ ସେ ରାସ୍ତା କଡକୁ ଛିଟିକି ପଡି ଆହତ ହୋଇଥିଲେ | ତାଙ୍କୁ ସ୍ଥାନୀୟ ଲୋକେ ଆମ୍ବୁଲାନ୍ସ ଯୋଗେ ଝରିଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ | ସେଠାରେ ଚିକିତ୍ସିତ ଅବସ୍ଥାରେ ରାତିରେ ତାଙ୍କର ମୃତ୍ୟୁ ଘଟିଥିଲା | ଏନେଇ ରବିବାର ସକାଳୁ ମୃତକର ଭାଇ ଲଳିତ ସାନ୍ତା ଡାବୁଗାଁ ଥାନାରେ ଏତଲା ଦେଇଥିଲେ | ଉକ୍ତ ଏତଲାକୁ ଭିତ୍ତି କରି ଥାନା ଏଏସଆଇ ଚନ୍ଦ୍ରଶେଖର ହଜାରୀ ଡାକ୍ତରଖାନାରେ ପହଞ୍ଚି ଶବ ଜବତ କରି ପଞ୍ଚନାମା କରି ବ୍ୟବଚ୍ଛେଦ ପାଇଁ ପଠାଇଥିଲେ | ଶବ ବ୍ୟବଚ୍ଛେଦ ପରେ ପରିବାର ବର୍ଗଙ୍କୁ ହସ୍ତାନ୍ତର କରାଯାଇଛି | ଏନେଇ ଥାନା କେସ ନଂ ୨୭/୨୪ ରେ ଏକ ମାମଲା ରୁଜୁ କରାଯାଇଛି |