ଚୋରା ସିମେଣ୍ଟ ସହ ଅଟୋ ଗାଡି ଜବତ
ଡାବୁଗାଁ, ୧୭/୨ (ମ.ନି.ସ.)- ନବରଙ୍ଗପୁର ଜିଲା ଡାବୁଗାଁ ବ୍ଲକ ମେଦନା ଗ୍ରାମ ନିକଟରେ ଅଟୋ ଗାଡିରେ ସିମେଣ୍ଟ ଚୋରୀ କରି ନେବା ସମୟରେ ଡାବୁଗାଁ ପୋଲିସ ଶୁକ୍ରବାର ବିଳମ୍ବିତ ରାତ୍ରିରେ ଗାଡି ସହ ସିମେଣ୍ଟ ଜବତ କରିଛି | ସୂଚନାଯୋଗ୍ୟ:- ନବରଙ୍ଗପୁର ଜିଲା ମେଦନା – ଝରିଗାଁ ପୂର୍ତ୍ତ ବିଭାଗ ରାସ୍ତା ନିର୍ମାଣ କାର୍ଯ୍ୟ ର ଠିକାଦାର ବବଲୁ ବିଶୋଇ ଉକ୍ତ ରାସ୍ତା କାମ ପାଇଁ ଥିବା ଅସ୍ଥାଇ କ୍ୟାମ୍ପରେ ପୋଲ କାମ ପାଇଁ ଥିବା ସିମେଣ୍ଟ ଚୋରୀ ହେଉଛି ବୋଲି ପୂର୍ବରୁ ପୋଲିସକୁ ଖବର ଦେଇଥିଲେ | ଏହାପରେ ଡାବୁଗାଁ ଥାନା ପୋଲିସ ରାତ୍ରିରେ ପେଟ୍ରୋଲିଂ କରୁଥିବା ସମୟରେ ବିଳମ୍ବିତ ରାତ୍ରିରେ ମେଦନା ଗ୍ରାମ ନିକଟରେ ମେଦନା – ଝରିଗାଁ ପୂର୍ତ୍ତ ବିଭାଗ ରାସ୍ତା ରେ ଏକ ଅଟୋ ନଂ ଓଡି ୨୪ ସି ୪୨୪୭ ରେ ୨୦ ବସ୍ତା ସିମେଣ୍ଟ ଲଦି ଝରିଗାଁ ଆଡକୁ ଯାଉଥିଲା | ପୋଲିସ ଗାଡି ଦେଖି ଅଟୋ ଗାଡି ଡ୍ରାଇଭର ଗାଡି ଛାଡି ଦୌଡି ପଳାଇଥିଲା | ପୋଲିସ ସଙ୍ଗେ ସଙ୍ଗେ ଗାଡି ଅଟକାଇ ଅଟୋ କୁ ଯାଞ୍ଚ କରିବାରୁ ଜଣାପଡିଥିଲା ଯେ ଗାଡିରେ ସିମେଣ୍ଟ ରହିଛି | ପୋଲିସ ସିମେଣ୍ଟ ବୋଝେଇ ଅଟୋ ଗାଡିକୁ ଜବତ କରି ଥାନାକୁ ଆଣିଥିଲେ | ଶନିବାର ସକାଳୁ ଠିକାଦାର ବବଲୁ ବିଶୋଇ ଡାବୁଗାଁ ଥାନାରେ ଏତଲା ଦେଇଥିଲେ | ଉକ୍ତ ଏତଲାକୁ ଭିତ୍ତି କରି ଥାନା କେସ ନଂ ୪୨/୨୪ ରେ ଏକ ମଲାଲା ରୁଜୁ କରାଯାଇଛି | ତଦନ୍ତ ଚାଲୁ ରହିଛି ଅଭିଯୁକ୍ତ କୁ ଶୀଘ୍ର ଗିରଫ କରାଯିବ ବୋଲି ଆଇଆଇସି ସୁନୀଲ କୁମାର ପ୍ରଧାନ ସୂଚନା ଦେଇଛନ୍ତି |
ଡାବୁଗାଁରୁ ପ୍ରଜ୍ଞାରଞ୍ଜନ ପରିଡାଙ୍କ ରିପୋର୍ଟ
